ہیریٹیج تھرو لینز فوٹو واک

محکمہ ٹورازم ڈویلپمنٹ کارپوریشن پنجاب ولوں سیکرٹری سیاحت پنجاب احسان بھٹہ دی سربراہی وچ مختلف پروجیکٹس اتے تیزی نال کم جاری اے۔ اوہو پنجاب دے مختلف شہراں وچ فوٹو واک دا وی پربندھ کیتا جا رہیا اے۔ ایس سلسلے دی اک کڑی دا پربندھ 4 ستمبر بروز اتوار نوں لہور وچ ایکسپلور پنجاب دے ایڈیٹر عثمان قریشی دی قیادت وچ کیتا گیا جہدے
وچ مختلف شعبہ جات نال تعلق رکھن والے لوکاں دی کثیر تعداد نے رلت کیتی۔ فوٹو واک دا آغاز مینار پاکستان دے کول واقع سکھ مذہب دے پنجویں گروگرووارجن دیوجی دے گردوارے توں کیتا گیا۔ گردوارے دے کیئر ٹیکر اظہر شاہ نے ای ٹی پی بی تے محکمہ آرکیالوجی ڈیپارٹمنٹ ولوں ڈائریکٹر ملک مقصود تے ایکسپولر پنجاب دے ایڈیٹر عثمان قریشی نے سارے شرکا نوں خوش آمدید آکھیا۔ فوٹو واک دا آغاز سمادھی رنجیت سنگھ توں کیتا گیا جتھے اظہر شاہ صاحب نے سکھ مذہب توں متعلق بنیادی گلاں اتے چانن پایا تے شرکا نوں لیکچر دتا۔فوٹوگرافرز تے ویلو گررز نے تصویراں تے ویڈیو بنائی۔ گردوارہ ڈیرہ صاحب مگروں فوٹو واک وچ شرکا نوں محسن لہور جدید لہور دے بانی سرگنگارام دی سمادھی اتے لے جایا گیا جتھے شرکا نے جدید لہور دے بانی سرگنگارام دی خدمات نوں خوب سراہیا۔ سمادھی گنگارام مگروں شرکا نوں اندرون لہور وچ واقع وکٹوریہ سکول وچ اکٹھا کیتا گیا جتھے کدی مہاراجہ رنجیت سنگھ دے پوتے نونہال سنگھ دی حویلی واقع سی اوتھے محسن فراز نے لہور ورثہ ولوں شرکا نوں جی آیاں نوں آکھیا تے نادر اشیا وکھان دا وی پربندھ کیتا گیا سی۔ حویلی نونہال سنگھ وچ پاکستان فلم انڈسٹری تے ڈرامہ انڈسٹری دے مختلف شوٹ وی ہوئے نیں۔ حویلی ننوہال سنگھ مگروں شرکا نوں سرگنگارام دے تخلیق کردہ لہور میوزیم اکٹھا کیتا گیا جتھے لہور میوزیم دے ڈائریکٹر احمد منہاس تے شرکا نوں جی آیاں نوں آکھیا تے لہور میوزیم دی تریخ توں روشناس کروایا۔ لہور میوزیم وچ سیکرٹری سیاحت احسان بھٹہ نے خصوصی طور تے رلت کیتی تے لوکاں نوں ایس فوٹوواک دی اہمیت توں آگاہی فراہم کیتی۔ احسان بھٹہ نے عثمان قریشی تے نعمان خان نوں کامیاب پروگرام تے آرگنائز کرن اتے مباکباد پیش کیتی۔ احسان بھٹہ نے شرکا نال خطاب کردے ہوئے فوٹوواک دی اہمیت تے فوٹو گرافرز تے ویلو گرز دی مدد نال پاکستان دا سافٹ امیج دنیا دے سامنے چنگی طرح جاوے گا۔ پاکستان اک آزاد مملکت اے جتھے ہر کمیونٹی دے لوکاں نوں مکمل اظہار خیال تے مکمل آزادی دے نال اپنی عبادت گاہواں اتے جان دی اجازت اے۔ ہیرٹیج تھرولینز فوٹوواک دے اختتام تے شرکا وچ سرٹیفکیٹ تے فوٹو کارڈ نال نوازیا گیا تے شرکا نوں ریفریشمنٹ وی دتی گئی۔ ہیریٹیج تھرولینز وچ لہور تے پنجاب دی مختلف نامور شخصیات نے رلت کیتی جہدے وچ لہور شناسی فائونڈیشن دے چیئرمین سید فیضان نقوی دی سربراہی وچ 20دے کول شرکا نے رلت کیتی جہدے وچ پروفیسر ذیشان ہاشمی ،ڈاکٹر تنویر گیلانی ،طلحہ شفیق ‘کاشف گھرکی، حماد احمد، وغیرہ ایسے طرحاں لہور ورثہ دے سربراہ محسن فراز تے لہور دے کلچر اتے کئی دہائیاں توں کم کرن والے پاکستان دے مشہور ٹریولر تے ٹورسٹ گائیڈ عادل لاہوری تے سینئر بائیکر سلمان حمید کھوکھر نے رائیڈ ٹو اینی ویئر گروپ دی قیادت کردے ہوئے اپنی بیگم تے ٹیم شاہد اقبال شبان نے رلت کیتی۔ ایسے طرح جہلم توں نامور تریخ دان مرزا صفدر بیگ تے گوجرانوالہ توں مختلف شخصیات نے رلت کیتی۔ ایس دے علاوہ نعیم مرتضیٰ (واقعات لاہور) شہر یار نعیم’ شہر یار نعیم پروڈکشن’ سعد زاہد (ویلوگ مینٹری) انجینئر شجاعت’ خرم بسرا’ شعیب’ سلمان’ سجاد بٹ فوٹوگرافر’ رانا ساجد فوٹوگرافر مایا نے رلت کیتی۔ شرکا نے فوٹو واک دے اختتام تے سیکرٹری احسان بھٹہ ایکسپلور پنجاب دے ایڈیٹر عثمان قریشی دا شکریہ ادا کیتا تے مستقبل وچ وی ایسے پروگرام کرواندے رہن دا مطالبہ کیتا۔