مَنے پَرمنے شاعر عباس مرزا دے اعزاز وچ شام

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دے پربندھ ہیٹھ منے پرمنے شاعر عباس مرزا دے اعزا ز وچ اک شام دا انعقاد کیتا گیا جہدے وچ دانشوراں’ ادیباں تے شاعراں نے اوہناں دے فن شاعری تے شخصیت دے مختلف پہلوواں اتے چانن پایا۔ اظہار خیال کرن والیاں وچ الیاس گھمن، فرحت عباس شاہ، حسین مجروح، اقبال قیصر، ممتاز راشد لاہوری، افضل ساجد تے ڈاکٹر صغرا صدف ڈی جی پِلاک شامل سن۔
مقررین نے آکھیا کہ عباس مرزا دا تعلق نارووال نال اے۔ اوہناں دی شاعری دے تقریباً اک درجن دے کول مجموعے شائع ہو چکے نیں۔ ہمسایہ ملک دے تعلیمی نصاب وچ وی اوہناں دی شاعری شامل اے۔ اوہناں دی شاعری دی جھلک اوہناں دی شخصیت وچ وی موجود اے۔ اوہناں دی شاعری دے کئی پہلو نیں جہناں وچ طنزو مزاح’ سماجی مسائل’ پسماندہ طبقے دے جذبات دی ترجمانی دے علاوہ صوفیانہ رنگ وی موجود اے۔ اوہناں دی شاعری دے کئی پہلو نیں جہناں نوں طنزو مزاح’ سماجی مسائل’ پسماندہ طبقے دے جذبات دی ترجمانی دے علاوہ صوفیانہ رنگ وی موجود اے۔ اک زمانہ اوہناں دی شاعری دا مدح اے لیکن اوہ کدی وی مراعات دے پچھے نہیں نسے۔ اوہ قلم دی سچائی اتے یقین رکھدے نیں۔ حسین مجروح نے آکھیا کہ اج دے دور وچ چنگے انسان تے چنگے شاعر دا ملنا بہت اوکھا اے ۔ خوش قسمتی نال ایہہ دونویں گلاں عباس مرزا دے اندر بدرجہ اُتم موجود نیں۔ اوہناں نے آکھیا کہ ساڈے صوفی شاعراں نے مگروں آن والے شاعراں لئی مشکل ایہہ پیدا کیتی اے کہ اوہناں دے پائے دی شاعری کرنا کسے دے وَس دی گل نہیں۔بہرحال عباس مرزا نے پنجابی شاعری دی صوفیانہ روایت نوں برقرار رکھدے ہوئے اپنے لئی نویں راہواں متعین کیتیاں نیں۔ الیاس گھمن نے آکھیا کہ موجودہ دور دے شاعراں نوں چاہیدا اے کہ شاعری دی پرانی صنفاں اتے وی کم کرن جہناں وچ ٹپے’ مائیے’ ڈھولا تے کافی وغیرہ شامل اے۔ عباس مرزا نے بیت اتے کم کر کے پنجابی زبان اتے احسان کیتا اے۔
اقبال قیصر نے آکھیا کہ عباس مرزا ایسے انسان نیں جہناں نوں اپنے توں ودھ دوجیاں دی فکر ہوندی اے۔ اوہ اپنے دوستاں دی پسند تے نہ پسند نوں بہت اہمیت دیندے نیں۔ ممتاز راشد لہوری نے آکھیا کہ پابندی ویلے عباس مرزا اتے ختم اے۔ سانوں ساریاں نوں وی اوہناں دی ایس عادت نوں اپنانا چاہیدا اے۔
فرحت عباس شاہ نے آکھیا کہ اوہ اج دے دور دے بلھے شاہ’ سلطان باہو تے شاہ حسین نیں۔ ڈائریکٹر جنرل پلاک نے آکھیا کہ ایسے لوک قابل تعریف نیں جہڑے اپنی دھرتی تے زبان نال جڑے ہوئے نیں۔ اپنے مافی الضمیر نوں اسیں جیویں اپنی ماں بولی وچ بیان کر سکنے آں اوہ کسی ہور زبان وچ ممکن نہیں۔ اوہناں نے ترنجن دا ”الیاس گھمن نمبر” وی الیاس گھمن نوں پیش کیتا تے آکھیا کہ پلاک پنجابی زبان دے دوجے دانشوراں دے نمبر وی شائع کرے گا۔
عباس مرزا نے آکھیا کہ اوہناں نے 1965 وچ شاعری دا آغاز کیتا۔ راجا رسالو تے اقبال دیوانہ جئی دوجی شخصیات دے اسرار اتے پنجابی وچ شاعری لکھنا شروع کیتی۔ اوہ ہن تک 15ہزار دے کول بیت لکھ چکے نیں جہڑا کہ اک ریکارڈ اے۔ پنجابی دے اندر ایس توں صنف نوں متعارف کروان والے وی اوہ خود ای نیں۔ اوہناں نے اپنا کلام پیش کر کے سامعین نوں خوب محظوظ کیتا تے بے حد داد وصول کیتی۔ مداحواں ولوں پھُلاں دے تحفے وی پیش کیتے گئے۔ پروگرام وچ نظامت دے فرائض ڈاکٹر خاقان حیدر غازی نے سرانجام دتے تے اسامہ عباس نے نعت رسول مقبولۖ پیش کیتی۔