عدل منہاس لہوری ہوراں دے اعزاز وچ اکٹھ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے پربندھ ہیٹھ منے پرمنے شاعر عدل منہاس لاہوری دے اعزاز وچ اک شام دا پربندھ کیتا گیا جہدے وچ دانشوراں’ ادیباں تے شاعراں نے اوہناں دے فن شاعری تے شخصیت دے مختلف پہلوواں اتے چانن پایا۔ اظہار کرن والیاں وچ پروفیسر محمد عباس مرزا، ڈاکٹر عباد نبیل شاد، ڈاکٹر سعید الفت، بابا نجمی، اقبال قیصر، تطہیر فاطمہ، ملک ارشاد، عاصم خواجہ، غلام محمد ساقی، ممتاز راشد لاہوری، فراست بخاری، خالد رامے، ڈاکٹر ایم ابرار، یوسف پنجابی، مشتاق قمر تے ڈاکٹر صغرا صدف ڈائریکٹر جنرل پِلاک شامل سن۔
مقررین نے کہیا کہ عدل منہاس جئے بے لوث تے انتھک دانشوراں دی وجہ نال پنجابی زبان پوری آن بان تے شان دے نال زندہ تے سلامت ہے تے رہوے گی۔ عدل منہاس دا شمار اوہناں شاعراں وچ ہوندا اے جہناں نے حضوری باغ وچ انعقاد پذیر ہون والی ادبی محفلاں وچ رلت کیتی۔ ممتاز راشد لاہوری نے کہیا کہ والڈ سٹی والیاں نے ازسر نو حضوری باغ دی تزئین و آرائش کردتی اے تے اسیں بابا عدل منہاس لاہوری دی صدارت وچ اوتھے اک محفل وی منعقد کر چکے آں۔ خالد رامے نے کہیا کہ شاعر شعور دا نمائندہ ہوندا اے جس قسم دا ماحول اوہنوں میسر آندا اے اوہدی عکاسی اوہدے کلام توں ہوندی اے۔
پروفیسر محمد عباس مرزا نے کہیا کہ شاعر تہاڈے طرح دا انسان ہوندا اے جہڑا کہ خوبیاں تے خامیاں دا مجموعہ ہوندا اے۔ ساڈا کم صرف اوہدی شاعری دے خدوخال نوں پرکھنا اے۔ شاعر دی شخصیت اوہدی شاعری توں یکسر مختلف وی ہو سکدی اے۔ جہدی مثال مرزا غالب دی صورت وچ موجود اے۔ عدل منہاس دے کلام پڑھن دا انداز بہت متاثر کن اے جہڑا اوہناں دا خاصہ اے۔ اقبال قیصر نے کہیا کہ انسانی قدراں دا احترام جس قدر میں عدل منہاس وچ ویکھیا اے اوہ بہت گھٹ لوکاں دے حصے وچ آندا اے۔ اپنے بھرا دے قاتل نوں صرف ایس وجہ نال معاف کر دینا کہ قتل کرن والا نوجوان اے۔ کدھرے اوہدی زندگی برباد نہ ہو جاوے ایساکرنا بہت دل گردے دا کم ہوندا اے۔
ڈائریکٹر جنرل پلاک ڈاکٹر صغرا صدف نے آکھیا کہ مینوں نہایت خوشی محسوس ہوندی اے جدوں عدل منہاس پلاک دی تقریباً ہر محفل وچ رونق افروز ہوندے نیں۔پلاک دی ساری رونق ایسے انتھک تے اپنی ماں بولی نال پیار کرن والیاں دی وجہ نال اے۔ مداحواں ولوں عدل منہاس لاہوری نوں پھلاں دے تحفے وی پیش کیتے گئے۔ پروگرام وچ نظامت دے فرائض ڈاکٹر خاقان حیدر غازی نے سرانجام دتے۔ پروگرام دے اخیر وچ عدل منہاس لاہوری نے اپنا کلام پیش کر کے سامعین نوں خوب محظوظ کیتا تے بے پناہ داد وصول کیتی۔