پنجاب سرکار ڈِگان دی سازش

عمران خان نے چشتیاں وچ گل کردیاں دعوا کیتا کہ پنجاب حکومت نوں ڈِگان دیاں سازشاں ہو رہیاں نیں جہدے لئی کروڑاں رپئے آفر کیتے جا رہے نیں۔ اوہناں مطابق ایس کم لئی مسٹر ایکس تے وائی وی اسمبلی رکناں نوں دھمکیاں دے رہے نیں۔ اوہناں مطابق اوہ جدوں اسمبلی گئے تاں اوتھے وڈے وڈے ڈاکو بیٹھے سن۔عمران خان ہوری لوکائی دی پسند دی سیاست کردے نیں جہدے وچ گل نوں لون مرچ تے مسالے لا کے بیان کرنا بعض واری رائی دا پہاڑ بنا کے وکھانا تے کئی چیزاں انہوند توں ہوند وچ لیا وکھانا ورگے کارے شامل نیں۔ ہر وار اوہ کوئی ایسا شوشا چھڈ دیندے نیں جہدے اتے لوکائی فوری ایمان لے آوندی اے۔ بعض واری اجہے کسے شوشے دی تردید وی کرنی پے جاندی اے یاں فیر اوہناں دے سنگی وضاحتاں کردے پھردے نیں پر پکی عمر وچ ہو کے وی عمران خان پکی گل کرن دا کارا گھٹ ای کردے نیں۔جمہوری نظام وچ حکومتاں ڈِگانا تے بنانا کوئی نویکلی گل نہیں ہوندی۔ جہڑا وی اکثریت وکھال دیوے حکومت اوہدی ہوندی اے۔ بدقسمتی نال پاکستان اندر حکومتاں دے بنان تے ڈِگان دا عمل جمہوری انداز نال نہیں واپردا۔ ایہدے مگر مختلف ہتھ ہوندے نیں جس پاروں عمل شفاف وی نہیں ہوندا تے اوہدے مگر شک شبھے ہمیشا قایم رہندے نیں۔جے عمران خان ہوراں دی گل ٹھیک اے تاں یقینن ایہ تشویش دی گل اے پر ایس عمل بارے عمران خان کول ہور معلومات وی ہوون گیاں۔ بہتر ہوندا کہ اوہ ایہدے بارے کھل کے گل کردے تے ثبوت نال کردے۔ نرا مسٹر ایکس تے وائی اتے الزام لان نال گل ادھوری رہ جاندی اے۔ گل وچ سسپنس رکھنا ایہو جہے معاملیاں وچ مناسب نہیں ہوندا۔
ایس ویلے پنجاب وچ عمران خان دی حمایت یافتا تے اوہناں دے سنگیاں دی حکومت اے۔ ایدوں پہلاں عثمان بزدار دا کالا دور وی عمران خان ہوراں دے طفیل ای پنجاب دے سر اتے سوار رکھیا گیا۔ ایہدے نال عمران خان ہوراں دی تے کسے حس دی تسکین ہوئی ہووے گی پر پنجاب دا بیڑا جویں غرق ہویا اوہ دہاکیاں دا نقصان اے۔ ہن پنجاب اتے چودھری پرویز الٰہی دی حکومت اے جو ایدوں پہلاں وی پنجاب اتے حکمرانی کر چکے نیں تے اوہناں دے انداز حکمرانی دی اپنے پرائے سارے ای صفت کردے نیں۔ محلاتی سازشاں نال اجہی حکومت نوں ڈِگانا یقینن ماڑی گل اے۔ سیاسی عمل نال جو وی ممکن اے کیتا جاوے تاں شاید کسے نوں اعتراض نہ ہووے پر عمران خان ہوراں نوں ایس بارے گل پوری تے کھلھ کے کرنی چاہیدی اے۔٭