امدادی سامان بارے ضروری گلاں

اسیں اجہے سماج وچ رہ رہے آں جِتھے اِک دوجے تے اعتبار تے وساہ جِیویں مک ای گیا اے،کِسے حد تیک ایہ بے اعتباری تے بے وساہی ہیگی وی ٹھیک۔کیوں جے ساڈے کرتوت ای کچھ ایسراں دے ہوگئے نیں۔جِتھے مسِیتوں ٹوٹیاں نالے پکھے لتھ جان،مسِیت دے لوٹیاں تے پانی پِین والے گلاساں نوں سنگلیاں وجیاں ہون اوتھے کیویں اعتبار کِیتا تے وساہ کھادا جاسکدا اے۔لوکاں دے دِلاں دماغاں وچوں اعتبار یقین تے وساہ ورگیاں کیفیتاں تے صِفتاں اڈاری مار گئیاں نیں۔ہر کِسے دے دل دماغ وچ ہر دوجے دے بارے بے یقینی تے بے وساہی جہی بھر گئی ہوئی اے۔ہور تے ہور ہون 2022 دے حالیہ ہڑھ وچ پھسے لوکاں لئی کٹھی کیتی جان والی امداد بارے وی لوکاں دے دل وچ اِک شک،بے یقینی تے بے وساہی جہئی پئی ہوئی اے کہ خورے ایہ سامان حقداراں تیک اپڑدا وی اے کہ نہیں۔حالانکہ ایس کم وچ محبت،بھرا بندی تے خدا خوفی دا وی جذبہ نال نال شامل اے۔جیہڑا جذبہ بندے نوں ہیرا پھیری تے بے ایمانی کرن توں ہٹکدا اے۔پر ایس دے باوجود وی دِلاں اندر اِک شک جیہا اے۔ایس شک دے باوجود وی ساڈی قربانی تے بھرا بندی دے جذبے اتے ایس شک دا کلیہنا پرچھاواں نہیں پینا چاہیدا۔
سامان اپڑاون والے 100 لوکاں وچوں جے کوئی 10,20 فیصد لوک بیایمانی کردے وی نیں تے ایہ سب اوہناں دی گور گردن تے وے۔ سامان حق داراں تیکر اپڑ وی رہیا اے تے کچھ فیصد نہیں وی اپڑ رہیا اوس وچ کچھ لوکاں دی بدنیتی شامل اے تے کچھ ہڑھ وچ پھسے لوکاں تیک اپڑن توں پہلاں ای کھوہ کِھنج کرکے لٹ لیا جاندا اے۔تے یا پھر کچھ اجیہے علاقے ہیگے نیں جیہڑے ہون تیک پانی وچ پھسے نیں تے اوتھوں تیک کوئی سرکاری یا عوامی امداد نہیں اپڑ سکی۔اجیہے علاقیاں بارے پچھ پچھا کے لبھ کے سامان اپڑاون دی لوڑ اے۔بعض لوک جذبے نال سامان ایتھوں لے تے جاندے نیں پر اوتھے اپڑ کے اپنے آپ نوں سوکھا رکھن لئی نیڑے دے لوکاں تیک ونڈ کے،ایہ سوچ کے پِچھاں پرت آوندے نیں کہ ایتھے کِیہ تے اوتھے کِیہ لینی تے نیکی اے۔لینا تے ثواب ای اے۔جِتھے دِتا اے سامان ایہ وی تے حقدار ای نیں۔پر جیہڑے لوک دور نیں یا ہون تیک جِتھے سامان نہیں اپڑیا اوتھوں تیک اپڑاونا ضروری اے۔نیڑے والے لوکاں کولوں تے سامان والا ہر قافلہ لنگھدا اے، تے نیڑے دے لوک تے ہر کِسے دی نظر وچ نیں۔دور پھسے لوک اصل وچ بوہتے حقدار نیں۔جیہڑے ہون تیک کِسے ہیلی کاپٹر دی نظر وچ وی نہیں آسکے۔حالیہ ہڑھ نوں اِک وڈی پدھر تے تباہی مچاون والا ہڑھ گِنیا جارہیا اے۔تے ملک پاکستان دا تقریبا 10 ارب ڈالر توں ودھ نقصان ہویا اے۔پاکستان سرکار نے 80 ارب روپئے دی رقم ہڑھ نال نقصانے گئے لوکاں لئی وکھری تے اچیچی کر لئی اے۔ایس رقم وچوں ہر گھرانے نوں بے نظیر انکم سپورٹ پروگرام دے ذریعے 25000 ہزار روپے دِتے جان گے۔ایہ رقم سرکاری اداریاں وچ پہلوں توں ای رجسٹرڈ حقداراں دے بینک کھاتیاں وچ سٹی جارہی اے۔
غیر ملکی این جی اوز وی مدد کر رہیاں نیں۔جِتھوں تک گل اے ساڈی ملکی تے عوامی سطح تے اکٹھی ہون والی امداد دی،اوہ ایسراں اے کہ مقامی این جی اوز سامان کٹھا کردِیاں نیں تے اپنا بجٹ بنائوندیاں نیں،ہون والے نقصان تے لوکاں دیاں لوڑاں نوں دھیان نال ویکھیا تے پرکھیا جاندا اے۔تے پھر سامان ونڈن لئی اپنے رضاکاراں توں کم لیا جاندا اے۔ ایدھی، تے جماعت اسلامی دی الخدمت فاونڈیشن تے ہور کئی مقامی این جی اوز ایس ویلے ہڑھ وچ پھسے لوکاں دی امداد لئی کم نوں پورے جذبے تے جنون نال جٹیاں ہوئیاں نیں۔تے ایہناں راہیں امدادی سامان دا حقداراں تیکر اپڑ جانا یقینی گل اے،کیوں جے ایہ تنظیماں عرصے توں کم کررہیاں نیں تے ایہناں تے ہر طرحاں اعتبار کیتا جاسکدا اے۔پاک فوج وی اپنے ذریعے امدادی سامان اپڑا رہی اے،ایہ وی اِک اعتبار کیتا جان والا ملکی ادارہ اے،ایس فوجی ادارے تے اکھاں بند کرکے اعتبار کیتا جا سکدااے،تے اکھاں کھول کے کوئی چاہوے تے جائزہ وی لے سکدا اے،تے اوہدیاں اکھاں کھل جان گِیاں کہ کِتھوں کِتھوں تیک فوجی جوان مشکل نال سامان اپڑا رہے نیں۔باہر دے ملکاں ولوں وی آون والی امداد ایسراں اپڑائی جاندی اے کہ ایہ امداد نیشنل ڈیزاسٹر مینجمنٹ اتھارٹی دے ذریعے ونڈی جاندی اے۔”این ڈی ایم اے”ایس امداد نوں صوبائی ڈیزاسٹر مینجمنٹ تک اپڑاوندا اے۔جیہڑا کہ ایس رقم نوں ضلعی انتظامیہ تیک اپڑاوندا اے،پھرایتھوں اس امداد نوں پِنڈاں تے آبادیاں تیک اپڑایا جاندا آے۔اِنج کرکے لوکاں دا اِک اِک پائی پیسہ اِک نظام دے تحت لِکھت پڑھت کرکے ذمہ داری نال حقداراں تیک اپڑایا جا رہیا اے،تے اوہدا ریکارڈ وی رکھیا جارہیا اے۔کیوں جے ہر اتھارٹی نے کِسے اتلی اتھارٹی نوں تحریری جواب دینا اے۔امداد کرن والے لوک پریشان نہ ہون اوہناں دے دتے گئے سامان دی لِکھت پڑھت کرکے ایمانداری نال حقداراں تیک ایہ ادارے پہنچا رہے نیں۔تے امدادی سامان لئی تھاں تھاں تے لگے ہوئے ہوئے کیمپاں نوں ایجنسیاں اپنے طریقے نال ویکھ واچ وی رہیاں نیں،پئی کِتھوں کِسراں،کون،کِنے کو پیسے یاں سامان اکٹھا کررہیا اے۔تے ایس دے اپڑاون دا طریقہ کِیہ ہیگا اے۔ہڑھ وچ پھسے لوکاں بارے امداد گھلن گھلاون دا کم پوری ایمانداری تے نیک جذبے نال جاری رہنا چاہیدا اے جدوں تیک ہڑھ دے مصیبتی لوک اِک واری پھیر اپنی چھت ہیٹھاں آباد نہیں ہوجاندے۔٭٭