عشرہ شانِ رحمة اللعالمینۖ دی مناسبت نال خطاطی دی نمائش

پنجاب انسٹیٹیوٹ آف لینگویج آرٹ اینڈ کلچر ”پلاک” تے ”ویسکوپی کے” دے اشتراک نال عشرہ شان رحمة اللعالمینۖ دی مناسبت نال نمائش خطاطی دا پربندھ کیتا گیا جو کہ 9اکتوبر 2022تک جاری رہوے گی۔ نمائش دا افتتاح ڈائریکٹر جنرل پلاک ڈاکٹر صغرا صدف نے کیتا۔ ایس موقعے اتے اوہناں نے آکھیا کہ خطاطی مکمل طور تے اک اسلامی آرٹ اے جہدا آغاز وحی الٰہی توں ہوندا اے۔ کاتبین وحی نوں اسلام وچ بہت ای قدر دی نگاہ نال ویکھیا جاندا اے۔ ربیع الاول چونکہ حضورۖ دی ولادت دا مہینہ اے ایس لحاظ نال فن خطاطی دی اہمیت مسلماناں دے نزدیک ہور وی ودھ جاندی اے۔ خطاط اپنے فن پاریاں دے ذریعے اسلام تے حضورۖ نال اپنی والہانہ محبت دا اظہار کردے نیں۔ طارق شریف زادہ نے کہیا کہ سارے فنکاراں نے حضورۖ نال اپنی محبت و عقیدت دا اظہار رنگاں دے ذریعے کیتا۔ دعا اے کہ اللہ تعالیٰ اوہناں نوں اپنا خاص رنگ عطا کرے۔ پاکستان بھر نال تعلق رکھن والے جہناں خطاطاں دے فن پارے نمائش لئی رکھے گئے اوہناں وچ سمیعہ عاصم، جنت عامر، ایمن عرفان، اقصیٰ عابد، نفیسہ نعمان، ثمرہ عمران، ثوبیہ سعید، درخشاں، بریرہ ادریس، ثوبیہ لاریب، شمائلہ راشد، فوزیہ عظمت، شیخ عبدالقادر تے خزیمہ ایاز شامل نیں۔