پلاک تے پاکستان قومی زبان تحریک دی سانجھ نال محفل میلادِ مصطفیۖ

پنجاب انسٹیٹیوٹ آف لینگوئج، آرٹ اینڈ کلچر (پِلاک) تے پاکستان قومی زبان تحریک دے اشتراک نال محفل میلاد مصطفیۖ دا پربندھ کیتا گیا جہدے وچ ملک دے نامور ثنا خوانان مصطفیۖ نے رلت کیتی جد کہ ڈی جی پلاک ڈاکٹر صغرا صدف اُچیچے پروہنے سن۔ محفل دا باقاعدہ آغاز تلاوت قرآن پاک نال کیتا گیا۔ہدیہ نعت سرور کونینۖ پیش کرن والیاں وچ پاکستان دے منے پرمنے نعت خواں عمران شوکت، عمران ہراج شاہد نقشبندی، کامران سانول، سجاد بری، ناصر بیراج تے دوجے شامل سن جد کہ زنانیاں وچ ڈاکٹر بدیع بتول، فوزیہ امیر، نجمہ شاہین، ثوبیہ ناز ایڈوکیٹ ہائی کورٹ میڈم فراح، میڈم یاسمین صاحبہ نے اپنا اپنا کلام پڑھ کے سنایا۔
ڈاکٹر صغرا صدف ڈائریکٹر جنرل پلاک نے آکھیا کہ حضورۖ دا امتی ہون دے ناطے ساڈا فرض اے کہ اسیں آپ دی تعلیمات توں اپنی حیاتی دے سارے شعبیاں وچ رہنمائی حاصل کرئیے۔ اوہناں نے ایس گل دا اعادہ کیتا کہ پلاک ہمیشہ ایسے بابرکت پروگراماں وچ تعاون کردا رہوے گا۔ خاور سلیم آذر نے سیرت النبیۖ اتے چانن پاندے ہوئے آقائے دوجہاںۖ دے اسوہ حسنہ توں آگاہ کیتا تے اوہناں نے آکھیا کہ قربت خداوندی دا واحد بوہا عشق مصطفیۖ اے۔ حضورۖ دی سیرت ساڈے لئی بہترین زندگی گزارن دی راہ اے۔ تقریب دے دوجے شرکا وچ محمد ظفر اُپل صدر نفاذ قومی زبان تحریک، مقصود چغتائی، محمد زکی باصر، محمد عارف، خالد سیال، متا نت بٹ، چوہدری فرمائش لی، کوکب، لقمان صاحب، گل نواز بلوچ شامل سن۔تقریب دے اختتام تے اوہناں نے خصوصی دعا فرمائی۔ اخیر وچ درودوسلام پیش کیتا گیا۔ پروگرام وچ میزبانی دے فرائض خاور سلیم آذر نے سرانجام دتے۔