مولا جٹ دا سیاسی کردار

سعد اللہ شاہ

مری خوشی میں بھی میرا ملال بولتا ہے
جواب بن کے کبھی تو سوال بولتا ہے
کہا تھا میں نے ستارے ہیں میرے گردش میں
کہ میرے ہاتھ میں زہرہ جمال بولتا ہے
سانوں تعصب نے خانیاں وچ ونڈ دتا اے ساڈا مزاج تے ساڈی انا ساریاں تے بھاری اے۔ کوئی وی نہ دلیل نال گل کردا اے تے نہ دلیل سن دا اے تے سمجھدا اے کہ طاقت تے دھونس توں وڈی دلیل کوئی نہیں۔ جتھے بردباری تے وضعداری دا گزر نہیں پر آپس وچ اوہ اکھاں بند رکھدے تے دل کھلے:
محبتوں میں تعصب تو در ہی آتا ہے
ہم آئینہ نہ رہے تم کو روبرو کر کے
ہر پاسے اک آویزش نظر آندی اے۔ ہن ایہناں دی لڑائی کنک تک آ گئی اے۔ اوہو کنک جہدے توں خمار کنک دی ترکیب بنی اے تے اوہو کنک دا دانا جہنوں کھان دی پاداش وچ حضرت آدم تے اماں حوا نوں جنت چوں کڈھیا گیا۔ ایس کنک دی محبت حضرت انسان دے دل چوں نہیں نکلی۔ ایس کنک نوں پنجاب ای نہیں ایس دھرتی نال بڑی نسبت اے ایسے مناسبت نال ایتھے گندمی رنگ عام ہویا۔ کہنا میں چاہنا واں کہ اوہو کھانے پینے دیاں لڑائیاں کنک تے بہانہ اے نہیں تے کسے نوں نہیں پتہ پچھے دو ادوار وچ کیویں پہلے اپنی اعلیٰ کنک باہر گھلی گئی تے سبسڈی دتی گئی فیر گھٹیا کنک دوبارہ واپس منگوائی گئی۔ کسے نوں شرم محسوس نہیں ہوئی ہن فیر گلاں ہون لگیاں نیں کہ شیر آٹا کھاندا اے آٹا ریکارڈ مہنگا ہویا۔ چپاتی تے نان وی’ اصل وچ کسے تے کسے دی کوئی گرفت نہیں۔ ساریاں توانائیاں مرکز وچ حکومت نوں بچان لئی صرف ہو رہیاں نیں تے مخالفین دا سارا دھیان مرکز نوں گران ول اے۔ عوام تماشا ویکھدے آپ تماشا بن گئے نیں:
تم اٹھائو نہ ہمیں رہنے دو
اس تماشے میں تماشائی بھی
لوکاں دا دھیان لانگ مارچ ول اے تے ایہنوں روکن دی استدعا سپریم کورٹ نے رد کر دتی اے تے ہن ایس لانگ مارچ نوں کون روک سکدا اے پر ہاں جے غیرمعمولی صورتحال پیدا ہوئی تے عدالتاں چھٹی والے دن وی کھلن گئیاں۔ ہن اینی جرأت ساڈے وچ تے ہے نہیں کہ ایس لاجواب فیصلے تے اپنی رائے دئیے۔ ہو رہے گا کچ نہ کچھ گھبرائیں کیا:
پہلے پہل کا عشق ابھی یاد ہے فراز
دل خود یہ چاہتا تھا کہ رسوائیاں بھی ہوں
سانوں تے عمران خان دے بیان نال کہ گورنر سندھ تے مولاجٹ وچ کوئی فرق نہیں اپنے دوست ناصرادیب یاد آئے کہ اوہ ماشاء اللہ نویں مولاجٹ لکھ چکے نیں اوہ ساڈی باوقار سیاستدان آمنہ الفت دے میاں نیں مولاجٹ اوہناں دی پچھان بن چکی۔ ایہدے وچ مولاجٹ دا گنڈاسا وی بڑا اہم اے نوری نت دا کردار وی امر ہو چکیا پر ایس ویلے مولانا جٹ کون بنیا ہویا اے دسن دی لوڑ نہیں فی الحال میں مولاجٹ دے اک ڈائیلاگ دا تذکرہ کرنا اے کہ ناصرادیب صاحب نے دسیا کہ جدوں میںایہ ڈائیلاگ مصطفی قریشی توں سلوایا کہ جہڑے گجدے نیں اوہ وسدے نہیں تے ایس محاورے نوں جواب وچ توڑنا سوکھا نہیں سی۔ تن گھنٹے لگے کوئی ایہ ڈائیلاگ بولدا جاندا تے آخر جواب ذہن وچ آ گیا جے وس پیا تے نک نک ڈب جاویں گا ہن لوک کسے دے وسن دے انتظار وچ نیں تے دوجے پاسے مسئلہ ای نک دا اے کہ اوہنو ںبچانا اے۔ انج سچی مچی اک جنگ ورگا سماں لگدا اے جنگ وی مغلیہ دور دی کہ بادشاہ اسلام آباد وچ اپنے ساتھیاں سنے محصور اے جہنوں توپچیاں نے گھیریا ہویا اے پہلے تے قلعے دے آل دوالے فصلاں اگدیاں سن اج کل کنٹینرز نیں سگوں گل ایس توں وی اگے ودھ گئی اے ایہ وی شکر اے کہ ربڑ دیاں گولیاں چلن گئیاں کہ وقتی طور تے کوئی فعال نہیں رہوے گا نہیں تے حملہ آور نوں لاشاں مل جان تے مقصد پورا ہو جاندا اے۔ انج نہ ہووے کہ فوج نوں حرکت وچ آنا پوے تے ایس ویلے حالات ایہدی اجازت نہیں دیندے لگدا نہیں کہ فوج جو اپنا امیج ایس ویلے تک بنان وچ کامیاب ہوئی اے اوہنوں خراب کر لوے۔
ہن اک دو چھوٹیاں چھوٹیاں گلاں اک تے اعتزاز احسن صاحب دے حوالے نال کہ اوہ موجودہ فیصلیاں تے لاٹھی چارج کردے نظر آئے فیر اوہناں دے بارے افواہ کہ اوہ پی ٹی آئی وچ شامل ہو رہے نیں اوہناں نے دانشمندی نال ایس گل نوں افواہ ای قرار دتا کہ اوہناں نوں تے پرویزمشرف نے پیپلزپارٹی چھڈن دے بدلے وزارت عظمیٰ دی آفر کیتی سی واقعتاً اوہ مزاجاً وی پیپلزپارٹی وچ ای جچدے نیں۔ اوہناں نے چنگا کیتا نہیں تے اوہناں دا حشر وی جاویدہاشمی توں زیادہ نہ ہوندا فیر چوہدری نثار وانگوں مارے جاندے ساڈے ایتھے اک وقت اجیہا آندا اے کہ کوئی کردار پارٹی توں وڈا بنن دی کوشش کردا اے تے اوہ کدھرے دا نہیں رہندا۔ جماعت اسلامی چوں نکلن والے اپنا تشخص نہیں بنا سکے کسے حد تک ڈاکٹر اسراراحمد عملیت ول آ کے کامیاب ہوئے پر اگے نہ ودھے۔ ہن مولانا فضل الرحمن نوں چھڈن والے وی دوجیاں لئی ایندھن ای بن سکے۔ سانوں تے اعتزاز احسن تے چوہدری نثار اسمبلی وچ لڑدے ہوئے چنگے لگے سن چوہدری دا غصے نال لال پیلا ہونا تے اعتزاز احسن دا شعراں نال مزین خطاب ایہ لوک چنگے سن ایہدے بعد تے سطح قادرپٹیل تے مراد سعید تک آ گئی۔ پورا معاشرہ ای زوال پذیر اے گالھاں دا کلچر عام اے ایس لئی کسے دی وی عزت محفوظ نہیں۔
کمزور کی نہیں ہے یہاں کوئی زندگی
بیکار کی ہیں چیزیں یہاں علم و آگہی