سائبان ویلفیئر سوسائٹی وَلوں محمد اقبال اختر دی کتاب تیریاں گلاں دی تقریب رونمائی تے محفلِ مشاعرہ دا پربندھ

سائبان ویلفیئر سوسائٹی رجسٹرڈ دے پربندھ ہیٹھ ای لائبریری ہال جناح سٹیڈیم گوجرانوالہ وچ ایڈیشنل سپرنٹنڈنٹ سنٹرل جیل گوجرانوالہ محمد اقبال اختر دی کتاب ”تیریاں گلاں” دی تقریب رونمائی تے مشاعرے دا آہر کیتا گیا۔ تقریب دی صدارت ملک دے منے پرمنے شاعر ڈاکٹر سعید اقبال سعدی نے کیتی جد کہ نظامت دی ذمہ داریاں عتیق انور راجہ نے ادا کیتیاں۔ حمزہ قیوم تے احمد بٹ نے تلاوت قرآن جد کہ عتیق انور راجہ نے نعت پیش کرن دی سعادت حاصل کیتی۔ تقریب دے پہلے حصے وچ کتاب تیریاں گلاں اتے سیف بھٹی’ نائلہ بٹ’ ادریس ناز’ محمد اقبال اختر تے ڈاکٹر سعدی نے ایس خوبی نال اظہار کیال کیتا کہ ہال مقرر ‘ تالیاں’ مسکراہٹاں تے واہ واہ نال گونجدا رہیا۔ مصنف کتاب محمد اقبال اختر نے آکھیا مینوں پتہ نہیں سی کہ گوجرانوالہ وچ لوک ایس قدر ادب نواز نیں تے جہناں نال کدی ملاقات وی نہیں جہناں دے کول کجھ دن پہلاں ای کتاب پہنچائی گی اوہناں ولوں کتاب اتے ایس شاندار انداز وچ تبصرہ کیتا جاوے گا۔ میں آکھاں گا کہ گوجرانوالہ دے شہریاں نے مینوں اپنا مقروض بنا لیتا اے۔ عتیق انور راجہ حقیقی معنیاں وچ اپنی زبان’ روایتاں تے ثقافت دے فروغ لئی کم کر رہے نیں۔ حاضرین دا کہنا سی کہ عتیق انور راجہ ہمیشہ لوکاں نوں عزت دین دی کوشش کردے نیں۔ ایہو وجہ اے کہ اوہناں دی تقریباں وچ ادیب’ شاعر تے سماج دے دُوجے شعبیاں توں لوکاں دی وڈی تعداد رلت کردی اے۔ عتیق انور راجہ نے کہیا کہ سائبان نویں لکھن والیاں لئی اک ایسا پلیٹ فارم اے جتھے ہر کسے نوں موقع دتا جا رہیا اے کہ اوہ سٹیج اتے آئے تے اپنی صلاحیتاں نوں ثابت کرے۔ ایڈیشنل ڈپٹی کمشنر شبیر بٹ نے آکھیا کہ سائبان دی کوششاں دے معترف آں۔ ایہہ لوک حقیقی معنیاں وچ اپنی زبان’ روایتاں تے ثقافت دے فروغ لئی کم کر رہے نیں۔ پیر اشرف شاکر’ سعید احمد تاج’ چوہدری شاہد تے صدر سائبان عتیق انور راجہ دا کہنا سی کہ اج جدوں ہر پاسے جرماں دی شرع بہت زیادہ ودھ چکی اے ۔ نوجواناں نوں ادبی تے ثقافتی محفلاں نال جڑے معاشرے نوں پرامن بنایا جا سکدا اے۔ والدین’ استاد تے معاشرے دا ہر فرد موبائل فون دے بے جا استعمال توں پریشان اے لیکن کوئی وی ایس موذی وبا توں جان چھڈان دا حل سامنے نہیں لیا سکیا اے لیکن ایہدا حل اے تے اوہ کہ بوہتا کھیڈاں دے میدان بنائے جان۔ نوجواناں نوں مصروف رکھن لئی اوہناں دے درمیان صحت مند مقابلے کروائے جان۔ معیاری فلم تے تھیٹر توں شہریاں نوں سستی تفریح پہنچان دا انتظام کیتا جاوے۔ مقررین دا کہنا سی ایسی محفلاں توں اک بہتر معاشرے دا حصول ممکن اے تے تسلسل نال ادبی تے ثقافتی محفلاں سجان تے سائبان ٹیم مبارکباد دی مستحق اے۔ شعرا کرام وچ افتخار شاہد،دلشاد احمد،لیاقت قندیل،امجد شہزاد،مطلوب حسن،جاوید ساغر،سر فضل الرحمن،اصغر رحمانی،عامر رفیق عامر،نوشین نوشی،روبینا ناز،راحت ثمر،سلیم مرزا،ربیعہ سلیم،وحید احمد انصاری،فرحانہ عنبر تے دُوجے شامل سن۔چوہدری طاہر جاوید،شیراز افضل مغل،راجہ افضال عزیز،رانا عثمان،شیخ انعام چاندی والا،عبداللہ،یعقوب مغل،رفاقت حسین تے چیف آرگنائزر خرم شہزاد بھٹہ پروہنیاں دے استقبال تے مہمان داری وچ پیش پیش رہے۔