حالات دی سختی تے کسان پیکج
سعد اللہ شاہ
یہ دیکھا ہے جو باتیں ہوں چھپانے کی
وہی ہوتی ہیں لوگوں کو بتانے کی
بہت بے چین رہتا ہوں سکون میں بھی
کوئی تدبیر ہو فتنہ جگانے کی
چلو اسیں کوئی عام جہی گل کر لینے آں۔ اک سوچ ایہہ وے کہ جو کجھ ہونا اے ہو کے رہوے گا گھابرن دی کہڑی لوڑ اے پر آنگن تے اپنا اے بربادی ویکھی نہیں جاندی۔ کسے دے کول فخر والی کوئی گل نہیں۔ کسے گملے وچ اگے ہوئے پودے نہیں کہ ہر زمین وچ لگ جان۔ جے لگ وی جان تے اوہناں دی دیکھ بھال ضروری اے۔ ایہ پودے وی پرندیاں وانگوں ہوندے نیں۔ گھر وچ طوطے دی مثال دے دیواں تے برداشت کیتی جا سکدی اے کہ ایہو طوفا فال وی کڈھدا اے تے توپ وی چلاندا اے تے سب توں وڈی گل کہ جو تسیں سکھائو اوہ سکھ وی جاندا اے تے اکثر اوقات تے گھر والیاں دیاں گلاں سن کے کجھ گلاں اچک لیندا اے تے احتیاط ضروری اے۔ کہن دا مطلب ایہ وے کہ کندھاں نوں وی کن ہوندے نیں تے مکین نہ ہووے تے مکان بولدے نیں۔ پتہ نہیں میں اپنی گل دا ابلاغ کر پایا واں کہ نہیں کہ اوہو گل کہ ایک کہنی ہے ایک چھپانی ہے۔ یہ میرے عہد کی کہانی ہے۔ کیہ کریئے سیلاب نال متاثرہ لوک اجے تک ڈرائونے خواب ویکھدے نیں۔ بیماریاں وچ مبتلا نیں پر ہن اوہ خبراں توں دور نیں شہر اقتدار وچ بھج نس لگی ہوئی اے کنٹینرز نیں۔ تسیں اوہناں نوں فصیلاں کہہ لوو۔ پورے ملک وچ اک ہیجان ورگی کیفیت اے۔ کوئی پتہ نہیں کہ کیہ ہون والا اے۔ ایسی ابتری تے بے چینی کہ بس۔
اک پاسے عمران خان صاحب بریک تھرو دے چکر وچ سارے حیلے تے طریقے ازمائے جا رہے نیں۔ کدی کہیا جاندا اے کہ لانگ مارچ مکمل پرامن ہووے گا فیر جدوں چوتھے دن جدوں اگے ودھے تے کہیا گیا کہ پرامن انقلاب دا راہ اے یاں خون ریزی دا۔ ایس گل تے یکایک فیصل واوڈا دی پیش گوئی نوں پر لگ گئے تے اوہ بندہ جیویں پی ٹی آئی چوں کڈھ دتا گیا فیر موضوع بن گیا تے ہن واوڈا صاحب کہہ رہے نیں کہ میں پالیسی دی گل کیتی سی۔ جو میں ذرا پہلے کر گیا تے خان صاحب نے بعد وچ کیتی۔ ظاہر اے خان صاحب دا انتخاب دا مطالبہ اے تے اوہناں نوں سوٹ کردا اے جد کہ ن لیگ گرم پانیاں وچ اے تے نوازشریف دا پیغام آ چکیا اے۔ سانوں ہاسا وی آندا اے تے نوازشریف اوتھے بیٹھے زور لا رہے نیں۔ میدان عمل وچ آپ اترن تے پتہ لگے۔ اک ہور فیصلہ جو ن لیگ کر چکی اے حالات خراب کرن وچ خوب مددگار ہووے گا کہ اوہناں نے ملک بھر وچ جلسہ کرن دا فیصلہ کیتا اے۔ جلسے ہون گے تے جلوس وی ہون گے۔ دوجے لفظاں وچ ٹکرائو وی ہو سکدا اے۔
لگدا اے ن لیگ دے شک شبھے ودھدے جا رہے نیں اوہ وی پریشر پیدا کرن دا سوچ رہے نیں۔ کنے لطف دی گل اے کہ سچ کدھرے اک پاسے کھڑا ہس رہیا اے کہ لڑن والیاں دوویں پارٹیاں حق تے ہون دا دعویٰ کر رہیاں نیں۔ دوہاں دا بیانیہ وی اک اے۔ دوہاں نوں ووٹ نوں عزت دین دی گل تے گامزن اے اوہناں نوں ووٹر تے ذرا وی اعتماد نہیں کہ اوہ اپنے منہ چوں اعتراف کر چکے نیں کہ طاقت دا سرچشمہ کدھرے ہور اے۔ وچارے سراج الحق اپنی عقل وکھرے توں جمائے ہوئے نیں پر ایہناں دیوانیاں دا اقتدار دیاں راہداریاں توں گزر ممکن نہیں۔ اوہ جو کجھ کہہ رہے نیں اوہ وی نواں نہیں کہ ساریاں نوں کدھرے نہ کدھرے پلانٹ کرکے پالیا پوسیا گیا۔ ایہ کمال دی گل اے کہ جس بچے دا فیڈر چھٹدا اے اوہ بلکن لگدا اے تے ہتھ پیر ماردا اے۔ اجہی حقیقت توں انکار نہیں کر سکدا کہ جھگڑا ایہو اے کہ سانوں تخت تے بٹھایا جاوے۔ مخالف تے چور ڈاکو نیں اوہناں نال تے مذاکرات وی نہیں ہو سکدے۔ ہن اک مثبت تبصرہ وی ہو جاوے یعنی مثبت اقدام تے۔
تسیں ایس فیصلے نوں پریشر دا اثر کہہ لوو یاں کجھ ہور پر وزیراعظم شہبازشریف نے کساناں نوں وڈا پیکیج دتا اے کھاد دی بوری 2500 روپیے سستی کیتی تے بجلی 13 روپیے فی یونٹ۔ ساڈا ملک اک زرعی ملک اے۔ وچارے کسان ساڈے لئی محنت کردے نیں۔ چنگا کیتا کہ اوہناں لئی سبسڈی لئی 30 ارب روپیے رکھے گئے نیں۔ تہانوں یاد ہووے گا کہ اک واری آلو دی فصل ہوئی تے آلومارکیٹ وچ ایناں سستا ہو گیا کہ اوہناں دے خرچے وی کیہ ترسیل دے خرچے وی پورے نہیں سن ہو رہے تے اوہناں نے مناں مونہیں آلو نہراں وچ روڑھ دتے۔ ساڈی تے دعا اے کہ ملک وچ امن و آشتی ہووے’ خشحالی آوے ایہ جہڑے لوک اک اذیت وچ نیں کہ حالات سدھر ای نہیں رہے کاش ایہ دبائو چوں نکل جان۔ کیہ کریئے ایس توں پہلاں کرونا آیا فیر سیلاب تے ہن ایہ اقتدار دی جنگ۔ ہن تے مارشل لاء دیاں گلاں ہون لگ پئیاں نیں تے ایس گل تے افسوس۔ تسیں فیر اوہو دور ویکھنا چاہندے او جو ضیاالحق تے مشرف دا سی۔ مارشل لاء کسے وی ملک لئی فائدہ مند نہیں ہو سکدا۔ فوج دا کم سرحداں دی راکھی اے تے ایس حوالے نال اوہ سب توں اہم ادارہ اے لوک اپنے خون پسینے دی کمائی دا وڈا حصہ اوہناں دی نذر کردے نیں کہ اوہ دشمن توں بے نیاز ہو کے چین نال حیاتی گزار سکن۔ ساڈی فوج تے بہت زیادہ قربانیاں وی دے چکی اے۔٭
