گُنی گیت کار اخترکاشمیری

اختر کاشمیری بورڈ آف ریونیو وچ ملازم سن۔ اودوں اوتھے منظور وزیر آبادی تے اسلم رانا (بعد وچ ڈاکٹر) وی ملازم سن۔ اختر کاشمیری نال اوہناں دے دفتر تے گھر (مصری شاہ) مشاعریاں وچ وی ملاقاتاں ہوئیاں۔ بعد وچ اوہناں مصری شاہ والا مکان ویچ کے گلشن راوی شفٹ ہو گئے۔ اختر کاشمیری ہوراں دا اک بیٹا آزاد اے۔ جیہڑا قالیناں دا کاروبار کردا اے۔ اوہناں ”پنجابی ادبی پرہیا” دے ناں تے اک تنظیم بنائی سی۔ جس دے ہیٹھ اوہناں کئی پنجابی کتاباں وی چھاپیاں۔ ایس تنظیم نوں پنجاب سرکار ولوں گرانٹ مل دی سی۔ اختر کاشمیری پنجابی ادبی سنگت وچ وی اکثر تشریف لیاندے۔ 1971ء توں 1974ء تک سنگت دا میں سیکرٹری رہیا ہاں۔ ایس دوران اختر ہوراں بعض اجلاساں دی صدارت تے بعض اجلاساں وچ اپنی غزل تنقید لئی پیش کردے رہے۔ اختر کاشمیری ہوراں نے غزلاں دے نال نال گیتاں راہیں دی اپنا ناں تے تھاں بنایا۔
اخلاق عاطف نے اپنی کتاب ”گیتاں دی گونج” وچ لکھیا اے، ”اختر کاشمیری اجیہے گُنی گیت کار سن، جنہاں دے گیتاں اندر ادبی چاشنی، پنجابی وسوں دے جھلکارے تے لوکائی دے من اندر مچلدے جذبیاں دا ان جھک اظہار، خاص طور تے اگھڑویں ہوندے سن۔ ریڈیو پاکستان لئی ان گنت گیت لکھے۔ ڈھیر گیتاں نے مقبولیت دی موج مانی۔ اللہ ہی اللہ کریا کرو، خالی دم نہ بھریا کرو۔۔۔ دشمن اج للکاریا، ساڈے دیس دے جان نثاراں نوں۔۔۔ جھوٹھ بولنی ایں جھوٹھئیے آکاش وانیے۔۔۔ اختر کاشمیری دے یادگار گیت نیں۔
رنگلیاں رُتاں تے بولدا پتھر ورگے معیاری شعراں پراگیاں دے ایس تخلیق کار کولوں پنجابی فلم سازاں نے تھوڑا جیہا فکری چانن حاصل کیتا۔” (جاری اے)

خاص طور تے اگھڑویں ہوندے سن۔ ریڈیو پاکستان لئی ان گنت گیت لکھے۔ ڈھیر گیتاں نے مقبولیت دی موج مانی۔ اللہ ہی اللہ کریا کرو، خالی دم نہ بھریا کرو۔۔۔ دشمن اج للکاریا، ساڈے دیس دے جان نثاراں نوں۔۔۔ جھوٹھ بولنی ایں جھوٹھئیے آکاش وانیے۔۔۔ اختر کاشمیری دے یادگار گیت نیں۔
رنگلیاں رُتاں تے بولدا پتھر ورگے معیاری شعراں پراگیاں دے ایس تخلیق کار کولوں پنجابی فلم سازاں نے تھوڑا جیہا فکری چانن حاصل کیتا۔”
اختر کاشمیری یکم اکتوبر 1918ء نوں لاہور وچ پید اہوئے۔ اوہناں دے پیو دادا لاہور دے وسنیک سن۔ گورنمنٹ پرائمری سکول شاہ عالم گیٹ توں پرائمری تے اسلامیہ ہائی سکول بھاٹی گیٹ توں میٹرک پاس کیتا۔ اوہناں دے سکول دے ساتھیاں وچوں نذر محمد، گل محمد (کرکٹرز) تے ہادی علی شاہ (سابق میئر لاہور میونسپل کارپوریشن) شامل سن۔
ایہناں دا اصل ناں محمد طفیل اے۔ 1954ء وچ اپنا ناں شاعری پاروں اختر کاشمیری رکھ لیا۔ اختر کاشمیری نے نویں جماعت توں شاعری شروع کر دتی۔ سب توں پہلی نظم ”بسنت” لکھی جیہری ”پرتاپ” اخبار وچ چھپی۔ اختر کاشمیری ہوراں نے اک ملاقات وچ مینوں دیسا سی کہ اوہناں نے وڈے شاعراں دا کلام مشاعریاں وچ سنیا: مثلاً حفیظ جالندھری، استاد جگر، احمد ندیم قاسمی، احسان دانش، قتیل شفائی۔
پنجابی وچ استاد دامن، استاد عشق لہر، بابو کرم، استاد ہمدم تے عبدالکریم ثمر نوں سنیا۔ اوہ زیادہ متاثر حفیظ جالندھری تے استاد دامن توں ہوئے۔
سکول دے زمانے ہی توں اوہناں نوں پنجابی دے نال نال اردو تے فارسی نال کافی لگائو سی۔
بچپن ہی توں اوہ موسیقی دیاں محفلاں وچ جاندے سن ایس پاروں موسیقی نال اوہناں نوں کافی شوق رہیا تے فیر گیت لکھے۔
اختر کاشمیری دی اک غزل اے۔
اک سُوھے نے اج سُوہ لا کے
مینوں خبر پچائی اے
اوہدے پیار دی کجھ بدنامی
میرے سر وی آئی اے
اوہدا میرا تک ورتارا
جگ نے ایہہ گل آکھی اے
اک نرا سودائی اے
تے اک نرا ہرجائی اے
اوہنوں سوچاں وچ بلا کے
جو کہنا کہہ لینا واں
اوہدی بے پروائی ایتھے
نہ کوئی اکھ پرائی اے
جیہدیاں راہواں تکدیاں
اک جھلّے دی اکھ پتھرائی سی
ہن کیوں ٹُٹی قبر تے بہہ کے
اوہنے ونگ چھنکائی اے
لکھ لُکاء ہاسے وچ اختر
ہاواں آخر ہاواں نیں
عشق دی گل نہ گجھی رہندی
عشق نری رسوائی اے
اختر کاشمیری فروری 1992ء نوں وفات پاگئے۔ اختر کاشمیری دی اک غزل دا مقطع اے۔
اختر میرے پچھوں جگ نوں
حق دی گل سی کہنی پئی
اوہنے دنیا وچ کیہ کھٹیا
روٹی دا ونجارا سی