غلط پچھان یاں ٹارگٹ کلنگ

ارشدشریف دے قتل دے ذمہ دار کیہ کٹہرے وچ آ سکن گے؟ ایہ سوال ہر اوس بندے دی زبان اُتے اے جو ارشد شریف دے قتل تے دکھی اے۔ پاکستان وچ سیاسی مخالفت نوں دشمنی تک لے جایا جاندا اے۔ سیاستداناں دے وچکار دشمنیاں سیاسی مفادات دی خاطر ہوندیاں نیں۔ سیاست وچ فائدے لی دوستی دشمنی وچ بدلدے تے دشمنی دوستی وچ ڈھلدے دیر نہیں لگدی۔ سیاستداناں دے حمایتی وی ایسے ڈگر تے چلدے نیں۔ میڈیا وی تقسیم اے۔ ارشد شریف دا وی اک سیاسی نکتہ نظر سی۔ اج کل ایس نکتہ نظر دے لوک زیرعتاب نیں۔ ارشدشریف تے ڈیڑھ درجن دے نیڑے مقدمے سن۔ اوہناں دے گرفتاری دے وارنٹ جاری ہوئے۔ کئی کیساں وچ اوہ عدالت وچ پیش ہوندے رہے ضمانتاں وی کرائیاں۔ کئی دوجے صحافیاں تے وی مقدمے سن۔ اوہناں وچوں کجھ نوں گرفتار کیتا گیا۔ ارشد شریف دے حوالے نال تھریٹ الرٹ وی جاری ہویا تے اوہ ملک چھڈ گئے۔ اوہناں نوں 23اکتوبر نوں کینیا وچ شاہراہ تے پولیس نے سر وچ گولیاں مار کے مار دتا۔ کینیا دی پولیس نے منیا اے کہ غلط پچھان دی وجہ نال پاکستانی صحافی دا قتل ہویا۔ کینیا دے ای حکام نے ایہ وی کہیا کہ ارشدشریف دا پچھا پاکستان توں آئے گینگ وی کر رہے سن۔
ایس طرح ارشدشریف دے قتل دے کھرے مٹدے ہوئے نظر آ رہے نیں۔ قتل کوئی وی کسے نے وی کیتا ہووے۔ قاتل جناں وی ذہین ہووے قتل دا سراغ ضرور چھڈ جاندا اے۔ جے قتل اخفا وچ رہ جاندا اے قاتل ننگا ہون توں جے بچدا اے تے اوہدی اک وجہ ناقص پراسیکیوشن تے دوجی وجہ قاتل دا طاقتور ہونا اے۔ لیاقت علی خان’ جنرل ضیاء الحق تے بینظیر بھٹو دے قاتل موخرالذکر وجہ نال سامنے نہیں آ سکے۔ ارشدشریف دا قتل حادثاتی وی ہو سکدا اے پر پاکستان وچ جس طرح ایس قتل تے ردعمل آیا خاص طو رتے جو اقدامات اٹھائے گئے اوہناں نال معاملہ مشکوک ہو گیا۔ فیصل واوڈا دی ایس کانفرنس دا کیہ مقصد سی۔ کجھ لوکاں ولوں اپنیاں صفائیاں پیش کیتیاں گئیاں تے سیاسی مقصد لئی الزامات وی لائے گئے۔ حکومت نے اک کمیٹی بنا دتی جہدے وچ پہلے آئی بی تے ایف آئی دے نال آئی ایس آئی دا نمائندہ وی شامل سی جہنوں فوج ولوں واپس سد لیا گیا۔ ایہدے نال باقی کمیٹی دی ساکھ بالکل ای ختم ہو گئی۔
ارشدشریف دے قتل وچ کہڑے لوک ملوث نیں ایہدا تعین صرف اک ای صورت وچ ہو سکدا اے کہ تحقیقات یو این کرے۔ پاکستان توں جان والی کمیٹی نال کینیا حکومت اپنی مرضی دے مطابق گل کرے گی۔ ایس توں علاوہ مجرماں تک اپڑن دا کوئی طریقہ نہیں۔
دوستو: میں آپ وی اک انٹرنیشنل انوسٹی گیشن ادارے نال ستائی ورھے تک منسلک رہیا۔ جے اسیں ارشدشریف کیس دی ٹیکنیکل بنیاداں تے چھان بین کریے تے میرے سامنے ایہ اک حل شدہ کیس اے تے میں اپنے تجربے دی وجہ نال کہہ سکنا واں کہ ایس قتل دے پچھے کہڑے تے کیہ محرکات چھپے نیں۔ پچھلے دیہاڑے ڈی جی آئی ایس آئی تے ڈی جی آئی ایس پی آر دی پریس کانفرنس نوں ذہن وچ لیا کے سنو تے واضح ہو جاندا اے کہ ایس کیس دے پچھے گھٹو گھٹ اسٹیبلشمنٹ دا کوئی خاص رول نہیں پر ایس کیس دی مماثلت بینظیر بھٹو دے بھائی تے ذوالفقارعلی بھٹو شہید دے بیٹے میرمرتضیٰ بھٹو شہید دے ٹارگٹ کلنگ ورگی اے۔ تہانوں یاد ہووے گا کہ میرمرتضیٰ بھٹو نوں وی قتل کروان لئی کراچی پولیس دا انتخاب کیتا گیا تے فیر ایس قتل وچ نامزد تے ملوث ایس ایچ او نوں وی بعد وچ بڑی صفائی نال راہ توں ہٹا دتا گیا تے ایہ کیس بظاہر لوکاں دی نظر وچ اک حل شدہ کیس اے پر حتمی ثبوت مٹا دین دی وجہ نال اج تک ایس کیس دا فیصلہ نہیں ہو سکیا تے بالکل ایہدے نال ملدے جلدے طریقے نال پولیس دے راہیں ای ارشدشریف نوں شہید کروایا گیا یعنی میرمرتضیٰ بھٹو تے ارشدشریف لئی اکو جیہا طریقہ استعمال کیتا گیا۔
دوستو! اج وی ایس واردات وچ ملوث بنیادی کرداراں نوں شامل تفتیش کیتا جاوے تے ددھ دا ددھ تے پانی دا پانی نکل آوے گا۔ ایہ قنون قدرت اے کہ قتل دا خون کدھرے نہ کدھرے بول پیندا اے تے بس قاتل اینی ای دیر لئی محفوظ ہوندا اے۔ ارشدشریف دے کیس وچ وی لوکاں نوں میڈیا دے راہیں وکھووکھ سٹوریاں سنائیاں جاندیاں رہیاں تاں جے لوکاں دی رائے تقسیم کیتی جا سکے۔ مینوں پورا یقین اے کہ ارشدشریف دے قتل کیس دی انوسٹی گیشن کسے بین الاقوامی ادارے توں کروائی گئی تے ایہ انھا قتل کجھ دیہاڑیاں وچ ای اپنے قاتلاں نوں پچھان لوے گا جے ایس کیس نال کھلواڑ کیتا گیا تے کنفیوژن پیدا کیتی گئی تے ایہ کیس وی ماضی وچ ہون والے دوجے کیساں وانگوں حل نہیں ہو سکے گا۔ بقول مومن خاں مومن:
الجھا ہے پاں یار کا زلفِ دراز میں
لو! آپ اپنے دام میں صیاد آ گیا