شہر علی پور چٹھہ تحصیل بن گیا

جدوں کوئی کم ہونا ہوندا اے اللہ تعالیٰ ولوں آسانیاں پیدا ہون لگدیاں نیں تے کئی سالاں توں وِگڑے تے رکے ہوئے کم وی چھیتی ہون لگدے نیں۔ ساڈے علاقے دے شہریاں دا سب توں وڈا مطالبہ سی کہ علی پور چٹھہ نوں تحصیل دا درجہ ملنا چاہیدا اے۔ ماضی وچ جناب احمد چٹھہ دے والد محترم حامد ناصر چٹھہ توں لے کے علی پور چٹھہ دے منے پرمنے سیاستدان سیف علی چٹھہ تے اوہناں دے پتر اکمل سیف چٹھہ ایس علاقے توں منتخب ہوندے رہے تے اوہناں دی کوششاں نال علی پورچٹھہ نوں سب تحصیل دا درجہ ملیا۔ وقت بدلیا آبادی ودھی تے پچھلے کئی سالاں توں ایہہ مطالبہ بوہتا زور پھڑن لگیا کہ علی پور چٹھہ نوں تحصیل دا درجہ ملنا چاہیدا اے کیوں جے آسے پاسے سارے پنڈ ایس شہر نال آ کے رلدے نیں تے وزیرآباد دور پیندا اے۔ ایس طرحاں ایس شہر دے لوکاں نوں بنیادی سہولتاں وی بہتر طریقے نال مل سکن گئیاں۔ایہدے تے سب توں زور آور آواز نوجوان اخلاق حیدر چٹھہ نے کجھ سال پہلے بلند کیتی تے اوس اک مطالبے اتے علی پور چٹھہ دے اکثر نوجواناں نوں اکٹھا کیتا ایس توں علاقہ نوں شعور ملیا کہ آخر تحصیل دا بننا انا ضروری کیوں اے کئی لوکاں نے ساتھ دتا۔ پریس کلب علی پور چٹھہ’ سید مستجاب زیدی دی قیادت وچ اوہناں نوجواناں دی آواز بن گیا۔ کئی لوکاں نے مذاق وی بنایا تے کئی لوکاں نے نال نہ ہوندے وی ایس مطالبے نوں حق جانیا تے ایس مطالبے وچ شدت آندی گئی کیوں جے جدوں حق لئی اک آواز اٹھدی اے تے کئی آوازاں اُچیاں ہون لگدیاں نیں۔ ایہدے تے اسیں دامے درمے سخنے اپنی تحریراں وچ گل کیتی۔ ایس طرحاں ایہہ آواز مقامی سیاستداناں تک وی پہنچی جہناں نوں علم تے پہلے وی سی مگر ہن ایہہ آوازاں ایس شدت نال اوہناں تک پہنچیاں کہ اوہناں نوں یقین ہو گیاکہ جے ایس واری تحصیل نہ بنی تے اگلے سال عام انتخابات دا سال اے تے فیر ووٹ لینا وی اوکھا ہو جاوے گا تے ایہدے تے سب توں وڈی آسانی ایہہ رہی کہ پرویزالٰہی دی قیادت وچ پنجاب بھر وچ نویں اضلاع تے تحصیلاں دے بنن دی منظوری دتی گئی۔ ایہدے مگروں کسے وی طور علی پور چٹھہ جئے وڈے شہر نوں فراموش کرنا ممکن نہیں رہیا ایس سلسلے وچ نوجوان سیاستدان محمد احمد چٹھہ نے وی پچھلے کجھ مہینیاں وچ بھرواں کم کیتا تے اہل علاقہ دی آواز وزیراعلیٰ پنجاب تک پہنچائی۔ اوہناں نال اخلاق حیدر چٹھہ’ مزمل ثنااللہ تے ابراہیم تبسم اوہناں دے گھر جا کے وی ملے۔ احتشام شیخ وی تحریک انصاف دا ہن اہم حصہ نیں۔ اوہناں دی کوششاں وی شامل رہیاں تے سب توں ودھ کے پرویزالٰہی چونکہ خود گجرات توں نیں تے وزیرآباد تے گجرات بالکل نال ہون دی وجہ نال سیاسی قرابت داریاں تے حلقہ بندیاں وی ہین اوہ پہلے وی جدوں وزیراعلیٰ سن اوہناں نے وزیرآباد وچ کارڈیالوجی سنٹر تعمیر کیتا۔ اوہ الیکشن توں پہلے گجرات ڈویژن نوں نویں حلقہ بندیاں تے سیٹاں توں مضبوط کرنا چاہندے سن تے ضلع وزیرآباد ڈویژن گجرات اوہناں دے اپنے حق وچ وی اے۔
ایس طرحاں اللہ ولوں وی راہواں ہموار ہوندیاں گئیاں تے ہُن تحصیل علی پور چٹھہ ضلع وزیرآباد دا نوٹیفکیشن جاری ہو چکیا اے۔ اوہ آواز جہڑی نوجواناں نے علی پور چٹھہ نوں تحصیل بنوان لئی اُچی کیتی۔ اوہنوں عملی جامہ وی نوجوان سیاستدان احمد چٹھہ نے پوا دتا جو کہ خوش آئند اے تے اوہدے اتے اوہناں دا کھل کے شکریہ ادا کیتا جانا چاہیدا اے کوئی وی علاقے لئی کم کرے اوہدی حوصلہ افزائی ضروری اے۔ پچھلے دناں
تحصیل دے معاملے اتے کئی گروپ وی سوشل میڈیا اتے ویکھن نوں ملے جہڑے آپس وچ کریڈٹ لین تے اک دُوجے نوں ڈِس کریڈٹ کردے رہے تے دکھ ہویا کیوں جے کوئی اک گھٹ پانی وی کسی نوں پلا دیوے تے اوہ وی نیکی اے اوہنوں وی یاد رکھنا چاہیدا اے ایس لئی جہنے وی آواز اچی کیتی۔ کوشش دی ساری مبارکباںدے مستحق نیں تے اوہناں دی ایس علاقے نال ایہہ نیکی اے پورے علاقے نوں دلی مبارکباد تے خوشی دا ایہہ موقع سارے رل کے منان۔ تحریک انصاف علی پور چٹھہ دے صدر وڈے بھراں تصدق محمود بٹ تے مسلم لیگ ن دے دوستاں نوں وی مبارکباں کہ اوہناںدی پنجاب وچ جے حکومت ہوندی تے جیویں ایس مطالبے نے شدت پھڑی سی اوہ وی یقینی طور تے ایہو قدم چکدے۔ عادل بخش چٹھہ’ نثار احمد چیمہ تے ہر دلعزیز رانا رضوان اختر نوں وی کھلے دل دے نال تحصیل لئی کوشش کرن والیاں نوں مبارکباد دینی چاہیدی اے۔ سیاست لوکاں دی بھلائی داد ای نام اے ایس لئی جو وی لوکاں دے نال بھلائی کرے اوہنوں سیاسی اختلافات دے باوجود کھلے دل نال خراج تحسین پیش کرو۔