قوم دی ریڈ لائن

رابعہ رحمان

اج کل ہر پاسے ریڈ لائن دا بہت چرچا اے تے ایہہ لفظ سوشل میڈیا اتے بالخصوص بہت استعمال ہو رہیا اے۔ عمران خان دے سپورٹر اوہنوں سوشل میڈیا ٹرینڈ بنا کے پیش کر رہے نیں کہ عمران خان اوہناں دی ریڈ لائن اے جہنوں ویکھا ویکھی فیر دُوجے وی اپنی اپنی قیادت دے متعلق انج دے جذبیاں دا اظہار کردے نیں۔ جے ویکھیا جاوے تے ریڈ لائن توں اوہناں دا مطلب ایہہ دسنا اے کہ اوہناں دا لیڈر اوہناں نوں ہر چیز توں ودھ مقدم اے جہدے لئی اوہ سب کجھ قربان کرن نوں تیار نیں لہٰذا اوہدے ول کوئی وی میلی اکھ نہ ویکھے۔ ویسے تے ہر کسی نوں حق حاصل اے کہ اوہ جہنوں پسند کردا اے اوہدے لئی جو وی جذبات رکھے مگر انج کردے ویلے ایہہ خیال ضرور رکھنا چاہیدا اے کہ ایہدے توں انتہا پسندی جئے جذبیاں دا اظہار نہ ہووے تے دوجیاں لئی نفرت دا کارن نہ بنے چونکہ عمران خان تے تحریک انصاف دا میڈیا سیل تے اوہناں دی سوشل میڈیا ٹیماں بہت متحرک نیں۔ ایس وجہ نال اوہناں دے حامی ایس طرحاں دے خیالات تے جذبات دا اظہار بہت شدت نال کردے نیں تے انج کرن وچ بعض ویلے ایہہ تاثر وی دیندے نیں کہ اوہناں دے لیڈر توں اُچا کوئی وی نہیں۔ ویکھیا جاوے تے ہر ملک تے معاشرے دی ریڈ لائنز ہوندیاں نیں جہناں نوں کراس کرن دی اجازت نہیں دتی جا سکدی کیوں جے انج کرنا ملک تے معاشرے نال دشمنی دے مترادف اے۔ ہر شخص چاہے اوہ کنے ای وڈے عہدے اتے فائز کیوں نہ ہووے ریاست توں بالاتر نہیں ہو سکدا۔ ایس طرحاں دے شدت پسندانہ جذبات معاشریاں وچ عدم برداشت نوں جنم دیندے نیں جیویں کہ اج ساڈے ایتھے ہو رہیا اے۔
اج ساڈی نوجوان نسل ذرا جئی گل اتے مشتعل ہو جاندی اے تے مکالمے دے بجائے بدزبانی اتے بوہتا انحصار کردی اے۔ ایہدے توں لوک نفرت تے ذاتی عناد ول مائل ہوندے نظر آندے نیں۔ ایہہ ساری انھی تقلید دی وجہ نال ہو رہیا اے۔ عام بندے نوں تے حقائق نال وی آگاہی نہیں ہوندی تے اوہ صرف سنی سنائی گلاں اتے یقین کر کے استعمال ہو رہیا اے۔ ایس ساری بحث تے ماحول وچ عمران خان تے اوہناں دے حامیاں نے انتہائی جارحانہ تے ہتک آمیز طریقے نال پاکستان دی فوج تے دوجے قومی اداریاں نوں نشانہ بنانا شروع کر دتا اے۔ اپنے لیڈر نوں ریڈ لائن قرار دیندے ہوئے اوہ مسلح افواج دی تضحیک کرن وچ مصروف نیں۔ اوہ ایہہ بھل جاندے نیں کہ پاکستان دی مسلح افواج قوم دی حقیقی ریڈ لائن نیں جہنوں پار کرن دی اجازت کسی نوں وی نہیں دتی جا سکدی۔ مسلح افواج پاکستان دی وحدت’ بقا تے سلامتی دی علامت نیں جہناں نوں باقاعدہ اک منظم مہم دے طور تے نشانہ بنانا دراصل دشمن دی سوچ دی عکاسی کردا اے۔ ساڈے دشمناں بالخصوص ہندوستان دی ہر ویلے ایہو ترجیح تے کوشش ہوندی اے کہ کیویں پاکستانی فوج نوں نشانہ بنایا جاوے تے اوہنوں کمزور کرن دی کوشش کیتی جاوے تاں جے پاکستان دا دفاع کمزورہووے۔ ہن چونکہ فوجی طریقے نال تے اوہ انج کر نہیں سکدا کیوں جے اوہنوں چنگی طرح پتہ اے کہ اگو بھرواں جواب ملے گا تے اوہنے ایہہ طریقہ اپنایا اے کہ چونکہ پاکستان وچ سیاسی تفریق خطرناک حد تک ودھ چکی اے لہٰذا اک سیاسی گروہ نوں ہر ویلے فوج مخالف بیانیہ دے کے ایس گل تے کم وچ مشغول رہن دا بہت شوق اے تے غالباً اوہناں نوں انج کرن دا کہیا وی گیا اے۔ ان پوری دنیا بالخصوص ہندوستان دا میڈیا ایسی ساری خبراں تے واقعات نوں ودھا چڑھا کے پیش کر رہیااے جہناں توں پاکستان فوج دے متنازعہ ہون دا تاثر ملدا ہووے۔ بدقسمتی نال دشمن دے ایس ایجنڈے نوں اگے ودھان وچ ساڈے اپنے لوکاں دا بہت ہتھ اے۔ اسیں انجانے تے جوش جذبات وچ ایس طرحاں دی گھنائونی مہم دا حصہ بن جانے آں۔ اپریل 2022 وچ تحریک عدم اعتماد دے ذریعے اقتدار توں علیحدگی سازشی سوچ تے بیانیہ دا سچ توں دور دور دا کوئی تعلق نہیں۔ فوج دی قیادت دے متعلق توہین آمیز الفاظ استعمال کرنا تے اوہنوں الزاماں دی زد وچ لیانا اک ایسا مکروہ فعل اے جہدی کسی صورت معافی نہیں دتی جا سکدی۔ ساڈے ہاں ایہہ عادت بن چکی اے کہ ہر غلط گل تے فعل دا الزام فوج اتے لا دیوتے اوہدے وچ پیش پیش عمران خان تے اوہناں دے حامی نیں۔ پاک فوج تے اوہدی قیادت پچھلے کجھ مہینیاں توں بار بار ایس گل دا اظہار کر چکی اے کہ اوہنے سیاست توں اپنے آپ نوں مکمل طور تے وکھرا کرن دا فیصلہ کر لیتا اے لہٰذا سارے سیاستدان اپنی سیاست خود کرن تے اوہدے وچ فوج نوں ملوث نہ کرو۔ ایہہ اوہ فیصلہ اے جہدا مطالبہ ہر سیاسی جماعت تے ہر پاکستانی شہری کردا رہیا اے تے ہن جے فوج خود کہہ رہی اے کہ اوہ سیاست وچ مداخلت نہیں کرنا چاہندی تے اوہنوں تنقید تے جھوٹے الزاماں دے ذریعے نشانہ بنانا اک ناقابل معافی طرزعمل اے۔ بدقسمتی نال عمران خان صاحب فوج نوں ایہہ نہیں کہہ رہے کہ اوہ سیاست توں دور رہن بلکہ اوہ کہہ رہے نیں کہ فوج اوہناں نوں اقتدار وچ واپس لیائے۔ اوہ اپنی تقریراں تے بیاناں دے ذریعے قوم بالخصوص نوجواناں نوں بھڑکا رہے نیں تے اوہناں نوں اشتعال دوا رہے نیں کہ اوہ فوج مخالف بیانیے نوں لے کے اگے چلو۔ اوہ اپنے طرز عمل نال فوج وچ نفاق تے دراڑ پان دی وی کوشش کر رہے نیں جہدی کسی وی صورت وچ اجازت نہیں دتی اج سکدی۔
عمران خان’ اوہناں دے حامیاں تے پاکستان مخالف سارے عناصر نوں ایس گل وچ کوئی شک نہیں ہونا چاہیدا اے کہ پاکستان دی بہادر مسلح افواج ساڈی بقا’ اتحاد تے سلامتی دی علامت نیں تے ایسے لئی ایہہ قوم دی حقیقی ریڈ لائن نیں جہنوں پار کرن دی کسی نوں اجازت نہیں دتی جا سکدی تے ایسا سوچن والے نال وی آہنی ہتھاں نال نمٹیا جاوے گا۔ کوئی وی کسی مخمصے تے مصلحت پسندی وچ نہ رہوے۔ قوم اپنے شہیداں دے وارثاں دی عزت اتے کوئی آنچ نہیں آن دیوے گی۔ وطن دی ناموس اتے قربان ہون والیاں دا ساڈے اتے ایہہ قرض اے کہ اسیں ایس واردی تے ادارے دا ہرحال وچ تحفظ تے احترام کریے۔ فوج اپنی قیادت دے گرد گھمدی اے جہنوں سپاہ کولوں وکھرا نہیں کیتا جا سکدا۔ اپنی سیاست نوں سیاسی حدود تے دائرے وچ رکھو تے اداریاں نوں اوہدے وچ ملوث نہ کرو کیوں جے اوہدے وچ ساڈی بحیثیت قوم بقا تے بہتری اے۔ایسی سوچ تے عمل نال اسیں ساریاں نوں دور رہنا چاہیدا اے جو دشمن دے بیانیے نوں تقویت دیوے۔ ملک دے اعلیٰ ترین انتظامی عہدے اتے فائز رہن والے پچھلے وزیراعظم نوں بہرحال ایہہ گل ضرور سوچنی چاہیدی اے کہ اوہناں دے کہے ہوئے الفاظ نظرانداز نہیں کیتے جا سکدے بالخصوص جو وہ ملک دی سلامتی توں متعلق اداریاں بارے کہن گے۔