اک غلطی دا خمیازہ

امر جلیل

تسیں بھاویں کنے ای چنگے بیٹس مین کیوں نہ ہوو تسیں بھاویں کنے ای چنگے بالر کیوں نہ ہوو’ تسیں بھاویں کنے ای چنگے آل رائونڈر کیوں نہ ہووے تے تہاڈی کارکردگی نوں ویکھدے ہوئے تہانوں ٹیم دا کپتان بنا دتا جاوے۔ یقین رکھو تسیں اکلے کجھ نہیں کر سکدے۔ تسیں اکلے میچ نہیں جت سکدے۔ میچ جتن لئی تہانوں اک مستند تے چنگی ٹیم دی لوڑ ہوندی اے۔ تسیں جے اکلے کجھ غیرمعمولی کرکے وکھانا چاہندے او تے فیر تسیں اجہے کسے کھیڈ دا انتخاب کرو جو اکلے کھیڈیا جاندا ہووے۔ مثلاً ٹینس’ بیڈمنٹن’ سکواش وغیرہ۔ ایہ کھیڈ اکلے کھیڈے جاندے نیں۔ ایہناں کھیڈاں وچ تہاڈی ٹیم نہیں ہوندی۔ تسیں اکلے میچ جتدے او۔ تسیں اکلے میچ ہاردے او۔ جہانگیر خان ویہہ بائی ورھے سکواش کھیڈ دی دنیا تے چھائے رہے۔ سولاں واری ورلڈچیمپئن رہے۔ ایس لحاظ نال جہانگیرخان پاکستان دا نمبرون سپرسٹار اے۔ یاد رہوے کہ سکواش اکلے کھیڈے جان والے کھیڈاں وچ سب توں اوکھا کھیڈ اے۔ پر کیہ کیتا جاوے کہ جہانگیر خان دی شخصیت وچ عمران خان ورگا کیرزما نہیں سی۔ جہانگیر خان وچ عمران خان ورگی کشش نہیں سی۔ کیرزما دا نعم البدل لفظ ساڈی زباناں وچ نہیں۔ کہنا چاہیے تے کسے حد تک ملدا جلدا مفہوم مقناطیسی کشش وچ اے جو اپنے ول کھچ لیندی اے۔ جہانگیرخان دی شخصیت وچ مقناطیسی کشش نہیں سی تے اوہناں دی غیرمعمولی مقبولیت نوں وی پاکستانی سیاست دے ڈھائے چڑھا دتا جاندا۔
پاکستان دے کھیڈاں تے فلماں وچ فضل محمود توں ودھ پرکشش تے مقناطیسی کشش والا بندہ اسیں فیر کدی نہیں ویکھیا پر فضل محمود پاکستان دے ابتدائی ورھیاں وچ کھیڈدے سن۔ سیاستدان خوش سن کہ اوہناں نے برصغیر دے مسلماناں لئی اک وکھرا ملک بنا لیا سی۔ ایہو وجہ سی کہ فضل محمود سیاسی غلام گردش توں بچ گئے۔ فضل محمود دے دور توں چالھی پنجاہ ورھے بعد اسیں عمران خان نوں ویکھیا۔ موجودہ دور دے گھسے پٹے سیاستداناں دا واہ عمران خان ورگے نوارد سیاستدان نال نہیں سی پیا۔ اوہناں دا پالا قدرت دی دین’ جہڑی عمران دے حصے وچ آئی اے ایس قدرتی وصف نال موجودہ دور دے سیاستداناں دا واہ پیا اے۔ اوہ مقناطیسی وصف خریدیا نہیں جاندا اوہ وصف کالج تے یونیورسٹیاں توں نہیں ملدا۔ زندگی لائبریریاں وچ گزارن نال نہیں ملدا۔ ایہ وصف قدرت دا عطیہ اے۔ کوئی ایہدا مقابلہ نہیں کر سکدا۔ امریکی ادب وچ ارنسٹ ہیمنگوے توں بہت وڈے ادیب موجود نیں پر جو کیرزما ہیمنگوے وچ سی کسے ہور ادیب نوں نصیب نہیں ہویا۔ لوک دیوانہ وار اوہناں ول کھچے چلے آندے سن۔ گھر توں باہر نکلدے سن تے جمگھٹے وچ گھر جاندے سن۔
اصل وچ پرانے سیاستداناں دا مقابلہ عمران نال نہیں سگوں عمران خان دے کیرزما نال اے تے سیاستدان عمران خان دے کیرزما نال نہیں لڑ سکدے۔ ساڑھے تن ورھے دی حاکمیت توں ثابت ہو چکیا اے کہ عمران خان بالکل وی سیاستدان نہیں۔ اوہ فاسٹ بالر سن تے اج تک فاسٹ بالر نیں۔ فاسٹ بالر دی اپنی مخصوص نفسیات ہوندی اے۔ اوہ کسے دے وس وچ نہیں آندے۔ کسے توں ڈردے نہیں کسے دی دھونس قبول نہیں کردے۔
اوس ویلے جدوں میں اپنی کتھا دے ایس حصے تے اپڑیا واں بریکنگ نیوز گردش کرن لگی اے کہ الیکشن کمیشن نے عمران خان نوں پنج ورھے لئی نااہل ہون دا فیصلہ سنا دتا اے۔ فیصلے دے بارے میں کجھ کہنا مناسب نہیں سمجھدا۔ الیکشن کمیشن دے فیصلے نوں اعلیٰ عدالتاں وچ چیلنج کیتا جاوے گا۔ مینوں لگدا اے کہ نااہلی والے فیصلے دے بعد عمران خان لوکاں وچ ہور زیادہ مقبول ہون گے۔ نہیں بھلنا چاہیدا کہ لوکاں نے اوہناں تے لگائے گئے کسے الزام نوں منن تو ںانکار کر دتا سی۔ مینوں لگدا اے کہ عمران خان لوکاں دے قیاس تے گمان وچ ہیروپرستی دی سرحد تے جا اپڑے نیں۔ لوک بالکل وی منن نوں تیار نہیں کہ عمران خان توں کدی کوئی غلط کم ہو ای نہیں سکدا۔ اوہناں تے لائے گئے الزام لوکاں نوں جھوٹ لگدے نیں ہر الزام دے بعد اوہناں دی شہرت وچ وادھا ہوندا رہیا اے۔
اسیں اپنی غلطیاں نہیں مندے۔ پچھلے 75ورھے توں اسیں ایس آکڑ وچ آں کہ اسیں دنیا دی سب توں عظیم قوم آں۔ جے تسیں عمران خان توں پچھا چھڑانا چاہندے سی تے ایس کم لئی عمران خان آپ تہانوں سنہری موقع دین دی راہ تے بہت اگے نکل گئے سن۔ ملک دے حالات اینے ماڑے ہو گئے سن کہ عمران خان بے بس نظر آ رہے سن۔ بین الاقوامی تعلقات توں لے کے اقتصادی بحران نے اوہناں نوں سراسیمگی وچ پا دتا سی۔ اداریاں نے اوہناں نال تعاون کرنا چھڈ دتا سی۔ کجھ مہینیاں دی گل سی’ تسیں اوہناں نوں مدت پوری کرن دیندے۔ ایہو قوم جو تہاڈی غلطی دی وجہ نال عمران خان دی پرستش تے اتر آئی اے عمران خان نوں اگلے انتخابات وچ مسترد کر دیندی۔ تہاڈے توں وڈی غلطی ہو گئی اے ہن تسیں عمران خان نوں بھگتو۔ ٭