پنجاب وچ سینئر افسراںدا ذمہ داری توں فرار؟

پاکستان دا سب توں وڈا صوبہ پنجاب ایس ویلے بڑے مخدوش حالات توں دوچار اے۔ کسے نوں نہیں پتہ کہ صوبہ وچ کیہڑی حکومت کم کر رہی اے۔ پلس دے سربراہ اپنے فرائض توں کیوں نَسنا چاہندے نیں۔ چیف سیکرٹری وفاق جان دا راگ الاپ رہے نیں۔ پنجاب دے دل لہور دے پلس سربراہ وفاق دے عناد دا شکار نیں۔ پی ٹی آئی دے وزرا آپس وچ دست و گریبان نیں۔ اپوزیشن نے سلیمانی ٹوپی پا رکھی اے۔ کوئی ادارہ ایہناں حالات توں باہر نہیں۔ ایہہ سب کیہ ہو رہیا اے؟ کیوں ہو رہیا اے؟ ایہدا ذمہ دار کون اے؟ اج میں اپنے قارئین نوں ایس توں آگاہ کراں گا گو کہ ایس آگاہی مہم وچ بہت سارے طاقتور لوک میرے توں شدید ناراض ہو جان گے۔ مگر اوہناں دی ناراضی توں ودھ اہم میرا ملک اے۔ جیویں ای حکومتاں تبدیل ہون لگیاں تے آئی جی پلس پنجاب رائو سردارنے نویں آن والے وزیراعلیٰ دے نال کم کرن توں معذرت کر لئی تے اسٹیبلشمنٹ ڈویژن نوں آگاہ کیتا کہ اوہ ایس سیاسی صورتحال وچ ہور اپنی خدمات انجا م نہیں دے سکدے لہٰذاوہناں نوں پنجاب توں تبدیل کر کے وفاق وچ بھیج دِتا جاوے۔ایہہ پتھر رائو سردار دا سٹیا ہویا سی۔ اگلی حکومت آن مگروں اوہناں دے پچھے پچھے چلدے ہوئے چیف سیکرٹری پنجاب ڈاکٹر کامران افضل (جہناں نے آسٹریلیا توں پی ایچ ڈی کر رکھی اے) نے وی اسٹیبلشمنٹ ڈویژن نوں اک مراسلہ لکھ ماریا کہ اوہ ایہناں حالات وچ خدمات انجام نہیں دے سکدے۔
صوبہ پنجاب دے ایہناں سینئر افسراں دا حالات توں فرار لئی اسٹیبلشمنٹ ڈویژن کولوں مدد منگنا موجودہ آئی جی پنجاب فیصل شاہکار نوں وی بھا گیا۔ اوہناں نے وی اپنی کارکردگی وکھان دے بجائے اوہناں افسراں دے نقش قدم اتے چلدے ہوئے اسٹیبلشمنٹ ڈویژن نوں خط لکھ دتا کہ میں ایہناں حالات وچ کم نہیں کر سکدا لہٰذا مینوں پنجاب توں وفاق وچ تبدیل کیتا جاوے۔ا یہہ وکھری گل اے کہ رائو سردار دے علاوہ اجے تک کسے افسر دی شنوائی نہیں ہو سکی تے اوہ پنجاب وچ ای ناراض تے پشیمان براجمان نیں۔ پچھلی واری توں لے کے ہن تک چیف سیکرٹری پنجاب ڈاکٹر کامران افضل ولوں چھٹی دی درخواست نہیں بھیجی گئی مگر وزیراعلیٰ چودھری پرویزالٰہی نے اوہناں دی رخصت منظور کر لئی۔ عام معنیاں وچ اوہناں نوں جبری رخصت کہیا جاندا اے۔ گریڈ 22دے سینئر ترین ایہناں افسراں کولوں اسٹیبلشمنٹ ڈویژن ایہہ سوال کیوں نہیں پچھ رہیا کہ تہاڈا وفاق نوں لکھیا گیا خط ای غیر آئینی اے جہدے وچ آئی جی صاحبان نے آئی جی دا لیٹر ہیڈ تے مہر استعمال کیتی جد کہ چیف سیکرٹری نے چیف سیکرٹری دا لیٹر ہیڈ استعمال کیتاتے جد کہ ایہہ افسران ایسے گل دی تنخواہ لیندے نیں کہ کشیدہ توں کشیدی حالات دا مقابلہ کر کے ملک نوں ناگہانی صورتحال توں کڈاں گے۔ اوہناں دے ماتحت رینک افسر جے ایہناں افسران نوں اوسے طرحاں دا خط لکھے تے کیہ ایہہ اوہنوں شوکاز نہیں دین گے؟ تے ہور کارروائی کردے ہوئے ایس گل نوں جواز بنا کے نوکری توں نہیں کڈن گے کہ ایہہ حالات دا مقابلہ نہیں کر پا رہیا؟ اسٹیبلشمنٹ ڈویژن نوں اوہناں دے نال اوہو سلوک کرنا چاہیدا اے جہڑے ایہہ اپنے ماتحت افسراں دے نال روا رکھدے نیں مگر شاید اسٹیبلشمنٹ ڈویژن وی مصلحت دا شکار اے تے وفاق تے پنجاب وچ پائی جان والی کشیدگی وچ اپنا کردار ادا کر رہیا اے۔ سمجھن دی گل اے بارہ کروڑ آبادی والے صوبے دا وزیراعلیٰ ایہناں وفاقی افسراں دے اَگے مکمل طور تے بے بس اے۔
غیر یقینی دی ایس صورتحال وچ پنجاب دے عوام بری طرح پس رہے نیں۔ بیورو کریسی دا گولڈن ہنی مون چل رہیا اے۔ نااہل افسران سفارش دے زور تے پرکشش عہدیاں اتے تعیناتیاں کروا رہے نیں تے قابل افسران نوںکھڈے لائن لا یا جا رہیا اے۔ اک سینئر بیورو کریٹ نے راقم نوں دسیا کہ سیکرٹری ٹورازم محترمہ آسیہ گل دے شوہر ایل ڈی اے دے افسر نیں۔ اوہناں نے بزدار دور وچ مبینہ طور تے فیس ادا کر کے اپنی اہلیہ محترمہ آسیہ گل نوں اک ضلع دا ڈپٹی کمشنر مقرر کروایا۔ ہن اوہو سفارش آسیہ گل نوں سیکرٹری شپ دوان وچ وی کامیاب ہو گئی اے۔ احمد جاوید قاضی انتہائی پروفیشنل افسران وچ شمار ہوندے نیں اوہناں دا اپنے وزیر میاں اسلم اقبال نال جھگڑا چل رہیا سی۔ احمد جاوید قاضی اپنے سینئرز نوں استدعا کر کے سیکرٹری صحت تعینات ہون وچ کامیاب ہو گئے نیں۔ سیکرٹری ایکسائز آصف بلال لودھی جہناں نوں پی ٹی آئی دی حکومت وچ کمشنر لہور دی پرکشش آسامی توں کسے اہم شخصیت دی ناراضی دی وجہ نال فوراً ای ہتھ دھونے پیندے سن ہن سردار آصف نکئی دی سفارش اتے سیکرٹری ایکسائز تعینات ہو تے گئے نیں مگر نجی محفلاں وچ اپنے وزیر آصف نکئی دے حوالے نال کہندے نظر آندے نیں کہ پورا ڈیپارٹمنٹ نکئی تے اوہناں دے جانن والیاں نے ہائی جیک کر رکھیا اے تے ٹرانسفر پوسٹنگ جے میں نہ وی کراں تے اوہ میرے ڈی جی دے ذریعے آرڈر کروا لیندے نیں۔ اج کل اوہناں دے کول سیکرٹری انفارمیشن دا اضافی چارج وی اے۔ آصف بلال لودھی وی کشاں نیں کہ اوہ کسے ہور محکمے دے سربراہ دے طور تے چلے جان۔ راجہ منصور جہڑے کہ اک ایماندار تے قابل افسر نیں ۔ محکمہ اطلاعات کولوں اپنی جان چھڈا کے چیئرمین لیکویڈیشن بورڈ تعیناتی کروا کے خوش نظر آندے نیں۔ اہم خبر ایہہ ہے کہ وزیراعظم میاں شہباز شریف قائد نواز شریف نال رَل کے گل منوان وچ کامیاب ہو گئے نیں کہ آرمی چیف جنرل قمر جاوید باجوہ نوں ہور ایکسٹینشن دے دتی جاوے۔ چیتا رہوے جنرل باجوہ بڑی واری کہہ چکے نیں کہ ہور ایکسٹینشن نہیں لینا چاہندا مگر وزیراعظم دی خواہش اے کہ ملک نوں ایس ویلے جہناں اندرونی تے بیرونی سازشاں دا سامنا اے اوہناں دے حل لئی پاک فوج دا کردار اہم اے ایس لئی سپہ سالار دی تبدیلی ایس موقع اتے مناسب نہیں۔ چنانچہ ملک دے وسیع تر مفاد وچ جنرل باجوہ نوں ایکسٹینشن اتے مجبور کیتا جا سکدا اے۔