سپریم کورٹ بار الیکشن تے حامد گروپ دی جت

سپریم کورٹ بار الیکشن وچ حامدخان گروپ دے امیدواراں نے بیرسٹر عابد زبیری دی سربراہی وچ میدان مار لیا۔ ایہ جت سارے وکیلاں دی محنت دا پھل اے۔ عاصمہ جہانگیر نوں دنیا توں گئے ہوئے چار ورھے ہون والے نیں اوہ یاراں فروری 2018ء نوں رخصت ہوئیاں اوہناں دی ولادت ستائی جنوری 1952ء وچ ہوئی۔ جدوں توں محترمہ نے جہان فانی توں کوچ کیتا اوس ویلے گروپ وچ کوئی وی قدآور شخصیت نہیں سی۔ ایہ گروپ محترمہ دے ناں تے الیکشن جتدا رہیا۔ جہڑیاں خوبیاںدی مالک محترمہ آپ سن اوہ گروپ لیڈراں وچ دکھائی نہیں دتیاں۔ جے کیہا جاوے کہ ایہ وکیل محترمہ دے ناں نوں کیش کرا کے الیکشن جتدے رہے تے غلط نہیں ہووے گا۔ چار ورھیاں تک تے وکیل ایس گروپ نوں برداشت کردے رہے نظرانداز کردے رہے پر ایس ورھے سپریم کورٹ وکیلاں نے عاصمہ جہانگیر دا ناں ویچن والیاں توں لاتعلقی دا اظہار کردے ہوئے پروفیشنل گروپ نوں ووٹ دتے۔ ہار اوس ویلے لکھی جا چکی سی جدوں سردار لطیف خان کھوسہ نوں پروفیشنل گروپ نے بطور صدارتی امیدوار سپریم کورٹ پہلے ورھے نامزد کیتا سی۔ اوہناں دے مقابلے وچ اک اجیہا امیدوار سامنے لیاندا گیا جہنوں سردار لطیف خان کھوسہ نے انگلی پھڑ کے ٹرنا سکھایا۔ اوہناں دے ای گروپ دے اک ساتھی دا کہنا سی کہ میں دعوے نال کہنا واں جے عاصمہ جہانگیر زندہ ہوندیاں تے شاگرد نوں کدی استاد دے مقابلے وچ کھڑا نہ ہون دیندیاں۔
ایہ جت کے وی ہارے ہوئے دکھائی دتے۔ ایس ورھے کہیا جاندا اے کہ حامد خان گروپدے جتن دیاں چار وجہ سن۔ (1) ایہناں وچ ویلیو دی کمی سی جہدی وجہ نال اپنے استاد نوں ہرایا۔ (2) جتن دے بعد سپریم کورٹ وکیلاں دی سوسائٹی وچ جو گل کھلائے اوہنوں ساریاں نے ناپسند کیتا۔ فیر اوہناں نوں جتوان لئی کجھ سیاسی پارٹیاں نے اوہناں دا ساتھ دتا۔ جہدے بعد جتن والیاں نے وکیلاں دے مسئلے ختم کران دی تھاں سیاسی جماعتاں لئی کم کردے رہے۔ وکیلاں نوں انج کرنا وی پسند نہیں سی۔ وکلاء سوسائٹی دی قرعہ اندازی وچ اک وزیر صاحب نے بٹن دبا کے آغاز کیتا پر تریہہ دن بعد دسیا کہ کہڑے وکیلاں دے پلاٹ کس تھاں کس بلاک وچ نیں؟ انج کر کے وچارے کمپیوٹر نوں وی بدنام کیتا گیا تے دھاندلی دے ریکارڈ قائم کیتے۔ اوہناں دی ہار دی اک وجہ ایہ وی بنی۔ (3) اوہناں نے عاصمہ جہانگیر دی کانفرنس غلط تریخ تے منعقد کروائی۔ ایہ کانفرنس محترمہ دی پیدائش یاں وفات نوں ہونی چاہیدی سی پر ایس گروپ نے ایس کانفرنس نوں سپریم کورٹ بار دے الیکشن وچ استعمال کیتا۔ ایتھے عاصمہ جہانگیر مرحومہ دی فیملی اگے گزارش اے کہ عاصمہ جہانگیر نوں عزت دیو۔ میڈم کسے اک گروپ دی لیڈر نہیں سن۔ تسیں ایس کانفرنس دی تریخ اوہناں دی پیدائش یاں وفات دے دن رکھیا کرو تے ساریاں نوں سدیا کرو تاں جے نقصان میڈم دی شہرت نوں نہ اپڑے۔ فیر جو کجھ ایس کانفرنس وچ ہویا اوہ وی اوہناں دی ہار دا کارن بنی۔ (4) ایس گروپ دے اعظم نذیر تارڑ تے اٹارنی جنرل اشتراوصاف نے جوڈیشل کمیشن وچ تن مہینے پہلاں ایہناں دو ججاں دی مخالفت وچ ووٹ دتے سن تے تن مہینے بعد بار الیکشن دے نیڑے آ کے ایہناں ججاں دے ناواں تے اتفاق کردے ہوئے اوہناں دی حمایت وچ ووٹ دتے جد کہ ساریاں بار ایسوسی ایشناں تے بار کونسل ایہدی مخالفت کردیاں رہیاں نیں۔ انج کرن تے وکیلاں دا احتجاج ہن وی جاری اے۔
کہیا جاندا اے سپریم کورٹ بار دا الیکشن جتن لئی وزیر قنون تارڑ نے استعفیٰ دتا۔ اوہناں دا انج کرنا الیکشن وچ نکامی دا کارن بنیا۔ فیر قدرت نے اپنی مہربانی کیتی تے صدر سپریم کورٹ بار دا تاج بیرسٹر عابد زبیری دے سر تے رکھیا۔ ایس الیکشن وچ وی سیاسی جماعتاں نال جڑے وکیلاں نے اپنے اپنے امیدواراں لئی ودھ چڑھ کے حصہ لیا۔ امیدواراں نوں پی ڈی ایم دیاں جماعتاں دی سپورٹ حاصل سی جد کہ پی ٹی آئی تے پیپلزپارٹی دے کجھ وکیلاں نے کھلے عام صدر سپریم کورٹ بار عابدزبیری دے پینل دا ساتھ دتا۔ ایہ کہنا ٹھیک نہیں کہ کسے اک جماعت یاں جماعتاں دی وجہ نال بار گروپ جتن تے ہار جاندے نیں۔ ایس جت وچ سردارلطیف خان کھوسہ دیاں کوششاں وی نیں اوہناں دا تعلق پاکستان پیپلزپارٹی نال اے ایسے طرح وزیر شہادت اعوان نے کھل کے عابدزبیری پینل دا ساتھ دتا۔
یاد رہوے وکیلاں دی سیاسی کسے نہ کسے جماعت نال وابستہ ہوندی اے پر الیکشن وچ اپنی سوچ وکیلاں دے مفاد نوں ویکھدے ہوئے ووٹ کاسٹ کردے نیں۔ موجودہ الیکشن وچ حامد خان گروپ دا جتنا ایس گل دی علامت اے کہ وکیل اوہناں توں تنگ آ چکے سن۔ ایس ویلے ملک بھر دیاں بار ایسوسی ایشناں تے بار کونسل ججاں نوں سنیارٹی تے نہ لائے جان تے سراپا احتجاج نیں پر اسلام ہائیکورٹ دے چیف جسٹس اطہرمن اللہ دی سپریم کورٹ سلیکشن تے بڑے خوش نیں مبارک پیش کرنے آں۔ ہر ورھے اوس ویلے رولا پیندا اے جدوں ججاں نوں خالی سیٹاں تے لیانا ہوندا اے جو جونیئر ججاں نوں اپنے سینئر ججاں تے فوقیت دیندے نیں۔