پِلاک ولوں بابا گرونانک کانفرنس
رپورٹ: ممتاز ملک
پنجاب انسٹیٹیوٹ آف لینگوئج، آرٹ اینڈ کلچر (پِلاک) وچ باباجی گرونانک دے 553ویں جنم دیہاڑ دے موقعے تے ”بابا گرونانک کانفرنس” دا پربندھ کیتا گیا جہدے وچ ملکی تے غیر ملکی دانشوراں نے باباجی گرونانک دے پیغام تے تعلیمات دے حوالے نال گل بات کیتی۔ اظہار خیال کرن والیاں وچ عجائب سنگھ چٹھہ، کیول سنگھ، ڈاکٹر مجاہدہ بٹ، ڈی جی پِلاک ڈاکٹر صغرا صدف تے دوجے شامل سن۔ شرکا نے پلاک دے مختلف حصیاں دا دورہ کیتا تے لائبریری وچ قدیم گروگرنتھ وچ گہری دلچسپی ظاہر کیتی۔
ڈائریکٹر جنرل پلاک ڈاکٹر صغرا صدف نے پروہنیاں نوں پھل پیش کیتے۔ اوہناں نے یورپ’ امریکہ تے کینیڈا توں آئے سارے معزز پروہنیاں نوں جی آیاں نوں آکھدے ہوئے کہیا کہ اسیں پنجابیاں نے ہن آپس وچ لڑنا نہیں بلکہ محبتاں ونڈنیاں نیں کیوں جے صرف محبت دے ذریعے ای دِلاں نوں فتح کیتا جا سکدا اے۔ اوہناں نے ہور آکھیا کہ پنجاب دی سرزمین وچ جتھے اناج تے پھل’ پُھل ‘ سبزے دی فراوانی اے اوتھے ای صوفیاء کرام دی روحانی دولت نال مالا مال تعلیمات وی ساڈا اثاثہ نیں۔
سکھ سرداراں نے اظہار خیال کردے آکھیا کہ پاکستان آن توں پہلاں اسیں کشمکش دا شکار ساں کہ اوتھے حالات کنج دے ہون گے لیکن ایتھے آ کے سانوں جنی محبت تے عزت ملی اوہ ناقابل فراموش اے۔ اسی جتھے گئے لوکاں نے سانوں سر اکھاںاتے بٹھایا۔ پلاک جیویں پنجابی زبان تے کلچر لئی کم کر رہیا اے اوہ بہت قابل تحسین اے۔
منی پرمنی صوفی گلوکار ہ تحسین سکینہ نے بلھے شاہ’ وارث شاہ’ شاہ حسین تے دُوجے صوفیاںدا کلام پیش کر کے سامعین اتے وجد طاری کر دتا۔ اوہناں نے باباجی گرونانک دی عقیدت وچ منقبت وی پیش کیتی۔
