کتاب…پنجابی شعراں دی چون

ماں بولی دے راکھے
ایس لکھت دے سمے تائیں دنیا وچ وسن والے لوکی کوئی ست ہزار تے اک سو بولیاں بول رہے نیں۔جے پاکستان دی گل کیتی جاوے تے ایتھوں دے واسی گھٹو گھٹ اسی زباناں بولدے نیں۔ایہناں چوں سبھ توں ودھ کے 38 فیصد بولی جاون والی زبان پنجابی اے۔دُوجے نمبر تے 18.24 فیصد
پشتو، 14.57 فیصد سندھی، 12.19 فیصد سرائیکی، 7.08 فیصد اردو، 3.02 فیصد بلوچی، 2.25 فیصد ہندکوہ، 1.83 فیصد پوٹھوہاری تے 1.24 فیصد بروہی لوکاں دی ماں بولی اے۔جے پاکستان توں باہر دی دنیا چ دھیان ماریا جاوے تے پوری دنیا چ نوویں نمبر تے بولی جاون والی زبان پنجابی اے۔ ایہ سارا حساب کتاب دسن دا مقصد ایہ سی پئی پنجابی بولن والیاں نوں پتہ ہووے کہ اوہناں دی زبان دی کیہ اہمیت اے۔پر ایتھے ایس حقیقت دا نہ لکھنا وی شوم پنا ہووے گا جوں پاکستان چ پنجابی زبان بولن والیاں دی تعداد گھٹدی جاندی اے۔کیہ خیال اے ایہ دکھ دی گل نئیں جوں پنجابی بولن والے ماں پیو اپنے بالاں نال گل بات انگریزی تے اردو وچ کردے نیں؟ بابواں دے بال جدوں کدی عید ورِین تے پنڈ جاون تے دادی، دادے دی گل اوہناں نوں سمجھ نئیں اوندی۔
ع
مک گئیاں نے ساہواں ہاواں رہ گئیاں
یاداں چکدیاں چکدیاں باہواں رہ گئیاں
با سارے شہراں دے وچ جا وسے
پنڈاں دے وچ کلیاں ماواں رہ گئیاں
پپل، ٹاہلی، بوڑھ نہ ڈھارا بوٹے دا
ناں اوہ سنگنے رکھ نہ چھاواں رہ گئیاں
اوہ تے بھلا ہووے سِکھاں دا جنہاں پاروں پنجابی دا مستقبل خطرے وچ نئیں۔جیہڑیاں بولیاں دا رہی پئی نہیں رہندا اوہناں دی موت واقع ہو جاندی اے۔ایس سمے تائیں پاکستان دِیاں کئی زباناں مر چکیاں نیں یا مرن دے خطرے وچ نیں۔ انٹرنیٹ دی وجہ توں زباناں زندہ ہوون دے باوجود اوہناں دے کئی اکھراں دی تھاں دوجیاں زباں دے اکھراں نے مل لئی اے۔ایہ منی پر منی گل اے پئی ہر بولی دے رکھوالے اوہدے بولن والے تے خاص کر اوس بولی دے کوی ہوندے نیں کیوں جے اوہ کویتا راہیں لفظاں نوں مرن نئیں دیندے۔صرف ایہ ای نئیں بلکہ شاعر لفظاں نال رہتل تے سدراں نوں جیوندا رکھن دا کارن وی کردے نیں۔شاعر اپنی شاعری کرن توں بعد شاعری نوں لوکائی تک پہنچاون لئی ودھ توں ودھ کتاب لکھن دا چارا کر سکدا
اے۔ ویلے دی ضرورت سمجھدیاں ہویاں کجھ اجیہے سمجھدار پنجابی نوں لوکائی تک پہنچاون دی ذمیواری اپنے موڈھیاں تے رکھی ہوئی اے جہناں چوں مدثر اقبال بٹ ہوراں نے کئی پنجابی شاعراں دیا ںکتاباں چھاپ کے پنجابی بولن والیاں نوں ونڈیاں نیں۔کجھ شاعراں دے شعر ٹیلی ویژن راہیں لوکاں تک تے پہنچ جاندے نیں پر کتابی شکل چ نئیں سی۔اوہناں چونویں شعراں نوں کتابی شکل چ محفوظ کرن دا خیال، پنجابی دے مان تران طاہر خیال دی دل وچ ابھریاں تے اوہناں نے مشہور شعراں دی چون کر کے اکرم اداس ہوراں توں اوہناں شعراں دی پڑھنت کروائی۔طاہر خیال ہوراں نے کوئی 129 شاعراں تے شاعرات دا کلام اکٹھا کر کے اوہنا وچوں کوئی سٹھ کویاں دے شعراں نوں اپنی چون دی زینت بنایا۔یاد رہووے پئی باقی جیہڑے ایس کتان، پنجابی شعراں دی چون دا حصہ نئیں بنے اوہ اگلی کتاب چ شامل کیتے جاون گے۔ میں اوہناں سارے شاعراں نوں ودھائی پیش کرنا جنہاں دا کلام”پنجابی شعراں دی چون”چ شامل اے۔نال ای طاہر خیال تے اکرم اداس ہوراں دی ایس کوشش تے اوہناں دوہاں لئی ڈھیر دعاواں۔