جنرل علی قلی تے عبداللہ سنبل دی کہانی

قدرت دے کھیڈ وی نرالے نیں’ اوہ چاہے تے گدا نوں شاہ کر دیوے تے شاہ نوں گدا کر دیوے۔ جے اوہدی مرضی ہووے تے بادشاہ وی تخت توں تختے اتے آ جاندے نیں۔ قدرت نے ایہہ طاقت اپنے ہتھ وچ رکھن دے نال انسان نوں جہد مسلسل دا سبق دتا اے تے اوہنوں تحریک وی دتی اے کہ اوہ اپنے لئی منزلاں دا تعین کرے فیر ایہدے حصول لئی کوشاں رہے۔ بعض ویلے ایہہ جدوجہد اک نسل توں دُوجی’ فیر تیجی نسل تک وی جاری رہندی اے۔ اسیں ویکھیا اے انسان دی کوششاں دے نال کدی کدی قدرت وی مہربان ہو جاندی اے تے انسان اپنی منزل پا لیندا اے۔ ایسی ای جدوجہد تے عزم دی دو مثالاں ساڈی اعلیٰ عسکری تے سول بیوروکریسی وچ وی ملدیاں نیں جتھے پیو جے کسے منزل دے حصول وچ نکام رہیا تے جاندے ہوئے اپنی اولاد نوں ٹارگٹ سونپ گیا۔
ایسی ای مثال ساڈے سامنے جنرل علی قلی خان دے والد جنرل حبیب اللہ دی اے جہناں نے دُوجی جنگ عظیم وچ کئی کارنامے سرانجام دتے۔ جنرل حبیب فیلڈ مارشل ایوب خان دے سمدھی سن یعنی جنرل حبیب دی صاحبزادی جنرل ایوب دی بہو تے گوہر
ایوب دی اہلیہ سن۔ ایوب خان جدوں آرمی چیف دا عہدہ چھڈ کے نواں چیف بنان لگے تے اوس ویلے میرٹ اتے جنرل حبیب نمبرون اتے سی مگر اوہو شریکہ برادری والا’ بیک ورڈ رسم و راوج آڑے آ گیا تے ایوب نوں مشورہ دتا گیا کہ جے تہاڈے سمدھی چیف بن گئے تے طاقت دا محور ایوان صدر دے بجائے جنرل حبیب دا گھر ہووے گا۔ جنرل ایوب نوں ایس مشورے وچ دم خم نظر آیا تے اوہناں نے جنرل حبیب نوں اپنا رشتہ دار ہون دے جرم وچ سپرسیڈ کر دتا تے جنرل حبیب دا اوہ سفنا چکنا چور ہو گیا جو گھٹ توں گھٹ 20سال توں اوہ اکھاں وچ سجائے بیٹھے سن۔ جنرل حبیب نے جنرل ایوب ولوں کیتے گئے سلوک دا صدمہ ایس قدر بوہتا لیا کہ اوہ بستر مرگ نال جا لگے تے اک لمی علالت کٹی۔ جدوں صحت وِگڑدی گئی تے اک دن گوہر ایوب نوں بلایا تے آکھیا تہاڈے سسر نے میرے نال ناانصافی کیتی۔ ہن میں تہاڈے کولوں اک وعدہ لینا چاہنا واں کہ تہاڈا بھرا جہڑا ایس ویلے میجر اے انشاء اللہ جنرل بنے گا تے میری جگہ میرٹ اتے آرمی چیف وی منتخب ہووے گا۔ میں تے شاید اوس ویلے تک نہیں رہواں گا۔ تسیں’تہاڈا سسرال تے اوہناں دی سیاست میرے پتر علی قلی دے آڑے آوے گی تے اوہدے چیف بنن وچ رکاوٹ بنی تے تسیں علی قلی دا ساتھ دینا۔ ایس وعدہ مگروں جنرل حبیب خالق حقیقی نال جا ملے۔
وقت دا پہیہ گھمدا رہیا تے علی قلی جنرل بن گئے۔ اوہ جنرل جہانگیر کرامت دے منظور نظر ہون دے نال نال انتہائی پروفیشنل وی سن۔ جہانگیر کرامت نے چودھری نثار علی خان دے بھرا جنرل افتخار نوں ریٹائرمنٹ اتے ایکسٹینشن دین توں معذرت کر کے اوہناں دی جگہ جنرل علی قلی نوں پوسٹ کردتا ۔ ہن ایس گل دا انتظار ہون لگیا کہ جہانگیر کرامت ریٹائر ہون تے جنرل علی قلی اپنے والد دی تے اپنی خواہش دی تکمیل فوج دی سپہ سالاری اتے فائز ہو کے کرئیے مگر قدرت نوں شاید کجھ ہور ای منظور سی۔ چودھری نثار اپنے بھرا جنرل افتخار دا بدلہ علی قلی نال لین دی ٹھان چکے سن۔ چودھری نثار نے نواز شریف نوں سلو پائزننگ شروع کردتی کہ جے علی قلی آرمی چیف بنے تے مسلم لیگ گوہر ایوب خاندان دی لونڈی بن جاوے گی تے اسیں منہ تکدے رہ جان گے تے فیر کور کمانڈر منگلا جنرل پرویز مشرف نوں رات دے انھیرے وچ نواز شریف نوں ملوایا تے اک واری فیر 30ورھیاں مگروں جنرل حبیب دے سپوت جنرل علی قلی گوہر ایوب فیملی دی بھینٹ چڑھ کر موسٹ جونیئر دے ہتھی سپر سیڈ ہو کے گھر واپس آ گئے۔
دُوجی کہانی حیات اللہ سنبل دے خاندان دی اے جو سول سروس وچ انتہائی فرض شناس’ ایماندار تے اصول پسند افسر دے طور تے جانے جاندے سن۔ اپنے کیرئیر دے عروج اتے جدوں چیف سیکرٹری بنن دی واری آئی تے اوس ویلے دے وزیراعلیٰ غلام حیدروائیں نے حیات اللہ سنبل دا میرٹ اتے انتخاب کیتا تے اوس ویلے دے وزیراعظم نواز شریف نوں نام بھجوا دتا مگر قدرت نوں کجھ ہور ای منظور سی۔ نواز شریف نوں پرویز مسعود نے اپروچ کیتا تے نواز شریف نے حیات اللہ سنبل دی جگہ پرویز مسعود نوں چیف سیکرٹری پنجاب تعینات کردتا۔ ایس طرحاں اک فرض شناس افسر صرف ایس وجہ نال پنجاب دا چیف سیکرٹری نہیں بن سکیا کہ اوہ نوکری وچ سفارش اتے یقین رکھن دے بجائے کم اتے اکتفا کیتے ہوئے سن۔ حیات اللہ سنبل نے دل برداشتہ ہون دے بجائے اپنے دو پتراں سیف اللہ سنبل تے عبداللہ سنبل نوں مقابلے دے امتحاناں دی تیاری کرائی تے سول سروس وچ بھجوایا۔
ایہہ حیات اللہ سنبل دا مشن سی کہ اوہ اپنے
دونویں پتراں دی پرورش ایسی کرئیے کہ اوہ ڈِھڈ اتے پتھر بنھ کے سخت توں سخت حالات دا مقابلہ خندہ پیشانی نال کر سکن۔ سیف اللہ سنبل تے خوب توں خوب تر دی تلاش وچ نوکری چھڈ کے امریکہ شفٹ ہو گئے مگر عبداللہ سنبل نے جدوجہد جاری رکھی۔ اوہ اک محنتی’ فرض شانس’ ایماندار افسر دے طور تے پہچانے جان لگے۔ سارے اوکھے مرحلے طے کردے آخرکار اپنے والد دی خواہش نوں عملی جامہ پہنان وچ اللہ دی رضا تے اپنے والدین دی دعاواں نال کامیاب تے ہوگئے مگر عبداللہ سنبل نوں پہلی واری پتہ چلیا کہ جہناں نوں اوہ اپنا قریبی دوست سمجھدے سن اوہ اوہناں دی ایس کامیابی نال کنے نالاں نیں مگر اوہ سارے بھل کے قائداعظم دے فرمان دے مطابق کم’ کم تے صرف کم اتے جتے رہے تے اللہ پاک کولوں دعا گو رہے کہ میرے خلاف لابنگ کرن والیاں نوں ہدایت دے تے مینوں اپنی پناہ وچ رکھ۔ ویسے وی عبداللہ سنبل دے والد حیات اللہ سنبل اجے وی اپنے پتردی تربیت جاری رکھے ہوئے نیں۔ ہن تے حیا ت اللہ سنبل ہتھ وچ چھڑی وی پھڑے ہوندے نیں۔ عبداللہ سنبل دے خلاف جہڑے دوست احباب سازش کر رہے نیں اوہ اج وی اوہناں دے کم ایس امید دے نال کرا دیندے نیں کہ شاید اوہ وی اوہناں لئی مثبت جذبے رکھن لگن۔