شہریاں لئی تقریباں

محمد مظہر رشید چودھری

گیارہ نومبر 2022نوں اوکاڑہ دے عام تے خاص شہریاں لئی وکھری وکھری دو وڈیاں تقریباں جناح سٹیڈیم تے زیر تعمیر عمارت اوکاڑہ جمخانہ دے لان وچ منعقد کیتیاں گئیاں۔دونواں دا مقصد شہریاں نوں چنگی تے معیاری تفریح فراہم کرنا سی۔ جناح سٹیڈیم وچ منعقدہ کبڈی میچ لئی داخلہ فری سی جد کہ اوکاڑہ جمخانہ وچ رات نوں ہون والے میوزک تے ڈِنر پروگرام دا داخلہ باقاعدہ ممبرشپ حاصل کرن والیاں لئی 1950 روپے تے پروہنیاں لئی 3ہزار روپے فی کس رکھیا گیا سی۔ اشرافیہ تے اوہناں دے پروہنیاں لئی ہون والے پروگرام وچ گلوکارہ سائرہ رضا خاں’ ببو رانا تے اللہ رکھا نے حاضرین نوں اپنی پرفارمنس نال محظوظ کیتا۔
قارئین کرام!اک دن وچ دو تقریباں دا حاصل یقینا چنگا ای ہویا۔ کجھ گھنٹیاں لئی عوام اپنے معاشی مسئلے سنے شہر دی ٹُٹ پھٹ دا شکار گلیاں’سڑکاں تے سیوریج دے دیرینہ مسئلے نوں بھل گئے۔ ضلعی انتظامیہ دے پربندھ ہیٹھ تقریباں وچوں جے ذکر کراں جناح سٹیڈیم اوکاڑہ وچ نیشنل کبڈی ٹیم دے کھڈاریاںولوں ہون والے ٹاکرے دی تے ایہہ اک زبردست مقابلہ سی۔ جناح سٹیڈیم اوکاڑہ کروڑاں روپے دی لاگت نال دو دہائیاں پہلے بنایا گیا لیکن ایہدے تے مناسب توجہ نہ دین دی وجہ نال ایہدی عمارت ٹٹ پھٹ دا شکار ہون دے نال ایہدے گرائونڈ نوں کھیڈاں توں ہٹ کے دُوجی تقریباں لئی استعمال کیتا جان لگیا سی۔
ضلعی انتظامیہ نے ایہنوں وقتی طور تے رنگ و روغن کر کے ایس قابل ضرور بنادتا کہ شہریاںدی تفریح لئی ایتھے کھیڈاں دے مقابلے منعقد ہو سکن۔ گیارہ نومبرنوں نماز جمعہ مگروں کبڈی دا اک میچ ڈسٹرکٹ سپورٹس بورڈ تے ضلعی انتظامیہ نے منعقد کروایا۔ پاکستان گرین تے پاکستان وائٹ دی ٹیماں وچ کبڈی دازبردست مقابلہ ہویا۔جہدے وچ کمشنر ساہیوال ڈویژن جاویداختر محمود ، ڈپٹی کمشنر اوکاڑہ عرفان علی کاٹھیا، سرکاری اداریاں دے افسر’ وزیراعلیٰ پنجاب دے معاون خصوصی میاں عبدالرشید بوٹی’ رہنما پاکستان تحریک انصاف چودھری سلیم صادق’ مہر عبدالستار تے دُوجیاں نے رلت کیتی۔ سٹیڈیم دے آسے پاسے وڈے جہازی فلیکس اتے وزیراعلیٰ پنجاب چودھری پرویزالٰہی’ ڈپٹی کمشنر عرفان علی کاٹھیا’ پاکستان کبڈی ٹیم دے کھیڈاریاں دی تصویراں نمایاںکیتیاں گئیاں سن۔ پاکستان گرین ٹیم دی قیادت نیشنل کبڈی دے کھیڈاری شفیق چشتی نے کیتی جدکہ ٹیم دے دوجے کھیڈاریاں وچ ملک ذکا اللہ مانی، رانا علی شان، سجاد گجر، نویدجٹ، اجمل ڈوگر تے طاہرگجر جدکہ کوچ پاکستان کبڈی ٹیم
طاہر وحید جٹ،ریفری پاکستان کبڈی ٹیم جاوید جٹ ،ماسٹر محمد انور جٹ، کوچ پاکستان واپڈا کبڈی ٹیم شاہد اقبال جٹ، کبڈی وائٹ ٹیم کپتان بلال اسلم گل کھیڈاریاں وچ شاہ بہرام بھٹی، لالہ عبداللہ، نفیس گجر، مدثر سندھو، رانا نعیم تے عارف سیال شامل سن ۔
سانچ دے قارئین کرام! سینکڑاں شہریاں نے کبڈی دا میچ ویکھیا تے کھیڈاریاں نوں دل کھول کے داددتی’ پاکستان گرین نے پاکستان وائٹ نوں 33دے مقابلے وچ 37پوائنٹس نال شکست دے کے مقابلہ جت لیا۔ جتن والی کبڈی ٹیم دے کپتان شفیق چشتی نوں 2لکھ تے رنراپ ٹیم دے کپتان بلال اسلم نوں 1لکھ 25 ہزار دین دا اعلان کیتا۔ ایس موقعے تے اچیچے پروہنے کمشنر ساہیوال ڈویژن جاوید اختر محمود نے ڈپٹی کمشنر عرفان علی کاٹھیا دے نال میڈیا نال گل بات کردے آکھیا کہ وزیراعلیٰ پنجاب چودھری پرویزالٰہی دی ہدایت تے کھیڈاں دے فروغ لئی ضلعی انتظامیہ دے زیر اہتمام جناح سٹیڈیم اوکاڑہ وچ کبڈی ٹاکرے دا انعقاد کیتا گیا اے۔ کھیڈاں دے فروغ نال معاشرتی برائیاں دے خاتمے وچ مدد ملدی اے۔ حکومت کھیڈاں دے فروغ لئی ہر ممکن اپنا مثبت کردار ادا کرے گی تاں جے ودھ توں ودھ پارک تے سٹیڈیم آباد ہون۔ اوہناں نے کامیاب کبڈی میچ تے منتظمین سپورٹس آفیسر تے سارے متعلقہ محکمیاں دے افسراں دی کاوشاں نوں سراہیا۔