مینوں پتہ اے نواں آرمی چیف کیہڑا ہووے گا

پچھلے کئی مہیناں توں ایہہ بحث چل رہی اے کہ جنرل قمر جاوید باجوہ دی مدت ملازمت مگروں ملک دا نواں آرمی چیف کیہڑا ہووے گا۔ ایہدا سادہ جیا جواب ایہہ ہے کہ ملک دا نواں آرمی چیف اک فوجی جنرل ہووے گا۔ سیاسی جماعتاں اپنی پسند دے مطابق ملک دی ایس سب توں تگڑی پوسٹ لئی کوئی نام نامزد کروان دی خواہش وچ لگیاںہوئیاں نیں۔ جنرل قمر جاوید باجوہ نوں نواز شریف نے ایس عہدے لئی نامزد کیتا تے فیر عمران خان نے اوہناں دی مدت ملازمت وچ ہور تن سال توسیع کردتی لیکن اسیں سارے جاننے آں کہ دونویں ای قد آور سیاست داناں نوں مختلف وقتاں وچ اپنے پسندیدہ آرمی چیف کولوں مسائل رہے نیں۔ ماضی وچ وی انج دا ای سلسلہ چلدا رہیا اے کہ ملک دے وزیراعظم تے آرمی چیف دے درمیان دُوریاں نظام
نوں پیچیدگیاں وَل لے جان دا کارن بندیاں رہیاں نیں۔ ہن جد کہ اج کل جنرل قمر جاوید باجوہ فوجی افسراں نال الوداعی ملاقاتاں کر رہے نیں تے اپنے خطابات وچ پاک فوج دے کردار تے جواناں دی بہادری اتے اوہناں نوں خراج تحسین پیش کر رہے نیں۔ یعنی ہن ایہہ طے ہو چکیا اے کہ اوہ کجھ دناں مگروں خاکی وردی اتار دین گے تے اوہناں دی جگہ اوہناں دا عہدہ کوئی ہور سنبھال لووے گا۔ ایہدے باوجود ٹی وی چینلاں اتے ایہہ خبراں وی گردش کررہیاں نیں کہ اوہناں دی مدت ملازمت چھ مہینے توں اک سال تک ودھان دا سوچیا جا رہیا اے۔ایہہ بہت مایوس کن گل اے کہ تہانوں اینی باصلاحیت فوج دے باقی لوکاں اتے شک اے کہ اک ایسا پاکستانی جہنے اوائل جوانی توں ایس محکمے نوں اپنا مقصد حیات بنا لیا تے فیر اپنی محنت’ قابلیت’ پیشہ وارانہ صلاحیتاں تے کئی قسماں دے امتحانات پاس کرن مگروں فوج وچ ایس عہدے نوں پا لیا جتھے پہنچن والے نوں دنیا دی طاقتورترین فوج دی کمان سنبھالن دا اہل جانیا جاندا اے ایس لئی جنرل قمر باجوہ مگروں جو وی ایس عہدے لئی سامنے آوے گا اوہدی صلاحیتاں تے ملک نال محبت اتے شک کرنا گویا پورے محکمے اتے سوالیہ نشان لگانا
اے۔ ایس لئی خدارا! سیاسی لوکاں نوں چاہیدا اے کہ ا یس عہدے نوں متنازع نہ بنان بلکہ جو وی جنرل نامزد ہووے اوہدے اتے اعتماد کیتا جاوے۔ میرا خیال تے ایہہ اے کہ ایس عہدے لئی اک طریقہ کار طے کر لیتا جانا چاہیدا اے کہ کسے آرمی چیف دی مدت ملازمت ختم ہون مگروں پچھے موجود سینئر ترین جرنیل خود بخود اپنے پیش رو دی جگہ فوج دی کمان سنبھال لووے۔ پاکستانی سیاست دان وی کاش ایس نقطے نوں سمجھ لین کہ ہر آرمی چیف سب توں پہلے اک فوجی ہوندا اے تے اوہناں لئی ایہناں افسراں نال تعلقات بہتر رکھن وچ آسانی ہو سکدی اے۔ میں بچپن توں خود نوں فوج نال شدید محبت کرن والا سمجھیا اے جہدے بھرا’ پیو تے دادا تک فوج وچ خدمات انجام دیندے رہے ہون۔ اک چاچا فوجی وردی وچ پہلی پاک بھارت جنگ وچ کشمیر دے محاذ اتے شہادت دا جام پی چکیا ہووے۔ا یہدے بارے تسیں سوچ سکدے او کہ تہاڈے لہو وچ فوج نال کیہ عقیدت ہووے گی لیکن اج کل عوام وچ فوج بارے جہڑی گلاں ہوندیاں نیں جیویں ایس محکمے نال جڑے افسراں نوں لے کے سماجی رابطیاں اتے مہم چلائی جاندیاں نیں اوہدے اتے دل دکھی ہوندا اے۔تے دلوں دعا نکلدی اے کہ فوجی اک واری فیر توں پہلے جئے ہو جان۔ سرحداں دی حفاظت کرن والے بہادر جہناں دا نام لیندے قوم نوں اپنا سب کجھ محفوظ لگدا سی۔ عوام دے تخیلاتی ہیرو۔ جہناں نوں دوروں ویکھدے ای معصوم بچے سلیوٹ مارن لگدے تے وڈے دعا لئی ہتھ چکدے۔ اک ویلا سی کہ قوم دے ایہہ بہادر جوان عوام نوں گھٹ گھٹ ای نظر آیا کردے سن۔ عام لوکاں دی نظراں توں دور فوجی چھائونیاں وچ’ پہاڑاں اتے’ ریگستاناں وچ ویرانیاں وچ تے محاذ جنگ اتے ہر ویلے دشمن دے مقابلے لئی
خود نوں تیار رکھن والے دھرتی دے پتر جہناں نوں اوہناں دی ماواں وطن دی حفاظت لئی پیدا کردیاں ہون تے اوہ ماں دے ددھ دا حق ادا کرن لئی اپنی جان تک قربان کرن توں ذرا وی ہچکچاندے نہ ہون۔ سیلاب یا کسے دوجی آفت دے شکار لوکاں دی مدد کرن لئی جیویں ای خاکی وردی والے ایہہ جوان پہنچدے تے لوک تالیاں وجاندے ہوئے’ نعرے لاندے ہوئے اوہناں دا استقبال کردے۔ اوہناں دی بہادری تے صلاحیتاں نوں ویکھدے ہوئے ایہہ فوجی نوعمر منڈیاں دے آئیڈیل بندے۔ الہڑ مٹیاراں دے سفنیاں دے شہزادے بندے جہناں دی ووہٹیاں بنن لئی اوہ ہر جمعرات بابا دے دربار اتے دیوے بالن لگدیاں لیکن فیر نہ جانے کیہ چکر چلیا کہ جہناں نوں دوروں ویکھن دی عادت سی اوہ ہر کدھرے عام ہو گئے۔ ہر پرائیویٹ دفتر وچ’ ہر کاروبار وچ تے جہناں نوں عوام کوئی خلائی مخلوق یا ہیرو سمجھدی سی اوہ بہادر کسے جنگ یا آفت دے بغیر وی جدوں ہر کدھرے ویکھے جان لگے تے اوہناں دی کشش گھٹ ہون لگی۔ پورے محکمے دا کوئی بندہ کسی پرائیویٹ بندے دے نال کسی بازار وچ الجھدا تے عوام دی انگلیاں سارے محکمے وَل اُٹھن لگیاں۔ ملک نوں ات گردی توں پاک کرن لئی جاناں قربان کرن والی سپاہ دے بہادر’ جراتمند تے ذہین ترین لوکاں بارے سماجی رابطیاں اتے اوہ لوک وی گلاں کرن لگے کہ جہناں نوں اپنے گھر وچ وی کوئی گل نہ کرن دیندا ہووے۔ لوک پچھدے نیں کہ ہن ایہہ ممکن اے کہ فوج پہلے وانگوں فیر توں چھائونیاں’ تربیت گاہواں تے بارڈر تک محدود رہے۔ ایہدا وی اک سادہ جیا جواب اے کہ سیاست داناں نوں جدوں اقتدار مل جاوے تے منی لانڈرنگ’ اقربا پروری’ شاہ خرچیاں’ محلات بنان تے ذاتی خواہشاں دی تکمیل دی بجائے ملک نوں فلاحی ریاست بنان لئی اپنی صلاحیتاں توں ودھ کے کم کرن دی کوشش کرن۔ اپنی دولت تے اپنے بچے ملک وچ ای رکھن۔