مجھے کہنا کچھ اپنی زبان میں

محمد آصف بھلی

بیگم مہناز رفیع نوں ممتاز صحافی مجید نظامی مرحوم اک نظریاتی تے بااصول سیاست دان کہیا کردے سن۔ مہناز رفیع دے والد گرامی چودھری محمد رفیع (پرانے مسلم لیگی لیڈر) تحریک پاکستان دے عظیم لیڈر نواب بہادر یار جنگ دے قریبی ساتھی سن۔ اپنے والد دی سیاسی تربیت دی وجہ نال مہناز رفیع نے اپنی 36 سالہ بھرپور سیاسی زندگی وچ قائداعظم تے علامہ اقبال نوں اپنا رول ماڈل سمجھیا۔ اوہناں نے اپنی ساری زندگی اوس پاکستان دی تلاش وچ گزار دتی جہڑے پاکستان نوں قائداعظم تے علامہ اقبال دے سفنیاں دی عملی تفسیر قرار دتا جا سکدا ہووے۔
بیگم مہناز رفیع نے سیاست وچ سچ بولن تے اوس سچ لئی قربانیاں دین تے جیلاں دیاں تکلیفاں برداشت کرن دا اوکھا رستہ اختیار کیتا۔ اوہناں نے اوس منافقانہ سیاست دا حصہ بنن توں ہمیشہ انکار کردتا جہڑی منافاقانہ سیاست دا ساڈے ملک وچ عام رواج اے۔ بیگم مہناز رفیع دا ایہہ کہنا اے کہ ساڈے ملک تے قوم دے
حالات اوس ویلے تک کیویں تبدیل ہو سکدے نیں جدوں تک ساڈے ملک دے وڈے وڈے سیاستدان جھوٹ تے منافقت دی سیاست دے علمبردار ہون۔جتھے لیڈر عوام نوں بیوقوف بنان دے عمل نوں اپنا فن سمجھدے نیں تے جتھے سیاست داناں دا عمل ہمیشہ اپنے نعرے’ وعدیاں تے تقریراں دے الٹ ہووے اوتھے قوم دی قسمت وچ چنگے دن کیویں آ سکدے نیں۔ مہناز رفیع دا ایہہ وی دکھ اے کہ اللہ تعالیٰ نے اپنے فضل و کرم نال پاکستان دے بے پناہو سائل دے رکھے نیں لیکن دیانتدار’ مخلص تے محب وطن قیادت نہ ہون دی وجہ نال پاکستان وچ اَج وی سیاست سرمایہ د اراں تے جاگیرداراں دی لونڈی بنی ہوئی اے جہدا نتیجہ ایہہ اے کہ کجھ مخصوص سیاسی خاندان تے پاکستان دی دولت اتے قابص نیں مگر وطن عزیز دے غریب عوام دی حالت 75 ورھیاں مگروں وی نہیں بدلی۔ بیگم مہناز رفیع کہندیاں نیںکہ ساڈے حکمراناں دے دِلاں وچ نہ تے اللہ دا خوف اے تے نہ ای ایس گل دا احساس کہ اوہناں دا تعلق اللہ دے اوس آخری نبیۖ دی امت نال اے جہڑے دنیا وچ معاشی مساوات تے معاشرتی انصاف دا مکمل نظام لے کے آئے سن۔ ساڈے حکمراناں نوں قصر صدارت تے وزیراعظم ہائوس دے نال نال پارلیمنٹ دے ارکان تنخواہاں وچ وادھے دی تے فکر اے لیکن ایس غریب عوام توں اوہناں حکمراناں دے دل وچ معمولی ہمدردی وی نہیں جہناں نوں اک ویلے دی روٹی وی میسر نہیں تے جہناں والدین دے کروڑاں بچے بنیادی تعلیمی سہولتاں توں وی محروم نیں۔ بیگم مہناز رفیع نے اپنی کتاب ”مجھے کہنا ہے کچھ اپنی زبان میں” وچ ایہہ سوال وی چکیا اے کہ ساڈے عظیم پیغمبر حضرت محمدۖ نے دعا کیتی سی کہ اے اللہ”میں غریباںوچ رہیا واں تے مینوں غریباں وچ ای چکنا”۔
ساڈے جہڑے حکمران غریب عوام نوں پین لئی پانی وی فراہم نہیں کر سکدے تے اپنی پرتعیش زندگی اُتے کروڑاں روپے ضائع کردیندے نیں اوہ قیامت دے دن نبی پاکۖ دی نظراں دا سامنا کیویں کرن گے؟ مہناز رفیع نے اپنی کتاب وچ ایہہ وی لکھیا اے پاکستان وچ امیر طبقہ امیر تر تے غریب عوام غریب تر ہون دی وجہ سیاست وچ انتہا درجے دی کرپشن تے بدعنوانی اے۔
پاکستان تے اوس نظام حیات دی بنیاد اتے حاصل کیتا گیا سی جہڑے نظام وچ سارے انسان برابر سمجھے جاندے نیں تے سارے انساناں لئی یکساں ترقی کرن دے موقعے ہوندے نیں لیکن قائداعظم’ لیاقت علی خاں تے سہروردی جئے سیاستداناں مگروں خودغرض سیاستداناں نے پاکستان دے اساسی نظریے نوں فراموش کردتا تے جہڑے ملک قائداعظم دے تصورات دے مطابق اک جدید اسلامی تے فلاحی ریاست بننا سی اوہ ملک دولت دی ہوس وچ مبتلا سیاست داناں نے اُجاڑ کر رکھ دتا اے۔
مہناز رفیع نے اگرچہ کتاب دی صورت وچ اپنی سیاسی آپ بیتی تحریر کیتی اے لیکن اوہناں نے پاکستان دے اوہ سارے سیاسی حالات تے واقعات وی بیان کیتے نیں جہناں دا پچھلے 36 ورھیاں وچ اوہناں نے براہ راست مشاہدہ کیتا اے۔ مہناز رفیع نے اپنی کتاب وچ جہڑے سیاستدان دی سب توںودھ تعریف کیتی اے اوہ ائیر مارشل محمد اصغر خاں نیں تے جہڑے سیاستدان اتے سب توں ودھ تنقید کیتی اے اوہ محمد نواز شریف نیں۔مہناز رفیع دا موقف ایہہ اے کہ نواز شریف نے پاکستان وچوں اصولاں تے نظریات دی سیاست وچ دولت دے استعمال نوں متعارف کروایا اے۔ سیاسی کارکناں تے عام ووٹراں نوں دولت نال خریدن دی رسم بد دی بنیاد نواز شریف نے رکھی اے۔ اوہناں دی سیاست وچ آمد دا مقصد اک ای اے کہ دھن دولت خرچ کر کے اقتدار وچ آئو تے اقتدار وچ آ کے اندھا دھند دولت جمع کرو۔
بیگم مہناز رفیع نے نواز شریف نوں فطری طور تے خوشامد پسند قرار دتا اے۔ نواز شریف صرف چاپلوسی تے خوشامدی لوکاں نوں پسند کردے نیں تے کم کرن والے محض سیاسی کارکناں نوں اوہ کدی اہمیت نہیں دیندے۔بیگم مہناز رفیع نے ایہہ شکوہ وی کیتا اے کہا وہناں نے مسلم لیگ (ن) لئی مشکل حالات وچ وڈی قربانیاں دتیاں لیکن جدوں سینٹ لئی اوہناں نے اپنی جماعت دے ٹکٹ لئی درخواست دتی تے اوہناں نوں نظر انداز کر کے سپریم کورٹ دے دو پچھلے ججاں نوں مسلم لیگ (ن) دا ٹکٹ دے دتا گیا۔ جہناں ججاں نے نواز شریف اتے ذاتی مہربانیاں کیتیاں سن مگر پارٹی لئی اوہناں دی کوئی خدمات نہیں سن۔
مہناز رفیع نے نواز شریف نوں آمرانہ سوچ رکھن والے سیاستدان دا نام دتا اے۔ اوہناں دا کہنااے کہ نوازشریف وچ کلی اقتدار تے اختیارات حاصل کرن دی اینی ہوس سی کہ اوہ اک آئینی ترمیم دے ذریعے خود نوں پاکستان د امیر المومنین بنانا چاہندے سن تے پارلیمنٹ دی بالادستی نوں ختم کر دینا چاہندے سن لیکن پارٹی دے ارکان اسمبلی نے اوہناں دی ایہہ کوشش نکام بنا دتی۔ نواز شریف دا ملک دے آئین دا چہرہ مسخ کر کے خود نوں امیر المومنین بنان دا سفنا پورا نہ ہون دین وچ سب توں اہم کردار خورشید محمود قصوری نے ادا کیتا سی۔
محترمہ مہناز رفیع نے نواز شریف اتے احسان فراموشی تے طوطا چشمی دا الزام وی عائد کیتا اے۔ اوہناں نے میاں محمد اظہر دا حوالہ دیندے ہوئے کہیا کہ نواز شریف دے خاندان اتے میاں محمد اظہر تے اوہناں دے وڈے بھراں دے بہت احسان سن لیکن نوازشریف ولوں جہڑا سلوک میاں اظہر نال کیتا گیا تے جیویں اوہناں نوں پارٹی توں کڈیا گیا ایہہ انتہائی افسوسناک واقعہ سی۔ مہناز رفیع نے اپنی کتاب وچ تحریر کیتا اے کہ چودھری شجاعت حسین سنے جس کسی نے وی نواز شریف اتے احسان کیتا اے تے اوہناں دے فیدے لئی کوئی کم کیتا اے’ نواز شریف نے اوہنوں نقصان ضرور پہنچایا اے۔ مہناز رفیع نے اپنی کتاب وچ بزرگ سیاستدان نوابزدہ نصراللہ خاں دے اک تریخی بیان دا حوالہ وی دتا اے جہڑا اوہناں نے نواز شریف بارے وچ دتا سی۔ جدوں پرویز مشرف دے نال باقاعدہ اک معاہدہ کر کے نواز شریف اپنے خاندان سنے سعودی عرب چلے گئے سن تے نوابزادہ نصراللہ خاں نے کہیا سی کہ ”میری سب توں وڈی غلطی ایہہ اے کہ میں اک تاجر نوں سیاستدان سمجھ لیتا سی”۔
اپنے حوالے نال سچ سننا اگرچہ بہت اوکھا کم اے لیکن اسیں فیر وی نواز شریف صاحب نوں ایہہ مشورہ دیاں گے کہ اوہ مہناز رفیع دی ایہہ کتاب ضرور پڑھن۔ ہو سکدا اے کہ جدوں ٹھنڈے دل تے دماغ دے نال نوازشریف اک مخلص سیاستدان مہناز رفیع دی ایس کتاب دا مطالعہ کرن گے تے کجھ مثبت گلاں اوہناں دے دل وچ وی اتر جان جہڑے مستقبل وچ اوہناں لئی بہت مفید ثابت ہون۔