ایتھے کون شرمندہ ہوندا اے ؟
سعد اللہ شاہ
ساڈی نظر حضرت بلاول دے بیان تے پے گئی کہ برطانیہ نے پاکستان نوں ہائی رسک تھرڈ ملکاں چوںکڈھ دتا اے۔ میں بڑے چر تک سوچدا رہیا کہ ایہ تھرڈ کنٹری کیہ ہوندا اے۔ اصل وچ تھرڈ کلاس رہنماواں یاں لیڈراں پاروں ای ایس مقام نوں اپڑنے آں۔ تسیں ایہ نہ سمجھو کہ میں تھرڈ ورلڈ نوں نہیں سمجھدا۔ سمجھنا واں سگوں تھرڈ صنف نوں وی جاننا واں۔ ایس دنیا وچ رہن لئی سب کجھ جاننا پیندا اے۔ جناب بلاول لئی خوشخبری اے کہ ہائی رسک تھرڈ کنٹریز چوں نکل گئے۔ میرا خیال اے تھرڈ درجے دے لوکاں نوں ملک چوں کڈھ دینا چاہیدا اے۔ کجھ تے ایہدی جسارت آپ ای کر لیندے نیں۔ تسیں لوکاں نے ایس ملک وچ چھڈیا کیہ اے۔ تہاڈی دلچسپی سوئس بینک بھرن تک محدود رہی۔ برطانیہ تے دبئی تہاڈیاں آماجگاہ نیں۔ ایس حوالے نال کوئی وی مستثنیٰ نہیں۔ کیہ بلاول ایہ کدی نہیں سوچدے کہ کیہ اوہناں نوں تحفے وچ ملن والا محل حلال دولت دا اے۔ پر پچھے کون کہ پچھن والے نوں ایس لیڈر’ ایس سٹیک ہولڈر دا پانی بھردے نیں۔
وڈیاں وڈیاں کلیدی اسامیاں توں ریٹائر ہون دے بعد ایتھے زانوائے تلمذ طے کردے نیں تے پراپرٹی ڈیلنگ دے گُر سکھدے نیں۔ ہائے پورا پاکستان ای کسے نہ کسے دی پراپرٹی اے۔ ایتھے تے اوہ صرف کمان لئی بیٹھے نیں۔ آ سودگی اوہناں نوں باہر ای ملدی اے کہ اوہناں دی راحت ایتھے نہیں۔ ہن تھرڈ ورڈ دی گل چھڈو۔ ایہ جو سانوں خوشخبریاں سناندے نیں اوہناں نے کدی سانوں ہوش آن ای نہیں دتا۔ ونڈن والیاں نے وی اوہناں نوں اپنے علاقے ونڈ رکھے نیں۔ ونڈن توں تہانوں اوہ کہاوت ضرور یاد آئی ہووے گی جہدے وچ دو بلیاں انصاف لئی باندر دے کول گئیاں سن۔ ساری روٹی ایس انصاف وچ باندر دے کم آئی۔ ساڈا مقصد کسے نوں شرمندہ کرنا نہیں کہ اوہ تے اسیں کر نہیں سکدے۔ ایتھے کون شرمندہ ہوندا اے۔ رات کجھ گل کیتی جاندی اے تے سویرے بیانیہ بدلیا ہوندا اے تے کمال ایہ کہ حرام اے کسے دے متھے تے کوئی شرمندگی دا قطرہ وی ہووے۔ ہر دم تغیر چنگا اے ٹھہرے پانی تے کائی جم جاندی اے پر ایہ رولنگ سٹون وچ یعنی گھمدے پتھر جہدے تے کجھ نہیں ٹھہردا کیہ کریئے سانوں اوہناں نے اپنے اثر وچ رکھیا ہویا اے۔
وائٹ ہائوس ایہناں ساریاں دا کعبہ اے نہیں تے اسیں سوچدے سی کہ کعبہ کس منہ سے جائو گے غالب۔ شرم تم کو مگر نہیں آتی۔ ایہ گل سانوں پروفیسر جاویداکرم نے لکھ کے گھلی کہ ایہناں دا کعبہ وائٹ ہائوس اے۔ فیر غالب یاد آیا۔ ایماں مجھے روکے ہے تو کھینچے ہے مجھے کفر۔ کعبہ میرے پیچھے ہے کلیسا میرے آگے۔ ایہ سب توں وڈی سچائی اے کہ کرتوت ساڈے سارے ای اجہے نیں۔ جدوں رہنماواں دیاں عیداں شبراتاں اوتھے ہون گئیاں تے قوم کیہ سوچے گی۔ ہن تے سیاست وی آن لائن باہروں ہو رہی اے۔ ہن اوہناں دے کیس وی باہر لگدے نیں۔ ساڈے کرکٹر وی تے جوأ باہر جا کے لاندے نیں تے فیر سزا پاندے نیں ہور تے ہور آصف ورگا بائولر وی ایس کم وچ ذلیل و خوار ہو گیا۔ اوہنے جان بجھ کے عطائے خداوندی دی ناشکری کیتی۔ ایہ وی انج ای نیں اللہ نے ایہناں نوں محلات نال نوازیا پر جلاوطنی دی صعوبت وچ نیں۔ لوکاں دے دلاں چوں وی نکلدے جا رہے نیں ہن اسیں وی انج ای ہوئے جا رہے آں۔
چلو ایس توں کجھ اگے چلنے آں کہ کجھ پوسٹاں ادب دے حوالے نال مزہ دے جاندیاں نیں۔ کسے نے خوب لکھیا کہ اپنے رہنما لئی لوک اینے ہٹ دھرم ہو جاندے نیں کہ اوہناں دی عادت بن جاندی اے۔ فیر کسے گل تے اوہ شرمندہ ہون دی کوشش وی کرن تے اوہناں دے اندروں آواز آندی اے کہ ایہ سہولت تہانوں حاصل نہیں۔ سچی تے سدھی گل تے ایہو اے کہ کسے دے کول فخر کرن دی کوئی گل ہے ای نہیں۔ ن لیگ والیاں توں جدوں وی پچھو کہ بائوجی واپس کدوں آن گے اوہ اگوں فرماندے نیں عمران بڑا دھوکھے باز اے۔ اوہنے نوازشریف توں پلاٹ لیا سی۔ زرداری دے مداحواں توں کجھ پچھو تے اوہ کہندے نیں کہ عمران نے آپ کہیا سی کہ اوہ صرف اک ای سیاسی لیڈر توں متاثر اے اوہ نیں آصف علی زرداری۔ انج زرداری دے متاثرین وچ تے کئی لوک نیں۔ کسے دے سینئر ہون وچ دیر ای کنی لگدی اے۔ اوہ تے تسیں جان دے ای او کہ کسے نے اک لکیر کھچی تے کہیا کہ ایہنوں ٹچ کیتے بناں چھوٹا کر دیو۔ اک سمجھدار بندے نے کاغذ پھڑ کے اوہدے برابر وچ وڈی لکیر کھچ دتی۔ ایہ لکیر بھٹو نے وی کھچی سی تے فیر اوسے نے بھٹو تے لکیر کھچ دتی سی۔ بس اینی ای گل کافی اے کہ خطرناک ہو جاوے گی۔
آخری گل فاطمہ قمر دی۔ کہندیاں نیں سو گڈیاں نے عمران خان دے بچیاں دا استقبال کیتا تے پنج ہزار پولس والے حفاظت تے لگے سن۔ خان تے ایس کلچر نوں ختم کرن آیا سی۔ میں ہس پیا کہ ایس کلچر نے خان دے آدرش ای بدل دتے۔ دل کہندا اے کہ اوہدے بچے وی موروثی سیاست دا شکار ہو جان گے کہ سو گڈیاں دا جلوس دماغ خراب کر دیندا اے۔٭
