پِلاک ولوں منے پرمنے شاعراعجاز حسین بھٹی دے اعزاز وچ اکٹھ

پنجاب انسٹیٹیوٹ آف لینگوئج’ آرٹ اینڈ کلچر (پلاک) وچ امریکہ توں آئے پنجابی دے منے پرمنے شاعر اعجازحسین بھٹی دے اعزاز وچ شام دا پربندھ کیتا گیا۔ ایہہ تقریب دوسیشناں اتے مشتمل سی۔ پہلے حصے وچ اعجاز حسین بھٹی دے فن تے شخصیت اتے گل بات ہوئی۔ دُوجے حصے وچ اعجاز حسین بھٹی دے اعزاز وچ خصوصی محفل مشاعرہ دا پربندھ کیتا گیاجہدی صدارت منے پرمنے پنجابی شاعر تے محقق ثروت محی الدین نے کیتی جد کہ شاعراں وچ صوفیہ بیدار، رخشندہ نوید، عرفان صادق، امجد اقبال امجد، انیس احمد، نصیر احمد نصیر، انمول گوہر، افی گجر، جی اے نجم، ڈاکٹر صغرا صدف تے ڈاکٹر خاقان حیدر غازی شامل سن۔ ڈائریکٹر جنرل پلاک ڈاکٹر صغرا صدف نے پروہنیاں نوں پھل پیش کیتے تے نیک خواہشاں دا اظہار کیتا۔