کھیڈ، بالاں دی کردار سازی تے نفسیاتی تربیت وچ معاون

ایس حقیقت توں انکار ناممکن اے کہ کھیڈ بالاں دی بہتر نشوونماوچ معاون ہون دے نال اوہناں دی کردار سازی تے نفسیاتی تربیت وچ وی مدد گار ثابت ہوندے نیں۔ تن دہائیاں پہلاں وطن عزیز پاکستان دے تعلیمی اداریاں وچ مختلف قسم دے کھیڈ تے صحت مندانہ سرگرمیاں باقاعدگی نال کروائیاں جاندیاں سن تاں جے بالاں نوں صحت مند بنا کے مطلوبہ اہداف دا حصول ممکن بنایا جا سکے۔ مگروں ایہہ سلسلہ ویسے نہیں چلایا گیا جیویں پہلے ہوندا سی۔ ایہہ وی حقیقت اے کہ صحت مند بچے ای تعلیمی میدان وچ اہم کردار ادا کردے نیں۔ موبائل’ کمپیوٹر’ لیپ ٹاپ تے اِنڈور گیماں کھیڈن والے تے خاص طور تے ایسے پرائیویٹ ادارے جہناں دی محدود رقبہ اتے عمارت قائم ہوندی اے اوتھے طلبہ وچ کھیڈاں دے وَڈے مقابلے نہ ہون دے برابر نیں جہدی وجہ نال طلبہ دی جسمانی تے ذہنی صلاحیتاں نوں پرکھن دا موقع نہیں ملدا۔ وطن عزیز پاکستان وچ 20دے کول کیڈٹ کالج طلبہ دی ذہنی تے جسمانی صلاحیتاں نوں ہور بہتر کرن لئی تعلیم تے تدریس دے
نال ہم نصابی تے کھیڈاں اُتے اچیچی توجہ دیندے نیںجہدے توں طلبہ وچ نظم وضبط دے نال جت تے ہار نوں بہتر انداز وچ منان دا سلیقہ آندا اے۔ میچ ہارن والی ٹیم دے ممبران جتن والی ٹیم دے ممبران نوں مبارکباد دیندے نیں تے ہارن والی ٹیم دے ممبران اک نویں جذبے نال آئندہ جت لئی ہور تیاری کردے نیں۔ پچھلے دِناں کیڈٹ کالج اوکاڑہ وچ چھ روزہ کھیڈاں دے سالانہ مقابلے ہوئے۔ راقم الحروف نوں اختتامی تقریب دے اُچیچے پروہنے بنائے جان دے کارڈ ادارہ دے پرنسپل تے سٹاف ولوں موصول ہویا۔ کیڈٹ کالج اوکاڑہ تقریباً گیارہ ورھیاں توں پوری تعلیمی سرگرمیاں جاری رکھے ہوئے اے جہدی تعمیر وچ پچھلے وزیر دفاع مرحوم رائو سکندر اقبال دا بڑا اہم کردار رہیا۔ کالج دے پہلے ڈائریکٹر مرحوم پروفیسر رائو ظفر اقبال نے ایہدی تعمیر دے دوران سول سوسائٹی ‘ میڈیا نوں ہر موقعے اتے بریفنگ دین دا سلسلہ جاری رکھیا سی جہدی وجہ نال کیڈٹ کالج اوکاڑہ اک ویلے وچ دانش سکول وچ تبدیل ہون توں محفوظ رہیا تے اوکاڑہ وچ کیڈٹ کالج باقاعدہ فعال ہو گیا سی۔ قارئین کرام! راقم الحروف سالانہ سپورٹس دے مقابلیاں دی اختتامی تقریب وچ بطور اچیچے پروہنے ویلے تے کالج پہنچیا تے فٹبال گرائونڈ دے گیٹ اتے پرنسپل پروفیسر عامر رئوف’ وائس پرنسپل لیاقت علی’ پبلک ریلیشنز آفیسر نجیب الہق تابش نوں اپنا منتظر پایا۔ انتہائی پرتپاک انداز وچ
استاداں تے طلبہ نے استقبال کیتا جہناں نوں ہمیشہ اپنی زندگی وچ یاد رکھاں گا۔ پرنسپل عامر رئوف نے راقم الحروف (محمد مظہر رشید چودھری) نوں دسیا کہ چھ دناں توں جاری سالانہ سپورٹس انٹر ہائوس مقابلیاں وچ طلبہ نے اپنی بھرپور صلاحیتاں دا مظاہرہ کیتا اے۔ آخری دن رسہ کشی دے مقابلے ہو رہے نیں جہدے مگروں تقسیم انعامات دی تقریب وچ کامیاب طلبہ (کھیڈاریاں) نوں میڈل تے مجموعی طور تے بہتر کارکردگی وکھان والے ہائوس نوں ٹرافی جد کہ رنراپ نوں وی ٹرافی دِتی جاوے گی۔اوہناں نے ہور دَسیا کہ چھ دناں دے مقابلیاں وچ ہر دن مختلف شعبہ ہائے زندگی نال جڑیاں نمایاں شخصیات نوں مدعو کیتا گیا تاں جے طالبعلماں نوں مختلف شعبیاں وچ مہارت رکھن والیاں توں آگاہی ملے تے اوہ سمجھ سکن کہ صرف ڈاکٹر یا انجینئر بن کے ای ملک و قوم دی خدمت تے اپنا نام روشن نہیں کیتا جا سکدا بلکہ دُوجے شعبے جہناں وچ سول سرونٹس’ وکیل’ کھیڈاری’ صحافی’ استاد وی اپنی محنت تے جذبے نال اپنا اک وکھرا مقام پا سکدے نیں۔ پرنسپل نے ہور دسیا کہ بورڈ آف انٹرمیڈیٹ اینڈ سیکنڈری ایجوکیشن ساہیوال دی سیکرٹری رابعہ اختر’ طاہر شریف گجر (ڈپٹی سیکرٹری پنجاب ہاکی فیڈریشن تے سیکرٹری انجمن تاجران اوکاڑہ) ‘اسلم بلوچ (صدر ڈسٹرکٹ ہاکی فیڈریشن اوکاڑہ) نے وکھرے دناں وچ طلبہ دے مقابلے ویکھے۔
قارئین! چھ روزہ کھیڈاں دے مقابلیاں وچ کرکٹ’ ہاکی’ فٹبال’ والی بال’ باسکٹ بال’ ایتھلیٹکس وچ طلبہ نے بھرواں حصہ لیتا۔ پرنسپل پروفیسر عامر رئوف’ وائس پرنسپل پروفیسر لیاقت علی نے اختتامی تقریب دے اچیجے پروہنے راقم الحروف (جرنلسٹ/ صدر سماجی تنظیم’ماڈا’ محمد مظہر
رشید چودھری)دا تعارف سپورٹش ایڈیجوٹینٹ کیپٹن عزیز’ سپورٹس آفیسر صدام حسین’ پبلک ریلیشن افیسر نجیب الحق تابش سنے استاداں نال کروایا۔ کیڈٹ کالج اوکاڑہ وچ تن زنانیاں سنے 37استاد ‘520توں ودھ کیڈٹس نوں زیور تعلیم توں آراستہ کر رہے نیں۔ انٹر ہائوس کرکٹ چیمپئن شپ فٹبال تے ایتھلیٹکس وچ سکندر ہائوس نے کامیابی حاصل کیتی جد کہ باسکٹ بال اقبال ہائوس’ ہاکی جوہر ہائوس تے والی بال وچ جناح ہائوس نے جت اپنے نام کیتی۔ تقسیم انعامات دی رنگا رنگ تقریب نال خطاب کردیاں ہوئیاں اچیچے پروہنے راقم الحروف (مظہر رشید چودھری)
نے کہیا کہ نصابی سرگرمیاں دے نال نال کھیڈاں دے مقابلے طلبہ لئی بہت ضروری نیں۔ کھیڈاں توں ٹیم ورک تے سپورٹس مین سپرٹ جئی اہم زندگی دی مہارتاں سکھن دا موقع ملدا اے۔ پرنسپل پروفیسر عامر رئوف نے ایس موقعے تے کہیا کہ کیڈٹ کالج اوکاڑہ وچ ہر سال کھیڈاں دے مقابلے کرائے جاندے نیں تاں جے طلبہ وچ کھیڈاں دی سرگرمیاں وچ حصہ لین توں اوہناں دی صلاحیتاں نوں پرکھن دا موقع ملے۔ تعلیم دے نال نال کھیڈاں تے دُوجی ہم نصابی سرگرمیاں دی اہمیت نوں نظرانداز نہیں کیتا جاندا جہڑا کہ طلبہ دی شخصیت دی نشوونما لئی اہم اے۔ مگروں اچیچے پروہنیاں نے پرنسپل پروفیسر عامر رئوف دے نال سپورٹس مقابلیاں وچ نمایاں کارکردگی دا مظاہرہ کرن والیاں نوں گولڈ’ سلور تے برائون میڈل پہنائے جد کہ آخری دن سکندر ہائوس نوں شاندار کارکردگی اتے اول آن تے ہائوس ماسٹر محسن رشید تے کھیڈاریاں نوں ٹرافی دتی گئی جد کہ رنراپ ٹرافی جناح ہائوس دے ماسٹر اظہر سلطان تے کھیڈاریاں نوں دِتی گئی۔