ڈاکٹر عارف علوی ہور کیہ کرن
مظہر برلاس
صدر مملکت ڈاکٹر عارف علوی نے پچھلے دیہاڑیاں لہور وچ دو تن تھاواں تے بڑی اہم گل بات کیتی۔ تن تھاواں تے اوہ اک مکمل دانشور تے صلح جو آدمی دے روپ وچ نظر آئے۔ میں ایتھے تریجی تھاں تے ہون والی گل بات مکمل طور تے بیان نہیں کر سکدا حالاں کہ سب توں اہم گلاں اوتھے ہوئیاں۔ ایہناں گلاں دا تعلق سیاست نال اے ملکی مستقبل دی سیاسی حکمت عملی ن ال اے تے دلچسپ گل ایہہ وے کہ سب توں اہم گل بات رات دے انھیرے وچ ہوئی۔ ظاہر اے گلاں ای انج دیاں سن کہ دن دے چانن وچ نہیں سن ہو سکدیاں۔ پچھلیاں پنج دہائیاں دی تریخ گواہ اے کہ پاکستان وچ اہم فیصلے تے اہم گلاں رات دے انھیرے وچ ہوئیاں بھاویں اوہناں تے عملدرآمد دن دے چانن وچ ای کیوں نہ ہویا ہووے۔ میں جہڑیاں دو تھاواں تے ہون والی گل بات دا حوالا دین جا رہیا واں اوہناں وچ پہلی گل بات گورنر ہائوس لہور دی اے۔ جتھے ڈیڑھ سو دے نیڑے صحافیاں’ د انشوراں’ اینکراں تے یوٹیوبراں دے نال صدر مملکت نے ڈیڑھ گھنٹے توں ودھ گل بات کیتی۔ دوجی تھاں منہاج یونیورسٹی اے جتھے ڈاکٹر علوی نے طالب علماں تے استاداں نال بڑی جاندار تے بھرویں گل بات کیتی۔ گورنر ہائوس وچ ہون والی گل بات وچ اوہناں نے کئی سیاسی سوالاں دے جواب دتے پر آڈیو تے ویڈیو تے اوہناں دی گل بات لاجواب سی۔
صدر ڈاکٹر عارف علوی نے اخلاقیات تے گل کردے ہوئے اپنا موبائل فون اٹھایا تے کہن لگے اج کل ریکارڈنگ دا بڑا رواج اے جے تسیں ایس فون تے میری گل بات ٹیپ کرو تے اک اہم گل سامنے آوے گی مثلاً جدوں اک واقعے وچ اپنے دوستاں دے نال بیان کراں گا تے میرا انداز ہور ہووے گا فیر ایہو واقعہ میں اپنے رفقائے کار نوں سناواں گا تے گل بات دا انداز ہور ہووے گا بھین بھراواں نوں سناواں گا تے گل ہور طرح دی ہووے گی تے فیر ایہو واقعہ جدوں اپنی ماں نوں سناواں گا تے لب و لہجہ بالکل وکھرا ہووے گا۔ ہن کوئی جے اوہ ٹیپ میری والدہ نوں سناوے جو واقعہ میں اپنے دوستاں وچ بیان کیتا سی تے میری ماں کہوے گی کہ ایہ تے میرا بیٹا ای نہیں کہن دا مقصد ایہہ وے کہ اک ای واقعہ انسان وکھووکھ لوکاں دے سامنے وکھووکھ انداز نال بیان کردا اے ایس لئی ریکارڈنگ نہیں کرنی چاہیدی تے فیر اوہنوں موبائل فون راہیں پھیلانا وی نہیں چاہیدا۔ صدر مملکت دی گل بالکل ٹھیک اے کیوں جے جدوں انسان دوستاں وچ گل کردا اے تے گل کرن ویلے کھلے انداز وچ بولدا اے پر جدوں اوہ و گل والدین نال کیتی جاندی اے تے اوہدے وچ احترام تے عقیدت دا پہلو سامنے آ جاندا اے۔
منہاج یونیورسٹی وچ خطاب دوران ڈاکٹر عارف علوی کہن لگے جدوں میں 1973ء وچ ماسٹر کرن لئی مشی گن گیا تے اک دو واقعات بڑے عجیب ہوئے میرے ہیڈ آف ڈیپارٹمنٹ اک دن کہن لگے کہ میرا ویک اینڈ ضائع ہو گیا اے میں اوہناں توں پچھیا کہ تہاڈا ویک اینڈ کیوں ضائع ہو گیا اے تے کہن لگے کہ میں اپنے باپ نوں اک اولڈہوم توں دوجے اولڈہوم وچ منتقل کیتا میریاں تے اکھاں پھٹیاں رہ گئیاں کہ اک بندے دا ویک اینڈ صرف ایس لئی ضائع ہو گیا کہ اوہنے اپنے باپ دی خدمت کر دتی۔ برٹرینڈرسل نے اک کتاب لکھی سی میرج اینڈ مورل ان سوسائٹی اوہنے کہیا سی کہ جس طرح دا زمانہ آ رہیا اے اوہدے وچ اقدار پچھے چلی جاوے گی ہر بندہ آزاد ہو جاوے گا اپنی زندگی تے آمدنی وچ ایناں پھس جاوے گا کہ ہر چیز ویاہ’ خاندان’ چیلنج ہو جاوے گا ہن ایہ چیزاں چیلنج ہو چکیاں نیں۔ کیہ زمانہ آ گیا اے کہ پاکستان وچ اٹھ دس مہینے پہلے اک قنون پاس ہویا کہ جے کوئی اولاد اپنے ماں باپ دی قدر نہ کرے تے اوہناں نوں گھروں کڈھے تے ریاست مداخلت کرے گی ایہ تے معاشرے دا کم سی۔ معاشرہ اجہی تربیت دیندا اے’ معاشرہ اہتمام کردا سی’ خاندان والے اہتمام کردے سن کہ بے غیرت توں اجیہا کم کیتا کیوں؟ ریاست نوں تے ایتھے جانا ای نہیں سی چاہیدا ایہدا مطلب اے کہ معاشرے وچ بڑی تبدیلی ہوئی اے۔
بچو! اک گل ذہن وچ رکھنا ایہ تبدیلی اک ذہنی تبدیلی اے ایہنوں ٹھیک رکھن لئی تسیں کمائو’ محنت کرو پر جدوں محبتاں نوں رشتیاں چوں کڈھ دیو گے تے آپ وی پریشان رہوو گے تے معاشرے وچ وی پریشانی دے نال ایہ گل آ جاوے گی کہ میں اکلا زندگی گزار سکنا واں۔ ہن ساڈے ایتھے 24فیصد لوک 24 گھنٹیاں وچ کسے اک وقت سخت پریشانی دا شکار ہوندے نیں جہنوں اسٹریس کہندے نیں۔ مشترکہ خاندانی نظام وچ خوبصورتی سی کہ ہر کوئی اپنی پریشانی شیئر کر لیندا سی پر اکلا تے اپنی پریشانی وی شیئر نہیں کر سکدا اک ہور حیران کن گل ایہہ وے کہ کالج جان والے سٹھ توں اسی فیصد طلب علم انڈر اسٹریس نیں علم دی تلاش دے اندر ایہ ذہنی پریشانیاں کیویں آ گئیاں۔ اسیں ایہناں نوں کہڑی مشین تے پا دتا جہدے وچ ایہ مسلسل نسدے رہن تے دماغی تنائو وچ مبتلا رہن ایہ صرف روزی دے پچھے نسن گے۔ پاکستان نوں ایس ویلے ضرورت ایس گل دی اے کہ معاشرے وچ توازن پیدا کیتا جاوے۔ صدر مملکت ڈاکٹر عارف علوی جتھے سیاست نوں ہیجانی کیفیت چوں کڈھن دی کوشش کر رہے نیں اوتھے معاشرے دے سدھار دیاں گلاں وی کر رہے نیں۔٭
