فیفا ورلڈکپ تے مذہب دی تبلیغ

بین الاقوامی فیڈریشن برائے فٹبال ایسوسی ایشن (فیفا) دے پربندھ ہیٹھ ہون والا ورلڈکپ پوری دنیا وچ کھیڈاں دے اہم ترین مقابلیاں وچ شمار ہوندا اے۔ 1930وچ یوراگوئے توں شروع ہون والا ایہہ کھیڈاں دا مقابلہ ہر چار سال مگروں منعقد ہوندا اے۔ ایس واری ایہہ مقابلہ قطر وچ ہو رہیا اے۔عرب دنیا وچ ہون والا ایہہ اپنی نوعیت دا پہلا ورلڈکپ اے۔ روایتی طور تے ایہہ مقابلہ جون تے جولائی وچ ہوندا اے لیکن قطر دے گرم موسم دی وجہ
نال ایس واری اوہنوں نومبر تے دسمبر دے مہینیاں وچ منعقد کیتاجا رہیا اے۔ ایس ورلڈکپ وچ 32ٹیماں حصہ لے رہیاں نیں جہڑی دارالحکومت دوحہ سنے پنج شہراں دے اٹھ سٹیڈیماں وچ میچ کھیڈن گئیاں۔ ایس مقابلے نوں ویکھن لئی دنیا دے مختلف ملکاں توں فٹبال دے شائقین قطر پہنچے ہوئے نیں۔ اوہناں وچ بہت وڈی تعداد اوہناں شائقین دی وی اے جہڑے مغربی دنیا نال تعلق رکھدے نیں۔
مغربی دنیا اک خاص ثقافتی پہچان دی حامل اے جہڑی مسلم ملکاں دی تمدنی شناخت توں یکسر وکھری اے تے ایہو گل قطر لئی مسائل دا کارن بن رہی اے۔ ثقافتی یا تمدنی اختلاف دی وجہ ای توں قطر اتے مغربی ملکاں وچ اوس دن توں تنقید ہو رہی اے جدوں توںایہنوں فٹبال ورلڈکپ دی میزبانی لئی منتخب کیتا گیا۔ مسلم ملک ہون دی وجہ نال قطر وچ شراب’ ہم جنس پرستی تے انج دی کئی ہور گلاں اتے پابندی اے جو مغربی ملکاں وچ ہر گز بری نہیں سمجھی جاندیاں۔ ایسے گل نوں بنیاد بنا کے کئی ملک’ فٹبال کلباں تے کھیڈاریاں نے ورلڈکپ دا بائیکاٹ کرن دامنصوبہ بنایا۔ فیفا دے پچھلے صدر سیپ بلیٹر نے وی قطر دے بطور میزبان انتخاب نوں غلطی قرار دیندے ہوئے کہیا کہ اسیں ایگزیکٹو کمیٹی وچ ایس گل اتے اتفاق کیتا سی کہ 2022دا فٹبال ورلڈکپ امریکہ وچ ہونا چاہیدا اے۔
ساری تنقید تے اعتراضات دے باوجود ورلڈکپ قطر وچ ای ہو رہیا اے۔ قطر نے ایس مقابلے دی میزبانی لئی انفراسٹرکچر اتے 200ارب ڈالر توں ودھ دی رقم خرچ کیتی اے تے اک اندازے دے مطابق 12لکھ توں ودھ شائقین ایس مقابلے نوں ویکھن لئی قطر جان گے۔ واضح رہوے کہ قطر دی اپنی آبادی 30لکھ توں وی گھٹ اے۔ مغربی ذرائع ابلاغ قطر دے حجم’ آبادی’ اسلامی اقدار نال وابستگی تے کئی ہور گلاں نوں لے کے مسلسل ایہدے خلاف خبراں تے مضمون وغیرہ شائع کر رہے نیں۔ ایس سارے دا مقصد دنیا نوں ایہہ باور کرانا اے کہ قطر یا کوئی وی ہور مسلم ملک فٹبال ورلڈکپ جئے کسی اہم ترین مقابلے دی میزبانی دا اہل نہیں اے تے جے قطر نوں ایہہ موقع ملیا اے تے اوہدے پچھے رشوت تے بدعنوانی دی ایسی صورت کارفرما اے جہنے فیفا دے پورے نظام نوں اپنی لپیٹ وچ لیا ہویا اے ورنہ ایہہ مقابلہ کسی مغربی ملک وچ منعقد ہو رہیا ہوندا۔
20نومبر نوں فٹبال ورلڈکپ دی افتتاحی تقریب قطر دے شہر الخور دے البیت سٹیڈیم وچ ہوئی تے اوہدے وچ غانم محمد المفتاح نامی معذور نوجوان دی رلت توں تریخ رقم ہو گئی۔ 20سالہ غانم نے افتتاحی تقریب وچ امریکی اداکار مورگن فریمین دے نال جہڑی گل بات کیتی اوہدے وچ اوہنے سورہ الحجرات دی آیت 13تلاوت کیتی جہدے وچ کہیا گیا اے کہا ے لوگو! اسیں تہانوں اک مرد تے اک عورت توں پیدا کیتا تے تہاڈی قوماں تے قبیلے بنائے تاں جے اک دوجے نوں شناخت کرو تے اللہ دے کول تہاڈے وچوں بوہتا عزت والا اوہ اے جہڑا بوہتا پرہیزگار اے۔ بے شک اللہ جانن والا خبردار اے۔ ایس واقعے نے مغربی ذرائع ابلاغ تے تنقید کرن والے افراد تے گروہواں نوں اعتراضات لئی ہور مواد مہیا کر دتا۔ ایتھے ایہہ گل وی قابل ذکر اے کہ کئی مغربی گلوکاراں نے نظریاتی اختلافات پاروں ورلڈکپ دی افتتاحی تقریب وچ شریک ہون توں ایس لئی انکار کردتا۔
قطر نے اپنے بعض اقدامات دے ذریعے فٹبال ورلڈکپ دے مقابلے اک ایسے واقعے وچ تبدیل کردتا اے جہدی مثال نہیں ملدی۔ پاکستانی مسلمان ایس گل توں بہت خوش وکھائی دیندے نیں کہ قطر نے ایس مقابلے دے موقع تے
دنیا بھر توں مبلغین تے علما نوں دعوت دتی اے تاں جے اوہ مقابلہ ویکھن لئی آن والے غیر مسلم شائقین نوں اسلام دی تبلیغ کرن۔ ایس سلسلے وچ بھارت نال تعلق رکھن والے منے پرمنے سکالر ڈاکٹر ذاکر نائیک نوں وی دعوت دتی گئی اے۔ جے جذباتیت توں ہٹ کے ویکھیا جاوے تے قطر دا ایہہ اقدام مسلماناں تے مسلم ملکاں لئی آن والے دناں وچ کئی طرحاں دے مسئلے پیدا کرے گا کیوں جے مغربی ملک ایس واقعے نوں بنیاد بنا کے کئی ایسے اقدامات کر سکدے نیں جہناں توں مسلمان متاثر ون گے۔ بھارت وی قطر نال ایس گل اتے ناراض اے کہ اوہنے ڈاکٹر ذاکر نائیک نوں کیوں دعوت دتی اے لہٰذا اوہدے ولوں وی مسائل پیدا کیتے جا سکدے نیں۔
کسی وی اقدام دے خوب و زشت دا جائزہ اوہدے نال جڑے سارے پہلوواں نوں سامنے رکھ کے لیتا جاندا
اے تے نال ای صورتحال نوں بالعکس کر کے ایہہ وی ویکھ لیتا جاندا اے کہ جے اپنے کسی عمل نال دوجیاں نوں متاثر کرن والا خود ایسی نہج اتے پہنچ جاوے کہ اوہ اپنے مخالف دے کسی ایسے ای عمل توں متاثر ہووے تے فیر اوہدا ردعمل کیہ ہووے گا۔ قطر نے جو صورتحال پیدا کیتی اے جے اوہنوں بالعکس کر کے ایہہ ویکھیا جاوے کہ کسی غیرمسلم ملک ولوں کھیڈاں دے کسی عالمی مقابلے وچ مسلم شائقین اتے کجھ پابندیاں لادتی گئیاں نیں تے اوس ملک نے اوس مقابلے نوں اپنے مذہب دی تبلیغ دا ذریعہ وی بنا لیتا اے تے یقینا مسلم ملکاں دا ردعمل خوشگوار ہرگز نہیں ہووے گا۔ تبلیغ ضرور کیتی جانی چاہیدی اے تے اپنی اقدار دی ترویج تے تحفظ اتے وی زور دینا چاہیدا اے لیکن کوئی ایسی صورتحال پیدا کرن توں گریز کیتا جانا چاہیدا اے جہدا بالعکس ہونا اسیں خود گوارا نہیں کر سکدے!