قلم دوست

رابعہ رحمان

ادبی تنظیم ”قلم دوست” دا چوتھا یوم تاسیس 17نومبر نوں برٹن انٹنریشنل المقیت کیمپس وچ جوش و خروش دے نال چیئرمین ایثار رانا تے دوجے ارکان دی سرپرستی وچ منایا گیا۔ صدر اختر سندھو نے استقبالیہ کیتا۔ راقمہ نے چار سالہ کارکردگی دی رپورٹ پیش کیتی جہدے وچ کہیا گیا کہ مختلف یونیورسٹیاں دے وائس چانسلراں نال ملاقاتاں’ تعلیمی نظام اتے سیر حاصل گل بات’ سیاسی تجزیے’ مختلف سیاستداناں دے نال وطن دی صورتحال اتے مفصل گل بات’ آن لائن سیمینارز کیتے۔ جشن آزادی اتے اک بھرواں تے وڈے پیمانے اتے مشاعرے دا پربندھ کیتا گیا جہدے وچ ملک دے منے پرمنے شاعراں نے رلت کیتی۔ ایس تنظیم دی اک خاصیت ایہہ وی اے کہ ہر تقریب’ ملاقات تے سیمیناراں مگروں اوہدے کالم نگار منے پرمنے اخباراں وچ کالم لکھدے نیں۔ ایس تنظیم دی حکمت عملی وچ آپس وچ جڑے رہنا تے ہر دوجے شخص دی رائے دا احترام کرنا اے۔
30اکتوبر 2018 وچ قلم دوست دی بنیاد رکھی گئی۔ ایہہ اوہ دور سی جدوں لہور دی فضا رنگا رنگ تنظیماں تے ادبی حلقیاں دی دوڑ وچ دھندلی پے چکی سی۔ کئی تنظیماں عہدیاں دے حصول لئی ایڑی چوٹی دا زور لا رہیاں سن۔ ایہدے وچ ایثار رانا’ راقمہ’ عنابغ علی’ اسلم بھٹی تے ناصف اعوان نے قلم تے ادب نال جڑے دانشوراں دی ایسی نرسری قائم کیتی جتھے ادب نوں ترویج تے سچ نوں بیان تے اظہار نوں عام کیتا جا سکے۔ ادب و احترام دی فضا نوں تنظیم دے حوالے نال فروغ دین لئی کئی اتار چڑھائو توں لنگھن مگروں اج ایہہ تنظیم پورے قد دے نال کھڑی اے۔ اوہدی اک ہور وڈی کامیابی شہدائے پاکستان کانفرنس سی جہدے وچ ملک بھر توں شہدا دے رشتہ داراں نے تے حساس اداریاں دے اعلیٰ عہدیداراں نے پرجوش رلت کیتی۔
جدوں خیالات نوں درکار فصاحت تے بلاغت دے نال ادا کرن’ تحریر کرن والافرد عام بندا نہ رہ جاوے تے ادب پیدا ہوندا اے۔ گل کرنا احساسات دا اظہار کرنا معاشرے دی ناانصافیاں’عدل’ ظلم و ستم’ بے راہ روی’ تعلیمی پسماندگی تے انسان تے وطن نال جڑے ہر صحیح تے غلط معاملات اتے ایہہ گل کرنا لکھناتے فیر اوہدے اتے ڈٹے رہنا ای قلم تے ادب نال سچا رشتہ نبھان دے مترادف اے۔ گل کرنا جبلت وی اے’ عادت وی ‘ فطرت وی’ مجبوری وی تے لوڑ وی۔ ایس لئی گل بات کردے رہن نال بہت سارے معاملات سلجھن لگدے نیں۔ ساڈے معاشرے وچ ادبی اکائیاں بڑی تعداد وچ وجود وچ آندیاں نیں۔ جیویں درختاں تے پودیاں وچ بیج بڑی تعداد وچ وجود وچ آندے نیں مگرجیویں ہر بیج پودا نہیں بندا جدوں تک اوہنوں مناسب مٹی’ پانی دھپ تے تحفظ نہ ملے اوسے طرحاں ادبی اکائی فن پارہ نہیں بندی جدوں تک اوہنوں مناسب ماحول’ تعلیم و تربیت’ تنقید تے ابلاغ نہ ملے۔ ادب نہ تے خلا وچ جنم لیندا اے نہ خلا وچ پروان چڑھدا اے۔ ادب کسی وی معاشرے دی تہذیب و تمدن دا اک جزو اے۔ جیویں جیویں تہذیب و تمدن بدلدا اے انج انج ادب دی ترویج ہوندی اے لیکن ایہہ ذہن وچ رکھنا بہت ضروری اے کہ تہذیب و تمدن جے ترقی دی راہ اتے ہے تے ترقی ادب ہووے گی تے جے تنزلی داشکار اے تے ادب دا زوال ہووے گا۔
قلم دوست دی کارکردگی تے اوہدے ہر فرد نال رل کے اک غزل دے کجھ شعریاد آندے نیں۔
تم سے ہر ایک صنف سخن پربہار تھی
تم سے رخ جہان ادب پر شباب ہے
طاہر سجی ہے اہل و زبان و بیان کی بزم
کردار اس میں جو بھی ہے اجلی کتاب ہے
قلم دوست دی ایس تقریب وچ امجد فاروق میر’ سلیم حسن’ توقیر شریفی’ پروفیسر ظہیر بدر’رائو خالد’ عقیل انجم’ خالد بھٹی’ عمران امین’ اشرف شریف’ نعیم نیازی’ عارف نوناری’ آصف ندیم’ امجد فاروق’ عنابغ علی’ مذہبی سکالر تنویر قاسم’سچ چینل دے اینکر حنیف رامے نے قلم دی حرمت اتے گل بات دے نال نال کجھ تجویزاں وی دتیاں جہدے وچ اک چنگا لکھاری بنن لئی سیمینار دے انعقاد دے بارے گل کیتی گئی۔ تقریب وچ رنگ بھرن لئی آن والے سارے سوہنے پروہیاں نوں پھل دی کلیاں پیش کیتی گئیاں۔ جشن آزادی اتے اک بھرواں تے وڈے پیمانے اتے مشاعرے دا پربندھ کیتا گیا جہدے وچ ملک دے منے پرمنے شاعراں نے رلت کیتی۔ ایس تنظیم دی اک خاصیت ایہہ وی اے کہ ہر تقریب’ ملاقات تے سیمیناراں مگروں اوہدے کالم نگار منے پرمنے اخباراں وچ کالم لکھدے نیں۔ سارے پروہنیاں نے قلم دوست دے حوالے نال اپنے دلی جذبات تے احساسات دا اظہار کیتا۔ جہان پاکستان دی قلمار عمارہ وحید جہڑی پچھلے نو دس سالاں توں مختلف اخباراں وچ کال لکھ رہیاں نیں۔ایس دے علاوہ علامہ اقبال اوپن یونیورسٹی توں اوہناں دی تعلیم دا سلسلہ وی جاری اے۔ اوہناں نے اچیچی رلت کیتی۔ ایہدے مگروں توقیر شریفی دی نظامت وچ شاندار مشاعرہ کیتا گیا جہدے وچ افضل پارس’ ڈاکٹردانش عزیز’ آصف انصاری’ شبنم مرزا’ عروج زیب تے توقیر شریفی نے ماحول نوں اپنی شاعری نال محظوظ کیتا۔ ڈاکٹر دانش نے شہید ارشد شریف اتے غزل پڑھ کے مشاعرہ لٹ لیتا۔
فصیل شہر سے باہر بلا کے مارا گیا
سبھی کے سامنے عبرت بنا کے مارا گیا
مرے حریف میرے اپنے لوگ تھے دانش
یہ راز قتل سے پہلے بتا کے مارا گیا
مشاعرے ساڈی تہذیب داحصہ نیں اوہناں دے ذریعے زبان و ادب دی ترویج دے نال نال اسیں اپنے مشاہیر دی خدمات دا ذکر کر کے نویں نسل نوں ماضی نال روشناس کرانے آں تے موجودہ صورتحال توں وی آگاہ کرنے آں۔