خدارا نکاح نوں آسان کرو

اسما بتول

آخر کدوں تک اسیں صرف سوچدے رہواں گے۔ آخر کدوں تک اسیں صرف گلاں کردے رہواں گے۔ عمل دے میدان وچ اترنا اینا اوکھا تے نہیں؟ امت محمدیۖ نیں۔ پیروکار نیں۔ اوس نبی اکرمۖ دے جہناں نے 23 سال وچ تریخی انقلاب برپا کیتا۔ وڈے وڈے بادشاہ مسخر ہوئے۔ ایسا انقلاب آخر کیویں آیا۔اسلامی قنون نوں مضبوطی نال نافذ کیتا گیا۔ چوری کرن اتے ہتھ وَڈے گئے۔ زنا کرن تے سنسار کیتا گیا۔ زکوٰة نہ دین تے اعلان جنگ کیتا۔ ایس تریخی تبدیلی نوں اج تک کوئی چیلنج نہیں کر سکیا۔ کیہ عمل سن جہدی بنیاد اتے دین اسلام دا جھنڈا اُچا ہویا تے اچا کرن والے کون سن نہ جائیداداں’ نہ بینک بیلنس بلکہ کئی دن دے فاقہ کیتے ہوئے رب نال محبت کردے ہوئے طاقتور مسلمان دنیاوی غرضاں توں پاک’ تریخ دے ورقے پلٹدے کسے اک دا وی نکاح اج دے نکاح جیا اے؟ ایس قدر اہم تے ضروری فریضہ اینی سادگی نال ادا کر دتا جاندا سی۔ فحاشی تے بے حیائی دا خاتمہ چھیتی نکاح کرن توں کیتا جاندا۔ اک نہیںچار چار نکاح ہو جاندی تے خبر تک نہیں ہوندی۔ ایہہ سی اسلامی ریاست اج کُڑیاں تے منڈیاں دی ظاہری خوبصورتی توں لے کے تعلیمی تے مالی حالات دی ٹھونک وجا کے جانچ پڑتال کیتی جاندی اے۔ عمر ودھن دا کوئی اندیشہ نہیں ہوندا۔ نکاح دی تریخ توں لے کے ولیمہ تک ایسا ماحول بندا اے جیویں اسیں دنیا وچ صرف ایس کم لئی ای آئے آں۔ بیوٹی پارلر جہیز دا سامان شادی ہال بری دا سامان لین دین لئی رقم دا انتظام ایہہ سب اک دقت طلب کم اے۔ دین ا سلام نوں جو ایس ویلے چیلنج درپیش نیں اوہناں نال کیویں نبڑن گے جدوں کہ ساڈی ترجیحات وچ اینے غیر ضروری کم جہڑے آ گئے نیں۔ کڑی چاہے امیر ہووے چاہے غریب یا فیر یتیم اوہنوں اپنے نال جہیز لیانا لازم کیوں اے؟ کڑی والے ہال وچ ویاہ داکھانا کیوں کرن؟ منڈے والیاں اتے بری وچ سونا دینا تے ولیمے دا کھانا وڈے پیمانے اتے کرنا لازم کیوں اے؟ کہڑے قنون دے تحت ایہہ سب ہو ریا اے۔ ویاہ نوں ایس قدر اوکھا بنا دتا اے کہ اج ویاہ دے لائق منڈے کڑیاں دو دن دی تقریباں نوں ممکن بنان لئی اپنے احساسات جذبات نوں روز کچل رہے نیں تے نوکریاں کررہے نیں۔ والاں وچ جھلکدی چاندی نوں لکان لئی مصنوعی رنگ استعمال کر رہے نیں۔ افسوس ایہناں ساری گلاں دی جواب دہی دی کسے نوں فکر نہیں۔ اللہ تعالیٰ نہیں سوال کرن گے کہ مہنگا ترین ہال کیوں نہیں بک کروایا۔ فرنیچر ویاہ دا جوڑا کتھوں کتھوں لیا۔ کارڈ کتھوں چھپوائے۔ جہیز دا سامان کنے دا بنیا ؟۔ انج دے سوال نہیں ہونگے بس پچھیا جاوے گا ایس نیک فریضے نوں تسیں کہڑی بنیاد اتے ادا کرن وچ دیر کیتی تے کیہ تسیں ایس فریضہ نوں ادا کرن وچ اللہ تے اوہدے رسولۖ دے احکامات تے خوشنودی نوں مدنظر رکھیا؟ خدارا نکاح نوں آسان کرو۔ مسجداں نوں ایس نیک فریضہ لئی ستعمال کرو۔ رات دے انھیرے وچ نہیں دن دے چانن وچ دھی نوں اپنے گھروں رخصت کرو۔ ایس کم نوں بوجھل ہون توں بچائو۔ پیسہ خرچ ای کرنا اے تے نوبیاہتا جوڑے نوں عمرہ یا حج اتے بھیجو۔ ایمان دی سلامتی تے مضبوطی لئی اللہ دے گھر دا طواف کروائو۔ اٹھو قدم تہاڈے ہم خیال بہت نیں۔ بس نیت تے ارادہ کرو۔ اللہ رب تعالیٰ ساڈے ساریاں دی بہترین مدد فرمائے۔ آمین ثم آمین۔