عرفان صدیقی دی خدمت وچ

سینئر ترین جنرل عاصم منیر پاکستان دے 11ویں چیف آف آرمی سٹاف لئی نامزد ہو چکے نیں۔ اللہ تبارک اوہناں دی تقرری نوں پاکستان لئی خیر دا کارن بنائے۔ نامزدگی دے طریقہ کار اتے بحث پہلاں ای جاری سی تے آئندہ وی جاری رہوے گی۔ کجھ دن پہلاں امیر جماعت اسلامی پاکستان سراج الحق صاحب نے صحافیاں نال گل بات وچ تجویز پیش کیتی کہ آرمی چیف دی تقرری سیاستداناں دے رحم و کرم اتے چھڈن دے بجائے سنیارٹی دے اصول دے تحت ہونی چاہیدی اے۔ ایس تجویز اتے ساڈے محترم عرفان صدیقی صاحب دا قلم ای نہیں یادداشت وی اوہناں دی گرفت وچ نہیں رہی۔ا وہناں نے بیک وقت کئی اخباراں وچ چھپن والے اپنے کالم وچ سراج الحق دی جسارت نوں ایس طرحاں دا تختہ ستم بنان دی کوشش کیتی اے۔ جیویں جسٹس فائونڈیشن دے چیئرمین نوں بنایا گیا سی۔ جدوں اوہناں نے نومبر 2019نوں چیف آف آرمی سٹاف دی توسیع نوں سپریم کورٹ وچ چیلنج کیتا سی۔ پہلی تریخ نوں تے اوہ پیش ای نہیں ہو سکے تے اگلی تریخ نوں حاضر ہو کے دست بستہ درخواست واپس لین دی استدعا کر دتی۔ بھلا ہووے سپریم کورٹ دا کہ اوہناں نے فیصلہ کر دتا کہ عوامی مفاد دی عدالتی کارروائی نوں عدالت دی اجازت نال ای واپس لیتا جا سکدا اے تے انج عدالت نے اوہدے اتے اک تریخی فیصلہ دتا۔ کاش عرفان صدیقی ایس فیصلہ نوں ہن وی پڑھ لین۔ نیز اوہ اپنی ایہہ غلط فہمی وی دور کر لیتیاں کہ ایہہ تجویز سراج الحق دی ذاتی تجویز نہیں اے۔ جماعت دی مجلس شوریٰ نے ایس معاملہ اتے دو ٹوک موقف اپنایا اے۔ ایہدے اتے قرارداد وی آ چکی اے تے جماعت اسلامی نے ایہنوں اپنے منشور وچ وی شامل کر لیتا گیا اے۔ جناب عرفان صدیقی صاحب برا نہیں منائو تے اسیں وی اوہناں نال سوال کرن دی جسارت کر سکدے او کہ جماعت اسلامی تے اک تجویز دین لئی مرکزی شوریٰ دی پابند اے لیکن جہڑی جماعت نال اوس ویلے اوہ تعلق رکھدے نیں کیہ اوہناں دے قلم وچ کوئی ایسا زور اے کہ اوہ اپنے قائد نوں پچھن کہ اوہ قومی سطح دے اہم تے وڈے فیصلیاں لئی پارٹی اجلاس کیوں نہیں کردے؟ آرمی چیف دی توسیع لئی لندن وچ بیٹھ کے صوابدیدی اختیار کہڑے پارٹی دستور دے تحت استعمال کردے نیں۔ عرفان صدیقی صاحب نے اک سوال ایہہ وی چکیا اے کہ نویں پاکستان توں پہلاں کسی ادنیٰ درجے دے سیاسی رہنما نے وی ایس تقرری نوں ایسے بھونڈے انداز وچ متاع کوچہ تے بازار بنایا ہووے۔ا یہدا جواب تے سپریم کورٹ دے 3ججاں دے متفقہ فیصلے وچ موجود اے۔ ایہہ انکشاف ساڈے لئی صدمہ دا کارن اے کہ ہن تک چیف آف آرمی سٹاف دی تقرری دی شرطاں’ عرصہ ملازمت’ توسیع یا نویں تقرری وغیرہ کسی ضابطہ تے قنون دے بغیر ہو رہی اے۔ فیصلے وچ اک ہور جگہ لکھیا گیا اے ایس معاملہ اتے بحث ہونی چاہیدی اے تاں جے ہر پہلو سامنے آ کے حل تلاش کیتا جا سکے۔ ایسے فیصلہ دے شروع وچ پیرا 7 اتے درج اے کہ چیف آف آرمی سٹاف دی تقرری پاکستان دے ہر شہری دی زندگی’ سکیورٹی تے آزادی نال جڑے اے۔ لہٰذا بغیر کسی شک دے ایہہ عوامی اہمیت نال جڑیا ہویا بڑا اہم سوال اے۔
جماعت اسلامی دی استدعا ایہہ اے کہ چیف دی تقرری نوں اقتدار دی غلام گردشاں وچ مفاد پرستی’رشتہ داری تے بادشاہواں وانگوں دل نوں بھاوے جیسی صوابدیدہ توں کڈ کے کسی میرٹ تے سنیارٹی دے قواعد تے ضوابط دا پابند بنانا چاہیدا اے۔ صوابدید وی ایسی کہ اک لیڈر پاکستان وچ ہووے تے چیف آف آرمی سٹاف اتے گرما گرم بیان داغ رہیا ہووے تے جدوں بھائو تائو ہو جاوے تے لندن پہنچ کے قرآن اتے حلف کر ایکسٹینشن دا ساتھ دے دتا جاوے۔ ایتھے ایہہ وی پیش نظر رہوے کہ پاکستان وچ سب توں ودھ آرمی چیف لان دا اختیار میاں نواز شریف نے استعمال کیتا اے تے عرفان صدیقی صاحب نوں خوب پتہ ہووے گا کہ اوہناں دے ممدوح میاں نواز شریف نے اپنی صوابدیدلئی کیہ کیہ پاپڑ بیلے سن لیکن سب توں ودھ سول تے ملٹری تعلقات دی خرابی تے تنازعات دا شکار ہوئے۔
عرفان صدیقی صاحب ایہہ وی سوال چکدے نیں کہ صوابدیداتے کوئی قدغن نہیںلگنی چاہیدی اے۔ جمہوریت جدوں پروان چڑھدی اے تے اوہدی اک ای نشانیا ے کہ تسیں کنے مشہور ہون’ دوتہائی اکثریت رکھدے ہون۔ تسیں بار بار منتخب ہوندے ہون۔ تسیں کنے ای سربلند ہون لیکن قنون تے ضوابط تہاڈے توں اچی ہونی چاہیدیاں نیں۔ سپریم کورٹ وچ اٹارنی جنرل ریکارڈ اتے نیں کہ ایس معاملہ وچ قواعد و ضوابط دے بجائے اک عمومی روایت اے۔ جہدے اتے سالاں توں عمل کیتا جا رہیا اے۔ سپریم کورٹ نے ایس قنونی خلا نوں پارلیمنٹ دے ذریعے اتے کرن دی ہدایت کیتی سی۔
عرفان صدیقی صاحب اپنی ایہہ غلط فہمی وی دور کر لین کہ فوج وچ کرنل’ بریگیڈیئر میجر جنرل تے لیفٹیننٹ جنرل دے عہدیاں اتے ترقی تے سپرسیڈ لئی وی صوابدیدی اختیار استعمال نہیں کیتا جاندا۔ ایہہ سارے کم قاعدے تے ضابطے دے مطابق انجام دتا جاندا اے۔ ایہناں قواعد وچ مدت ملازمت دی سنیارٹی دے علاوہ مختلف دوجے قابل پیمائش ضوابط وی ہوندے نیں جہناں وچ وار کوورساں توں لے کے کئی امتحانات تے اوہناں دے نمبر موجود ہوندے نیں۔ ایس لئی اوہناں نوں کسی وی طور تے صوابدید نہیں کہیا جا سکدا۔
اسیں اک واری فیر عرض کراں گے کہ صوابدید رہوے گی تے تقرری کرن والے نجومیاں’ استخاریاں تے رشتہ داراں نوں تلاش کردے رہواں گے۔ صوابدید دے نتائج پاکستانی قوم نے بار بار بھگتدے نیں۔ ایہدے باوجود ساڈے توں کجھ لوک انھیریاں دے مسافر بن چکے نیں۔ اوہ انھیاں وانگوںٹٹول ٹٹول کے چلن تے ٹھوکراں کھا کھاکے ڈگنا پسند کردے نیں۔ ہر حماقت نوں اوہ تحقیق سمجھدے نیں تے ہر شر انگیز تجربے مگروں ایس توں ودھ کے تجربے لئی تیار رہندے نیں۔ اوہ سوچدے نیں کہ پہلے اتفاق نال انگارے اتے ہتھ پے گیا سی ہن لعل بدخشاں ہتھ آ جاوے گا۔