غلام شبیر عاصم دی کتاب جِیون تنداں اتے اک نظر

نارووال دے علاقہ رعیہ خاص توں 1995وچ ہجرت کر کے مریدکے وچ آباد ہون والے منے پرمنے شاعر’ ادیب تے کالم نگار غلام شبیر عاصم دی پنجابی شاعری اتے مشتمل کتاب ”جیون تنداں” دے نام توں منصۂ شہود اتے ائی اے۔ جہدے مطالعہ توں گل نکھر کے سامنے آندی اے کہ غلام شبیر عاصم انسانیت نال پیار کرن والا اک ایسا انسان اے جہڑا ایس مشینی دور دے معاشرتی جبر وچ وی محبت دے گل کھلاندا اے جہدے وچ غرض پرستی تے انا پرستی دے نال نال منافقت وی اپنے عروج اتے اے تے جہڑی محبت’ تجارت وچ تبدیل ہو کے رہ گئی اے۔ ایسی صورتحال وچ اخلاص تے وفا دے چراغ جلانا تے درکنار محبوب نال گل کرنا وی ناممکن وکھائی دیندا اے۔ اوہ اک ایسی راہ دا مسافر اے جہدے وچ انسان نوں خوف و ہراس دے علاوہ تنہائی تے محرومی دا احساس وی دامن گیر رہندا اے۔ایہدے باوجود اوہنے محبت دے سسکدے تے ٹمٹماندے ہوئے چراغ نوں اپنے لہو نال نویں زندگی دین دی ناصرف کوشش کیتی اے بلکہ اپنے جذبات تے احساسات دے اظہار توں ایس چراغ دے اطراف وچ اک ایسا حصار کھچیا اے جو اوہنوں روشن رکھن وچ پوری طرحاں ممدومعاون وکھائی دیندا اے۔
غلام شبیر عاصم دا کلام نہایت سادہ سمجھ آن والا تے پراثر اے۔ ایہدے وچ تصنع تے ابہام و آورد دے عنصر دا شائبہ تک نہیں ہوندا۔ اوہنے نہ صرف اپنے فکرو خیال نوں بااحسن طریقہ نال خوبصورت لفظاں دا پیرہن عطا کیتا اے بلکہ اپنی ساری فنی خوبیاں نوں وی خوب اجاگر کیتا اے۔ ایہدی شاعری پڑھدے ہوئے انسان اتے اک عجیب جئی کیفیت طاری ہو جاندی ایتے اوہ ایہدے وچ موجود لذتاں تے لطافتاں وچ گوا چ جاندا اے۔ غلام شبیر عاصم اک ایسا دانشور اے جہڑا اپنے آسے پاسے دے ماحول وچ پنپن والی ساری سماجی تے معاشرتی برائیاں توں پوری طرح باخبر اے جتھے اوہ اپنے ملک دی ناگفتہ بہ سیاسی تے معاشی صورتحال توں مکمل آگاہ وکھائی دیندا اے اوتھے اوہ بین الاقوامی سطح اتے ہون والی تبدیلیاں تے طاقتور ملکاں دی سامراجی سوچ توں جنم پان والے حالات تے واقعات اتے وی گہری نظر رکھدا اے۔ چونکہ اوہ ظلم دی ہر شکل دے خلاف اے ایس لئی اوہ ملکی تے عالمی سطح اتے ہون والے جبرو استبداد تے ظلم و استحصال نوں نہ صرف اپنی شاعری دا موضوع بناندا اے بلکہ مقتدر تے طاقتور طبقات دی چیرہ دستیاں دے خلاف بھرواں جدوجہد کردا وی نظر آندا اے۔ اوہدی بہت ساری نظماں مزدور کسان تے پسے ہوئے طبقیاں دی نمائندگی کردی وکھائی دیندیاں نیں۔
غلام شبیر عاصم دی شاعری دا سفر ایتھے ختم نہیں ہوندا۔ ایہدی شاعری وچ حب الوطنی تے اسلامی اقدار دی پاسداری دا عنصر وی نمایاں نظر آندا اے۔ شاعری وچ ایہدا تلخ تے شیریں لہجہ ایہدی
انصاف پسندی تے مستقل مزاجی دا پتہ دیندا اے۔ اوہ ملک وچ اک ایسا معاشرہ چاہندا اے جہدے وچ سارے وسائل دی منصفانہ تقسیم ہووے تے ہر انسان نوں زندگی دی آسائشاں میسر ہون۔ غلام شبیر عاصم دی شاعری دے ایس مختصر جائزے مگروں اسیں ایہہ کہہ سکنے آں کہ ایہدی شاعری ساڈے ای مسئلیاں تے دکھ درد دا بیان اے۔ ساڈے ای سماج تے معاشرہ دا آئینہ اے تے ساڈے ای احساسات تے جذبات دی مظہر اے۔ مضبوط چلد تے خوبصورت سرورق دے نال 128صفحیاں اتے مشتمل کتاب ”جیون تانداں” د دیباچہ نامور شاعر انور اداس نے لکھیا اے جد کہ پروفیسر ڈاکٹر ارشد اقبال ارشد’ پروفیسر شکیل امجد صادق تے ادریس چیمہ’ اختر ہاشمی’ احسان باجوہ تے ڈاکٹر عباد نبیل شاد نے مضمون تے فلیپ تحریر کیتے نیں۔ مکتبہ شافی ولوں شائع کیتی گئی ایس کتاب دی قیمت 500 روپے اے۔ (برائے رابطہ 03084118939) آخر وچ نمونے دے طور تے غلام شبیر عاصم دی اک خوبصورت نظم ”لیڈر” ملاحظہ کرن۔
میں وی جے کر کالج پڑھدا
اسٹیجاں اُتے
فِقرے کسدا
چوکاں دے وچ اگاں لاوندا
ہاکِیاں لے کے اگے آکے
بساں ڈکدا جگا لیندا
مزدے لُٹدا
لِیڈر بن دا