حکومت پنجاب دی پہلے 100دن دی کارکردگی

26جولائی نوں وزیراعلیٰ منتخب ہون مگروں چوہدری پرویزالٰہی دے سامنے صوبہ پنجاب دا اک بہت وڈا معاشی تے سیاسی بحران سی۔ وزیراعلیٰ پنجاب بنن توں پہلاں جیویں اوہناں دا عوام دی خدمت دا مشن سی اقتدار وچ آن مگروں وی اوہناں دا ایہو مشن اے کہ پنجاب دی عوام نوں کیویں بہتر سہولتاں فراہم کیتیاں جان کیوں جے پنجاب دی عوام اوہناں دے پچھلے سنہری دور نوں اج وی یاد کردے نیں جیویں اوہناں نوں پچھلے دور حکومت وچ عوام دی بنیادی سہولتاں دی فراہمی لئی دن رات اک کردتا سی تے حقیقی معنیاں وچ عوامی فلاح و بہبود دے منصوبے متعارف کروائے سن جہناں وچ ریسکیو 1122 ‘ پڑھا لکھا پنجاب پروگرام دے تحت میٹرک تک مفت تعلیم تے کتاباں’ رنگ روڈ منصوبہ’ ریکارڈ ترقیاتی کم’ ٹیکسٹائل ریفارمز’ ہیلتھ ریفارمز تے دُوجی بنیادی سہولتاں دے منصوبے شامل سن۔ وزیراعلیٰ پنجاب چودھری پرویزالٰہی نے ایہہ سلسلہ اوتھوں شروع کیتا جتھے ایہہ ختم ہویا سی۔ اوہناں دی سربراہی وچ حکومت پنجاب نے پہلے 100 دن وچ انقلابی اقدامات کیتے نیں جہدا اصل محور غریب عوام دی بنیادی ضروریات تے اوہناں دی دہلیز اتے مسائل دا حل اے۔ پنجاب دے سارے اداریاں وچ عوامی فلاح و بہبود لئی قابل ستائش اقدامات کیتے گئے نیں۔ پنجاب دی عوام لئی صحت کارڈ منصوبہ دوبارہ بحال کر کے اوہدے دائرہ کار وچ وی توسیع کردتی گئی اے۔صحت کارڈ دے ذریعے ہن تک تقریبا 60 ارب روپے دی خطیر رقم توں 27 لکھ 23ہزار مریضاں دا مفت علاج معالجہ ہو چکیا اے۔ تقریباً800توں ودھ ہسپتال صحت کارڈ وچ شامل کیتے گئے نیں۔ صحت دی چنگی سہولتاں ہر انسان دا بنیادی حق اے تے ایس حق نوں پنجاب حکومت نے صحت کارڈ دے ذریعے بخوبی نبھایا اے جہدے توں اک غریب بندے وی مہنگے ترین ہسپتالاں وچ مفت علاج کروا سکدا اے۔ ایس دے علاوہ سرکاری ہسپتالاں نوں وی اپ گریڈ کیتا جا رہیا اے۔ جناح ہسپتال وچ 400 بیڈز دا ایمرجنسی بلاک’ گنگارام ہسپتال دی توسیع سنے پی آئی سی دی استعداد وی دگنی کیتی جاوے گی۔ پنجاب بھر دی ایمرجنسی وچ دوائیاں نوں فری کردتا گیا اے۔ پی کے ایل آئی انسٹیٹیوٹ وچ بولان میر و ٹرانسپلانٹ یونٹ دا افتتاح کیتا گیا اے۔ پی کے ایل آئی وچ تقریباً 70 ہزار توں ودھ مریض ڈائیلسز دی سہولت حاصل کر چکے نیں۔ گنگارام ہسپتال وچ 9ارب 47کروڑ دی لاگت نال 550 بیڈاں اتے مشتمل فاطمہ جناح انسٹیٹیوٹ آف مدر اینڈ چائلڈ ہیلتھ دا وی افتتاح کر دتا گیا جتھے اک چھت تھلے زچہ تے بچہ لئی عالمی معیار دی سہولتاں فراہم کیتی گئیاں نیں۔ میانوالی وچ وی بڑی چھیتی زچہ و بچہ ہسپتال دا افتتاح کیتا جاوے گا۔ ڈبلیو ایچ او دی معاونت نال پاکستان دی تریخ دے پہلے ڈیمنشیا پلان دا وی افتتاح کیتا گیا اے۔ پاکستان وچ تقریباً4لکھ افراد عمر دے نال یادداشت گوا بیٹھدے نیں۔ اوہناں دے علاج لئی مدد ملے گی۔ وزیراعلیٰ پنجاب دی ہدایت تے عوام دی دہلیز اتے ایمرجنسی سروس لئی ریسکیو 1122 دا دائرہ کار صوبے دی ساری تحصیلاں تک پھیلا دتا گیا اے تے ریسکیو موٹر بائیک سروس نوں وی 27 اضلاع تک توسیع دے دتی گئی۔ حکومت پنجاب نے سیلاب زدگان دی امدد لئی 20ارب دی خطیر رقم نال امدادی سامان تے دوجی بنیادی سہولتاں وی فراہم کیتیاں تے 56 ہزار سیلاب متاثرین وچ 12ارب توں ودھ روپے دی رقم وی تقسیم کیتی اے۔168000 متاثرین نوں خشک راشن دی فراہمی’ 4400 توں ودھ خیمے تے 34000توں ودھ آٹے دے تھیلے تقسیم کیتے نیں۔ وزیراعلیٰ نے امدادی سرگرمیاں لئی اپنا ذاتی ہیلی کاپٹر وی وقف کردتا۔ صوبے بھر وچ گریجوایشن تک تعلیم فری کرن دا وی اعلان کیتا جہدے توں صوبے دے لکھاں طلبا تے طالبات مستفید ہون گے۔میٹرک تے انٹرمیڈیٹ دے طلبہ تے طالبات لئی انصاف اکیڈمی دے اجرا دے ذریعے انقلابی پیر چکیا گیا اے۔ انصاف اکیڈمی پورٹل وچ 7000توں ودھ لیکچرز’ کوئز تے MCQ`sشامل نیں جہناں توں بآسانی گھر بیٹھے امتحان دی تیاری کیتی جا سکدی اے۔ مہنگائی دی ستائی عوام لئی حکومت پنجاب نے احساس راشن پروگرام دا وی آغاز کیتا اے جہدے تحت 100 ارب دی خطیر رقم نال صوبے بھر دے اک کروڑ خانداناں نوں بنیادی اشیائے ضروریہ آٹا’ گھی تے دالاں اتے 40فیصد تک رعایت دتی جاوے گی۔ وزیراعلیٰ پنجاب چودھری پرویز الٰہی نے سموگ دے ودھدے خطریاں دے پیش نظر پنجاب دے سارے اضلاع وچ سپیشل سموگ سکواڈز تشکیل دتے نیں۔ جہڑے سموگ نوں کنٹرول کرن لئی حکومتی اقدامات اتے عمل کروان گے۔ آلودگی نوں ختم کرن لئی موٹرسائیکل رکشہ دی جگہ الیکٹرک منی کارڈ متعارف کروان دا فیصلہ کیتا گیا اے۔ لہور وچ 25الیکٹرک بساں توں ماحول دوست پائلٹ پروجیکٹ دا وی آغاز کیتا جاوے گا۔ پنجاب دے 10اضلا ع وچ ائیر تے واٹر کوالٹی مانیٹرنگ سسٹم لان دا وی فیصلہ کیتا گیا اے تے ماحولیاتی آلودگی دے خاتمے لئی پلاسٹک دے ”سنگل یوز” نوں یقینی بنایا جاوے گا۔ حکومت پنجاب نے عوام دی سہولت لئی ”گو پنجاب” ایپ دا آغاز کر دتا اے جہدے ذریعے حکومت پنجاب دی ساری فیساں دی ادائیگی سنے کاشتکار وی ای آبیانہ دی ادائیگی بآسانی کر سکن گے۔ خدمات دی آن لائن فراہمی توں رشوت دا خاتمہ وی ہووے گا۔ 3ارب 91کروڑدی لاگت نال شاہکام فلائی اوور دا وی افتتاح کردتا گیا جہدے توں روزانہ 120000 گڈیاں دی آمدروفت ہووے گی تے 20کالونیاں دے رہائشیاں نوں فیدہ ہووے گا۔ لہور دے ماسٹر پلان 2050دی وی منظوری دے دتی گئی اے جہدے تحت لہور شہر دی ضروریات دے مطابق سہولتاں دتی جان گئیاں۔ پنجاب دی عوام لئی وزیراعلیٰ پنجاب دی ہدایت تے جائیداد دی خریدوفروخت تے اشٹام ڈیوٹی 2فیصد توں 1فیصد کر کے سالانہ 25 ارب روپے دا ریلیف فراہم کیتا جاوے گا۔ گجرات نوں ڈویژن دا درجہ دے کر وزیراعلیٰ نے گجرات دی عوام نوں تحفہ دتا اے۔ ایہدے علاوہ پنجاب وچ ہور پنج شہراں تونسہ شریف’ مری ‘ وزیرآباد’ تلہ گنگ تے کوٹ ادو نوں ضلع بنان دی منظوری وی دے دتی گئی اے جہدے توں انتظامی امور وچ بہتری آوے گی۔ پنجاب وچ شہیداں دی فیملیاں دی پینشن وچ چار گنا وادھے تے بالاں نوں مفت تعلیم دین دا وی اعلان کیتا گیا۔ نوجواناں دے روزگار لئی 30ارب روپے دے قرضہ جات دا اجرا کیتا گیا۔ پلس تے دوجے محکمیاں لئی 1200ڈرون کیمرے خریدن دا فیصلہ کیتا گیا جہدے ذریعہ پولیسنگ دے نظام نوں جدید تر بنایا جاوے گا۔ اوہناں کیمریاں دے ذریعے دوجی سرگرمیاں دی مانیٹرنگ وی کیتی جاوے گی۔ عوام نوں معیاری خوراک دین لئی 5شہراں وچ 55 گڈیاں تے موٹرسائیکلاں اتے مشتمل موبائل فوڈ لیبز تے چیکنگ سکواڈ دا افتتاح وی کیتا گیا اے جہدے تحت ددھ’ مصالحہ جات’ مشروبات’آئل تے دوجی شیواں دے معیار دی فوری جانچ پڑتال کیتی جاوے گی۔ وزیراعلیٰ پنجاب نے تریخ ساز اقدام کردے ہوئیاں سود دے نجی کاروبار اتے پابندی لان دا وی حکم دتا تے نکاح نامے وچ ختم نبوت دا حلف نامہ لازمی قرار دتا۔ طلبا لئی ناظرہ قرآن مجید تے ترجمہ لازمی قرار دتا گیا۔وزیراعلیٰ پنجاب چودھری پرویزالٰہی نے اپنے پہلے 100دن دی کارکردگی توں ناقدین نوں بھرواں جواب دتا اے تے کجھ دناںوچ انقلابی اقدامات کر کے پنجاب دی خوشحالی تے ترقی دی سمت متعین کردتی اے۔ اوہناں نے لوکاں دی زندگی وچ بہتری تے آسانی لیان لئی جہڑے اقدامات کیتے نیں اوہ اوہدا منہ بولدا ثبوت اے۔ وزیراعلیٰ پنجاب چودھری پرویزالٰہی نے ”سیاست نہیں خدمت” دے نعرے نوں عملی شکل دتی اے۔ پنجاب دی عوام دی خوش قسمتی اے کہ اوہناں نوں اک ایسا وزیراعلیٰ میسر اے جہدا مقصد صرف تے صرف پنجاب دے عوام دی خدمت اے۔پنجاب حکومت دی ایس کارکردگی نوں مدنظر رکھیا جاوے تے ایہہ کہنا غلط نہیں ہووے گا کہ جے پی ٹی آئی سردار عثمان بزدار دی جگہ چودھری پرویزالٰہی صاحب نوں وزیراعلیٰ نامزد کردیندی اے تو صوبہ پنجاب پاکستان وچ گڈ گورننس دی عملی مثال ثابت ہوندا۔ پنجاب دی عوام دی تقدیر بدلن لئی دیر نال ای سہی لیکن اک چنگا فیصلہ کیتا گیا اے امید اے کہ وزیراعلیٰ چودھری پرویزالٰہی دی قیادت وچ ترقی دا سفر انج ای جاری رہوے گا۔