دوجی سالانہ مولانا محمد ذاکر کانفرنس

گورنمنٹ گریجوایٹ کالج جامعہ محمدی شریف بھوآنہ وچ دوجی سالانہ مولانا محمد ذاکر کانفرنس دا پربندھ ہویا۔ ایس عظیم الشان کانفرنس دے موقع تے ای کالج وچ سرنو شروع کروائے جان والے بی ایس پروگرام (اردو’ انگلش’ پولیٹیکل سائنس) دا وی افتتاح ہویا۔ گورنمنٹ کالج یونیورسٹی لہور دے کنٹرولر امتحانات شہزاد احمد صاحب تے پروفیسر ظہیر احمد وٹو صاحب خصوصی طور تے گورنمنٹ کالج یونیورسٹی لہور دی نمائندگی لئی تشریف لیائے۔ بی ایس دے طلبہ نے پھلاں دی پتیاں نچھاور کر کے تے گلدستے پیش کر کے پروہنیاں دا استقبال کیتا۔ صاحب زادہ قمرالحق صاحب نے ”الرحمت بلاک برائے بی ایس پروگرامز” تے کنٹرول امتحانات شہزاد احمدصاحب نے بی ایس پروگرامز کا افتتاح کیتا۔ ایس موقع تے کنٹرولر امتحانات نے طلبہ نال اظہار خیال وی کیتا۔ اپنے ادارے دی لازوال خدمات دے چانن وچ طلبہ دے انر ملک و قوم دی خدمت دا جذبہ اجاگر کیتا۔ اوہدے مگروں ”مولانا محمد ذاکر کانفرنس” دا آغاز ہویا۔ ایس کانفرنس دی صدارت جناب صاحب زادہ قمرالحق سیالوی نے کیتی۔ پرنسپل اورینٹل کالج لہور جناب ڈاکٹر معین الدین نظامی ایس کانفرنس دے اچیچے پروہنے سن جد کہ ڈاکٹرشعیب احمد نے اچیچے پروہنے دی حیثیت نال رلت کیتی۔ مقررین وچ جناب ڈاکٹر امیر حمزہ’ جناب محمد رمضان قمری’ جناب ڈاکٹر شعیب احد’ جناب ڈاکٹر معین الدین نظامی’ شاعر محمد اسحاق عارف تے خالد اقبال خالد شامل سن۔ ساریاں نے حضرت مولانا محمد ذاکر دی حیات تے خدمات دے مختلف گوشیاں اتے سیر حاصل گل بات کیتی۔ صاحبزادہ قمرالحق نے صدارتی خطبہ دتا۔ اوہناں نے پروہنیاں دا شکریہ ادا کرن دے نال نال اپنے دادا جناب مولانا محمد ذاکر دی خدمات نوں جاری رکھن دا پختہ عزم کیتا۔ اخیر وچ پرنسپل ادارہ جناب ڈاکٹر فیصل حیات جپا نے محدودوسائل وچ کالج دی بے مثال خدمات دا تذکرہ کیتا۔نظامت دے فرائض پروفیسر حافظ احمد یار نے سرانجام دتے۔ کانفرنس دے اختتام تے پروہنیاں نے طلبہ تے سٹاف دے نال گروپ فوٹو بنوائے۔ کانفرنس وچ علاقہ بھر دی علمی تے سماجی شخصیات دے نال نال طلبہ دی کثیر تعداد نے رلت فرمائی۔ تحصیل بھوآنہ تے ضلع چنویٹ دے میڈیا نمائندگان نے خصوصی کوریج دتی۔ واضح رہوے کہ حال ای وچ گورنمنٹ گریجویٹ کالج جامعہ محمدی شریف بھوآنہ وچ تن بی ایس پروگرامز شروع کروائے نیں تے گورنمنٹ کالج یونیورسٹی لہور دے نال ایفی لی ایشن کروائی اے۔