سرکاری منصوبیاں تے ذاتی تختیاں

اقتصادی طور تے بدحالی دے شکار ایس ملک نوں فی الحال دو مسئلیاں دا سامنا اے اک تے تقرری تے دوجا مسئلہ توشہ خانے دی گھڑیاں دا اے۔ کسے نوں کوئی فکر نہیں کہ ملک دی معاشی صورتحال کس طرح دن بدن پاتال وچ ڈگدی جا رہی اے پر یار لوکاں نوں اوہناں چیزاں دی فکر اے جہناں نال نہ اوہناں دا کوئی تعلق اے تے نہ واہ۔ صورتحال ایہہ وے کہ ہر چوتھا دوست بیمار اے کسے نوں ڈینگی نے گھیریا ہویا اے تے کوئی کرونا دا شکار اے۔ سگوں ہن ایہناں دوہاں وباواں دا مشترکہ ایڈیشن وی مارکیٹ وچ آ چکیا اے۔ ڈینگی دیاں علامتاں وی نیں تے کرونا دی وی’ جتھے اک پاسے پلیٹ لیٹس گھٹ ہوندے نیں اوتھے ذائقے دی تے سنگھن دی حس وی متاثر ہو رہی اے یعنی Two in one والا معاملہ اے تے مریضاں دی گنتی واہوا اے پر کسے نوں ہن ایہدی پرواہ ای نہیں رہی کہ اسیں لوک اوکڑاں’ بیماریاں تے مسئلیاں دے حل دی تھاں ایہناں دے عادی ہو جان تے یقین رکھنے آں تے ایہناں چیزاں نال آپسی سمجھوتے دے تحت حیاتی گزارن لگ جانے آں۔ ایہو حال ڈینگی تے کرونا دا اے۔ نہ سرکار نوں ہن ایہدی فکر اے تے نہ ای سانوں لوکاں نوں ایس سلسلے وچ ہن کوئی خوف اے۔
ملتان شہر وچ سرکاری خرچے تے بنن والے پارکاں دے ناواں دا ٹھیکہ ساڈے دوست تے پی ٹی آئی دے ایم این اے نے اپنے خاندان دے ناں تے الاٹ کروا لیا اے۔ پہلے موصوف نے اک پارک دا ناں اپنے والد ملک صلاح الدین ڈوگر دے ناں تے رکھ دتا فیر دل دی تسلی نہ ہوئی تے دوجا پارک اپنے مرحوم بھائی عمران ڈوگر دے ناں تے رکھ لیا فیر اوہناں نوں اپنے چاچا مرحوم دی یاد نے ستایا تے اوہناں نے تریجے پارک دا ناں اپنے مرحوم چاچا لیاقت ڈوگر دے ناں تے رکھ دتا پر ایہ بڑی زیادتی ہوندی جے ایہناں دے دوجے چاچا ایس صدقہ جاریہ توں محروم رہ جاندے ایس لئی اوہناں نے چوتھے پارک دا ناں دوجے چاچا دے ناں تے ملک شوکت ڈوگر پارک رکھ دتا اے۔ ایہ پارک میرے گھر توں پنجی تریہہ قدم دے فاصلے اُتے تے ایس پارک لئی زمین لابر فیملی نے گلشن مہر کالونی دی منظوری دے ویلے ایم ایم این اے نوں گلشن مہر پارک دے ناں تے دتی سی۔ موصوف نے ملتان شہر وچ بنن والے ہر پارک تے ہون والے سرکاری خرچے دے بدلے اپنے سارے خاندان دے مرحومین دے ناں تے پارک بنوا کے اک اجیہا ریکارڈ قائم کیتا اے جہنوں توڑنا کسے ہور دے وَس دی گل نہیں سی۔
یورپ تے امریکہ یاں برطانیہ وغیرہ وچ کسے رکن پارلیمنٹ وغیرہ دے ابا’ اماں’ بھائی’ چاچا یاں دادا وغیرہ تے رہے اک پاسے’ آپ اوہناں دے ناں تے کسے پبلک بلڈنگ یاں پارک وغیرہ دا ناں رکھیا ہویا نہیں ویکھیا پر ہاں ایہ ویکھیا اے کہ لوکاں نے پارکاں وچ’ دریاواں دے کنڈھے تے بنے ہوئے گرین ایریاز وچ یاں سڑک کنڈھے رُکھاں دے تھلے رکھے ہوئے بنچ اپنے کسے دوست’ عزیز’ رشتہ دار یاں مرحوم والدین وغیرہ دی یاد وچ رکھوائے ہوندے نیں تے اوہناں تے اوہناں دے ناں دی چھوٹی جہی تختی لگی ہوندی اے یاں بنچ دی لکڑی تے اوہناں دا ناں لکھیا ہوندا اے پر ایہدے لئی اوہناں نے سارا خرچہ اپنی ذاتی جیب چوں کیتا ہوندا اے تے اوہنوں اپنے کسے پیارے دے ناں تے کردے ہوئے لوکاں دے ٹیکس دے پیسے استعمال نہیں کیتے ہوندے پر ساڈے ایتھے دا باوا آدم ای نرالا اے۔ ویگن سٹینڈ بناندے ہوئے تے ساڈے شہر دے رکن قومی اسمبلی اپنی جیب چوں رقم خرچ کرکے اپنی آمدنی دا ذریعہ بنا لیندے نیں جد کہ پارک بنواندے ہوئے ساڈے ٹیکساں دے پیسیاں دے زور تے ایہناں پارکاں دا ناں اپنے سارے خاندان دے ناں تے رکھ لیندے نیں۔
ملتان وچ کئی پرانے ادارے موجود نیں جہناں دے ناں شخصیات دے ناں تے نیں پر اوہناں دے ناں جہڑی شخصیات دے ناں تے رکھے گئے نیں اوہناں نے ایہناں اداریاں دے قیام لئی نہ صرف محنت کیتی سگوں اوہدے تے پلیوں پیسے وی لائے تے چندا اکٹھا کرن تے اپنیاں صلاحیتاں ورتیاں۔ ملتان وچ ولایت حسین اسلامیہ ڈگری کالج تے عملدار حسین اسلامیہ کالج ایہدیاں واضح مثالاں نیں۔ ایس توں علاوہ گیلانیاں دی ای قائم کردہ انجمن اسلامیہ نے شہر وچ کئی پرائمری تے ہائی سکول قائم کیتے جہناں وچ اسلامیہ ہائی سکول حرم گیٹ’ اسلامیہ ہائی سکول دولت گیٹ تے اسلامیہ ہائی سکول عام خاص باغ شامل نیں۔ ملتان وچ قائم گیلانی لاء کالج دا سہرا وی گیلانیاں دے سر جاندا اے۔ ملتان وچ مرحوم مرزا مسرت بیگ ورگے علم دوست لوکاں نے ملت سکول تے ملت کالج قائم کیتا۔ ایسے طرح رفاہ عام ہائی سکول’ نصرت الاسلام ہائی سکول’ مسلم سکول تے دوجے تعلیمی ادارے قائم ہوئے تے ایس خطے وچ تعلیم دے فروغ وچ اپنا کردار نبھایا۔
ملک وچ توشہ خانہ والا ڈرامہ پورے دھڑلے نال جاری اے تے یار لوک ایس بحث وچ لگے ہوئے نیں کہ کنہے پنجی فیصد تے تحفے حاصل کیتے تے کس ایماندار نے ایہ تحفے پنجاہ فیصد ادائیگی کرکے حاصل کیتے۔ کوئی ایس گل دی تفصیل جانن وچ لگا ہویا اے کہ کس تحفے دی قیمت اصل وچ کنی سی تے قیمت لان والیاں نے اوس تحفے دی قیمت کنی لائی۔ لوکاں دے ٹیکس نال بنن والے منصوبیاں تے اپنے ناواں دی تختی لانا توشہ خانہ دی غتربود توں کسے طرح وی گھٹ نہیں۔٭