زنانیاں اُتے تشدد وچ وادھا

اکبر روہیل

پاکستانی زنانیاں دی حالت زار قابل رحم اے۔ اسیں اینے وحشی ہو چکے آں کہ معصوم بچیاں نوں وی درندگی دا نشانہ بنان توں باز نہیں آندے کیوں جے قنون دی حکمرانی نہیں اے۔ سعودی عرب وچ ایس ویلے بہت زیادہ تعداد وچ زنانیاں شاپنگ پلازیاں سنے سرکاری دفتراں وچ کم کر رہیاں نیں جد کہ مختلف تفریحی مقامات اتے وی کافی تعداد وچ زنانیاں موجود ہوندیاں نیں۔ مجال اے کسے مرد دی کہ اوہ اوہناں نوں اکھ بھر کے ویکھ وی سکے کیوں جے سعودی عرب وچ قنون دی حکمرانی اے۔ مینوں جنا عرصہ ہو گیا ایتھے آئے میں کسے اک دن وی زنانیاں اتے تشدد دے حوالے نال کوئی اک واقعہ وی نہیں سنیا جد کہ پاکستان وچ آئے دن زنانیاں اتے تشدد دے واقعات وچ وادھا ای ہوندا جا رہیا اے۔ سمندری وچ 10سالہ معصوم بچی دی
لاش ملی ۔ ویمن ڈویلپمنٹ ڈیپارٹمنٹ دی رپورٹ دے مطابق پنجاب وچ ہر چوتھی زنانی گھریلو تشدد دا نشانہ بندی اے۔ ہور تے ہور کھانے وچ نمک بوہتا ہو جان تے وی زنانیاں اتے تشدد کیتا جاندا اے۔ ساڈے معاشرے وچ زنانی نوں پیراں دی جتی سمجھیا جاندا اے۔ ایہہ جہالت دی آخری نشانی ا ے تے اکثر انج دا اوہ مرد نما کھسرے کردے نیں جہناں دے والدین وی ساری عمر اک دوجے دے نال دست وگریبان رہے۔ انج دے مرد ساڈے معاشرے دے اوہ ناسور نیں جہناں نوں دنیا وچ وی ذلیل و رسوا ویکھیا گیا تے آخرت وچ تے اوہدا بہت وڈا حساب ہووے گا۔ انج دے جھگڑیلو خانداناں دے بچے وی ساری عمر خوش نہیں رہ سکدے کیوں جے والدین دا گھر وچ ویکھیا ہویا ماحول اوہناں نوں وی ذہنی مریض بنا دیندا اے ۔ گھرتوں باہر زنانیاں نال دوستیاں کرن والے اوہناں دے ایسے ناز نخرے چکدے نیں جیویں اوہ اوہناں دے غلام ہون مگر اوہو مرد جدوں خاوند بن کے گھر واپس آندے نیں تے اوہ انسانیت دی ساری حداں پار کر دیندے نیں۔انج دے انساناں نوں عبرت دا نشان بنا دینا چاہیدا اے جیویں ساڈے ایتھے مشتعل معاشرہ موقع اتے پھڑے جان والے ڈاکوواں نال کردا اے۔ سرکاری سطح اتے شائع ہون والی ایس رپورٹ دے مطابق کھانا ویلے تے نہ دین دی پاداش وچ وی زنانیاں اتے تشدد کیتا جاندا اے تے کسے دُوجی زنانی دے نال دوستی دا سوال وی تشدد دا کارن بندا اے۔ گھریلو زنانیاں اتے بے وفائی دا الزام لا کے وی تشدد دا نشانہ بنایا جاندا اے۔ ساڈے معاشرے وچ شوہر دی نافرمانی اتے زنانیاں نوں سب توں ودھ تشدد دا سامنا کرنا پیندااے۔ پنجاب دی زنانیاں اتے تشدد دے حوالے نال واقعات وچ دن بدن وادھا تشویش دا کارن زنانیاں نوں چاہیدا اے کہ اوہ اپنے اتے ہون والے تشدد دے خلاف میدان وچ نکلن کیوں جے اوہ کسے دی غلام نہیں نکاح دا مطلب وی غلامی نہیں بلکہ اک اسلامی معاشرے وچ زنانیاں نوں برابر دے حقوق حاصل نیں۔ اوہدے باوجود وی جہڑے درندے نما انسان زنانیاں اتے تشدد کردے نیں تے اوہناں دے لئی حکومت نے اک مفت ہیلپ لائن نمبر 1043 دتا اے جتھے زنانیاں اپنے موبائل توں مفت کال کر کے اپنے اتے ہون والے تشدد یا کسے وی جنسی ہراسمنٹ دی شکایت کرسکدی اے کجھ بہادر زنانیاں نے ہمت تے بہادری دا مظاہرہ کردے ہوئے ایس نمبر اتے کالاں وی کیتیاں نیں جہناں اتے پنجاب حکومت فوری ایکشن لے رہی اے۔ خاص کر چوہدری پرویزالٰہی دی حکومت ایس سلسلے وچ بہت کم کر رہی اے کہ زنانیاں نوں تنگ کرن والے دے آسے پاسے وی گھیرا ہن ہور تنگ کردتا جاوے۔ پاکستان وچ زنانیاں آبادی دا 48.76 فیصد نیں جہناں نے پاکستان دی پوری تریخ وچ اہم کردار ادا کیتا اے لیکن اوہناں نوں 1956 توں انتخابات وچ ووٹ پان دی اجازت ملی۔ پاکستان وچ زنانیاں اعلیٰ عہدیاں اتے وی فائز رہیاں نیں جہناں وچ وزیراعظم’ سپیکر قومی اسمبلی’ قائد حزب اختلاف دے نال نال وفاقی وزرائ’ ججز تے مسلح افواج وچ کمیشنڈ عہدیاں اتے خدمات انجام دتیاں۔ بے نظیر بھٹو نے 2دسمبر 1988 نوں پاکستان دی پہلی زنانی وزیراعظم دے طور تے حلف چکیا۔ تعلیم کارن پاکستان وچ زنانیاں دے مجموعی حقوق وچ بہتری وی آئی اے مگر اوہناں مقامات اتے جتھے پڑھے لکھے جاہلاں دی گنتی گھٹ اے تاہم پاکستان نوں ایسے مسائل دا سامنا اے جتھے زنانیاں نوں تعلیم دے میدان وچ پچھے رکھیا جاندا اے اوہدا تعلق گھٹ سرکاری فنڈنگ’ زنانیاں لئی گھٹ سکولاں تے کالجاں تے بعض علاقیاں وچ بیداری تے زنانیاں دے حقوق دی کمی پاروں تعلیمی اداریاں وچ زنانیاں دے داخلے دی گھٹ شرح توں وی اے۔ پسماندہ علاقیاں وچ عصمت دری’غیرت دے نام اتے قتل تے جبری شادیاں دے واقعات ہن وی رپورٹ ہوندے نیں۔ اوہناں سارے مسائل دا تعلق تعلیم دی کمی’ غربت’ پاکستان دا عدالتی نظام’ حکومتی حکام ولوں قنون اتے عملدرآمد وچ لاپرواہی تے پلس جیسے قنون نافذ کرن والے اداریاں دی وسیع پیمانے اتے ناقص کارکردگی نال وی جڑیا ہویا اے۔ بانی پاکستان قائداعظم محمد علی جناح زنانیاں بارے مثبت رویہ رکھدے سن۔ پاکستان دی آزادی مگروں ملک وچ زنانیاں دے خلاف سماجی تے اقتصادی ناانصافیاں دے خاتمے لئی فاطمہ جناح جئی ممتاز رہنماواں نے اوس کم دا سنبھالیا۔ جے جنرل ایوب خان منصفانہ انتخابات کراوندے تے پاکستان دی محترمہ فاطمہ جناحدنیا دے سب توں وڈے مسلم ملک دی پہلی مسلمان صدر بن جاندیاں مگر اوہ ایس دھچکے دے باوجود اوہناں نے 1950 تے 1960 دے دوران زنانیاں لئی بہت سارے اقدامات کیتے تے مغربی پاکستان وچ پہلی زنانی نمبردار (پنڈدی سربراہ) بیگم ثروت امتیاز نے 1959 وچ چیچہ وطنی ضلع منٹمگری (ہن ساہیوال) دے پنڈ 43/12L وچ حلف چکیا مگر جیویں جیویں ویلا لنگھیا اسیں اپنی زنانیاں نوں پرتشدد ماحول وچ اٹھن دا موقع نہیں دتا میں خراج تحسین پیش کرنا واں۔ محترمہ عاصمہ جہانگیر نوں جہناں نے زنانیاںدے حقوق اتے کھل کے آواز چکی پاکستان وچ لوڑ اے سعودیہ جئے قنون دی تاں جے ساڈی زنانیاں وی عزت و آبرو نال ملک دی ترقی وچ اپنا حصہ پا سکن تے وحشی نیم پاگل قسم دے افراد نوں قنون دے مطابق سزا دتی جاوے ۔ ایس سلسلہ وچ ساڈی عدالتاں نوں وی اپنا کردار ادا کرنا چاہیدا اے تاں جے اسیں پرامن ملک بن سکئیے۔ ایس سلسلے وچ ایمنسٹی انٹرنیشنل وی بہت چنگا کم کررہی اے۔ اوہنوں وی پاکستان وچ مضبوط کیتا جاوے خاص کر زنانیاں ایس تنظیم دا حصہ ضرور بنن۔