نویں سپہ سالار

رابعہ رحمان

جنرل عاصم منیر پاکستان فوج دے سولہویں سربراہ دی حیثیت نال 29نومبر 2022نوں کمان سنبھالن گے۔ پاکستان دی فوج اک اسلامی فوج اے جہدا شمار بلاشبہ دنیا دی بہترین فوجاں وچ ہوندا اے۔ ایس بنیاد اتے ایس طرحاں دی شاندار سپاہ دا سپہ سالار ہونا اک بہت وڈے اعزاز دی گل اے جہڑا صرف کجھ خوش نصیباں نوں ای حاصل ہوندا اے۔ پاک فوج دے سربراہ دا عہدہ بہت ساری وجوہات دی بنا تے نہ صرف ملک دے اندر بلکہ دنیا جہاں وچ اہمیت دا حامل اے۔ ایسے وجہ نال ہر کسے نوں انتظار تے
تجسس سی کہ فوج دا نواں سربراہ کون بندا اے۔پاک فوج دے نویں سربراہ جنرل سید عاصم منیر ہر لحاظ نال اک بہترین انتخاب نیں۔ اوہ اک انتہائی اعلیٰ کردار دے حامل ہون دے علاوہ بہترین پیشہ وارانہ صلاحیتاں دے وی مالک نیں۔ اوہناں دا 38 سال دا فوجی کیرئیرایس گل دا منہ بولداثبوت اے کہ پاک فوج دے سربراہ دی حیثیت نال اوہناں دا انتخاب ہر لحاظ نال موزوں تے میرٹ دے عین مطابق اے۔ ویسے وی اوہ سنیارٹی دے لحاظ نال سب توں سینئر سن۔ لہٰذا اوہناں دا ایس اہم عہدے لئی انتخاب کر کے وزیراعظم شہباز شریف نے اپنا آئینی تے قنونی اختیار بہترین طریقے نال استعمال کیتا اے۔ ملک دے اندر بالخصوص پچھلے کئی مہینیاں توں ایس بارے وچ اک بحث چل رہی سی جہدا نقطہ عروچ پچھلے دو ہفتے سن۔ ہر محفل وچ اک ای موضوع زیر بحث سی کہ ایہہ ہما کہدے سر اتے بیٹھدی اے۔ اوہنوں سیاسی’ سماجی تے ہر قسم دا رنگ دتا جا رہیا سی۔ اصولاً فوج وچ قیادت دی تبدیلی اک معمول دا عمل ہونا چاہیدا اے جہنوں عوامی بحث دا حصہ وی نہیں بننا چاہیدا تے دنیا وچ ہر جگہ ہوندا وی انج ای اے مگر پاکستان وچ بدقسمتی نال اوہنوں اک عوامی بحث دا سب توں ودھ زیر بحث آن والا موضوع بنا دتا گیا تے ہر کوئی اپنی سوچ دے مطابق اوہدے اتے رائے دے رہیا اے جو کہ کوئی خوش آئند گل نہیں۔ اوہدی بنیادی وجہ یقینا پچھلے 75 ورھیاں وچ فوج دا ملک دے اندرونی معاملات وچ عمل دخل اے جہدی بنا تے ایہہ عام تاثر اے کہ فوج ای ایس ملک وچ اصل طاقت دا محور اے لہٰذا فوج دے سربراہ دی حیثیت وی کلیدی تے بہت سارے حوالیاں نال فیصلہ کن سمجھی جاندی اے۔ ایس ساری بحث تے عمل نوں دراصل متنازعہ بنان وچ پچھلے وزیراعظم عمران خان دا کردار وی بہت اہم اے جہناں نے اپریل 2022وچ اک آئینی عمل مگروں اقتدار توں وَکھ ہون دا موجب براہ راست فوج دی قیادت نوں قرار دتا تے پچھلے 6مہینیاں توں عام جلسیاں وچ آرمی چیف دے عہدے تے اوہدے اتے نامزدگی بارے نہ صرف قابل اعتراض بیانات دتے بلکہ اوہنوں متنازعہ بنان دی وی بھرپور کوشش کیتی جہدے توں یقینا ادارے دا مجموعی تاثر وی بہت متاثر ہویا۔
بہرحال ہن خوش آئند گل ایہہ اے کہ بالآخر اک آئینی تے قنونی عمل دے تحت وزیراعظم شہباز شریف نے اپنے اختیارات دا استعمال کردے ہوئے مسلح افواج دے دو اعلیٰ ترین عہدیاں اتے تقرریاں کردتیاں نیں جہناں وچ
چیئرمین جوائنٹ چیفس آف سٹاف کمیٹی تے چیف آف دی آرمی سٹاف شامل نیں۔ سارے قابل فہم اندیشیاں دے الٹ صدر عارف علوی نے وی بوجوہ ایہناں تعیناتیاں دی منظوری دے دتی اے جو کہ یقینا اک قابل ستائش عمل اے۔ جناب عمران خان نے وی بظاہر ہن ایس عمل اتے کوئی اعتراض نہیں چکیا تے اوہدا آن والے دناں وچ طرزعمل ای ایہہ دسے گا کہ اوہ کس حد تک اپنی گل اتے قائم رہندے نیں۔ ملک وچ اک ہیجان جئی کیفیت سی جہڑی ہن بالآخر ختم ہوئی اے تے امید کیتی جانی چاہیدی اے کہ سارے سٹیک ہولڈرز اپنی اپنی ذمہ داریاں دا احساس کردے ہوئے اک ذمہ دارانہ رویہ اپنان گے تاں جے ملک نوں بحران توں کڈیا جا سکے۔
پاک فوج دے نویں سربراہ جنرل سید عاصم منیر ہر لحاظ نال اک بہترین انتخاب نیں۔ اوہ اک انتہائی اعلیٰ کردار دے حامل ہون دے علاوہ بہترین پیشہ وارانہ صلاحیتاں دے وی مالک نیں۔ اوہناں
دا 38 سال دا فوجی کیرئیرایس گل دا منہ بولداثبوت اے کہ پاک فوج دے سربراہ دی حیثیت نال اوہناں دا انتخاب ہر لحاظ نال موزوں تے میرٹ دے عین مطابق اے۔ ویسے وی اوہ سنیارٹی دے لحاظ نال سب توں سینئر سن۔ لہٰذا اوہناں دا ایس اہم عہدے لئی انتخاب کر کے وزیراعظم شہباز شریف نے اپنا آئینی تے قنونی اختیار بہترین طریقے نال استعمال کیتا اے۔ اینے چنگے انتخاب اتے وزیراعظم وی خراج تحسین دے مستحق نیں تے اوہناں نے آئینی اختیار ہون دے باوجود وی جیویں اتفاق رائے پیدا کرن دی کوشش کیتی اے اوہ وی لائق تحسین اے کیوں جے افواج پاکستان دی بقا’ یکجہتی تے سلامتی دی علامت اے لہٰذا ایہدا سربراہ انج ہونا چاہیدا اے جہدے اتے پوری قوم وی متفق ہووے۔ جنرل عاصم منیر کمان’ سٹاف تے انسٹرکشن دا وسیع تجربہ رکھدے نیں تے اپنے شاندار ملٹری کیرئیر دے دوران اوہ انتہائی اہم عہدیاں اتے فائز رہے نیں جہدی بنا اتے اوہناں لئی اپنے اہم فرائض منصبی سرانجام دینا ہور آسان ہووے گا اوہناں دا تعلق انفنٹری نال اے تے اوہ ایس رجمنٹ نال تعلق رکھن والے چوتھے آرمی چیف نیں۔ اک بہترین انفنٹری کمانڈ دی اے جہدی بنا تے دشمن وی اوہناں دی قائدانہ تے پیشہ وارانہ صلاحیتاں توں چنگی طرح واقف اے۔ ہن تک دی خبراں ایس گل دی عکاسی کردیاں نیں کہ ہندوستان وچ اوہناںدی تعیناتی اتے کسے حد تک تشویش وی اے تے ایہہ وی اک سپاہی لئی کسے اعزاز توں گھٹ نہیں کہ ایہدا دشمن ایہدے توں خطرہ محسوس کردا ہووے۔
اوہناں دا انتخاب پاکستان دے سارے دشمناں لئی وی اک واضح پیغام اے کہ الحمداللہ اسیں اپنے فیصلے خود تے ملک دے بہترین مفاد وچ کردے نیں تے انشاء اللہ پاکستان دی سلامتی تے قومی مفاد اتے کوئی سمجھوتہ نہیں کر سکدا۔