جگ وچ رولا پے گیا ناصر ادیب بازی لے گیا

ضلح سرگودھا قصبہ پھلروان دے اک غریبڑے گھر دے منڈے دا ناں ماں پیو نے محمد نواز رکھیا باپ غلام حسین چھوٹا موٹا زمیندارہ کر دا سی تے ماں خدیجہ بی بی گھر داری کر دی سی پنج پھیناں تے دو بھرا وَڈا ٹَبر جتھے نواز نوں کدی وڈا نوٹ ویکھن نوں وی نہیں سی ملیا غربت دی ایس چکی وچ پسے ٹبر دے اس منڈے نوں امیر ہون تے مشہور ہون دا شوق چڑھیا۔ نال دے پنڈ اک مالدار آدمی نوں سپیشل ویکھن گیا کہ او کس طرح دا وے اس پنڈ اَپڑیا تے پتہ لگا او فوت ھو چکا اے واپس گھر آکے اپنے چاچے کولوں پچھیا کہ چاچا جیہڑا مالدار آدمی مر دا تے اس دی فوٹو اخباراں وچ آوندی اے نال دے پنڈ دا مالدار بندہ مر گیا مگر اس دی فوٹو تے خبر اخباراں وچ کیوں نہیں آئی۔ پتہ نہیں اس دے چاچے دے دل وچ اس ویلے اے گل آئی تے اس نے جواب دِتا کہ پتر اخباراں وچ فوٹو اوہناں لوکاں دی اوندی اے جیڑے نسلاں نوں متاثر کر دے نیں۔ اے گل نواز نے پلے بنھ لئی۔ قدرتی طور تے کسے اللہ دے بندے کول گیا تے اس نے اس دا ناں ناصر رکھ دِتا۔ اینے ادیب نال لان دی اجازت منگی جیڑی کہ مل گئی۔ اس دے بعد اس نے امیر تے مشہور ہون دا سفر شروع کر دتا۔ ڈبل ایم اے کیتا مشہور نہ ھویا ،ناول لکھیا مشہور نہ ھویا، اخبار وچ میجر عزیز بھٹی دے نشان حیدر دا چرچا سنیا تے فوج وچ بھرتی ہوگیا۔ اس بیج وچ صدر پرویز مشرف وی سن اوہناں کولوں پچھیا کہ نشان حیدر کس طرح ملدا اے، اس جواب دتا او تے شہید ہو کے ملدا اے مگر اس آکھیا کہ میں تے اپنی شہرت دنیا وچ ویکھنا چاہناں واں۔ لہٰذا فوج وچوں واپس آگیا ۔ماپیاں دی ناراضگی سہی فیر پی ٹی وی تے بطور پروڈیوسر نوکری مل گئی۔ راولپنڈی نوکری جائن کرن جا رہیا سی کہ راہ وچ کسے جانوں بندے نے دَسیا کہ ناصر تیرے ناول تے کوئی بندہ فلم بنا رہیااے ایس نے فوراََن لاہور دا ٹکٹ کٹیا تے اسٹوڈیو نگر آگیا اوناں لوکاں نوں ملیا مگر اوناں اس دا ناں دین توں انکار کر دتا۔ اس نے اوناں تے کیس کر کے اپنا ناں فلم دے ٹائٹل دوایا مگر فلم ھٹ نہ ھوئی تے نہ ای اے مشہور ہوسکیا مگر اس نے فیصلہ کرلیا کہ ہُن میں ایتھوں ناں پیدا کیتے بغیر نہیں جاواں گا۔ اس نے دن رات اسٹوڈیو نگر وچ دھکے کھانے شروع کر دِتے ۔اک دن اوس ویلے دے مشہور ہدایتکار اقبال کاشمیری نوں اپنی کہانی سنائی اس نے اس نال کہانی تے اختلاف کیتا تے اس نے اس نوں گالی گلوچ کر کے دفتر وچوں کڈ دتا۔ ایہہ روندا ہویا ایور نیو اسٹوڈیو دے گارڈن وچ کھڑا سی کہ نالدے کمرے توں باہر اداکار محمد علی زیبا تے ہدایتکار حسن عسکری کھڑے سی۔ اوناں اس نوں اپنے کول سدیا تے ساری رو داد سنی تے اس نوں اپنے کمرے وچ لجاکے اوہو کہانی سنی جس دے بعد حسن عسکری نے محمد علی نوں آکھیا کہ اے منڈا اک دن فلم دا وَڈا رائٹر بنے گا تے نال ناصر ادیب نال وعدہ کر لیا کہ جد مینوں کوئی فلمساز مل گیا تے میں تیری اس کہانی اُتے فلم بناواں گا۔ ویلا گزر دا گیا ،اک دن حسن عسکری نوں پارٹی مل گئی۔ اس نے ناصر دی اوسے کہانی تے فلم بنائی۔ اس فلم دا ناں سی وحشی جٹ جتھوں جٹ سیریز دا آغاز ہویا۔ فلم کامیاب ہو گئی۔ ناصر ادیب دے حالات تھوڑے بدل گئے تے نال اس نے کلرکی دی نوکری کر کے گھر والیاں نوں وی لاہور بلا لیا۔ مگر اس دی مشہوری دی منزل اجے وی نہیں سی آئی۔ اوس اپنی جہدوجہد جاری رکھی ہوئی سی۔ اک دن اس دی ملاقات فلمساز محمد سرور بھٹی نال ہوئی او اوناں دناں وچ مولاجٹ بنان دی منصوبہ بندی کر رہے سن۔ او ناں نے ناصر ادیب نوں ساڈے ست ہزار وچ رائٹر سائن کر لیا۔ مولا جٹ لگی تے جس نے اس فلم وچ اک سین وی کیتا سی او وی ہٹ ہو گیا۔ اس فلم دی کمائی دا اے حال سی کہ جس سینما شیبتان وچ اے فلم لگی اس دے مالک نے مولاجٹ دی کمائی نال پرنس سینما بنا لیا۔ ناصر ادیب دے وارے نیارے ہو چکے سی۔ اس اتے فلماں دی بارش ہو گئی۔ بقول ہدایتکار مسعود بٹ دے اس نے,92 فلماں بنائیاں جناں وِچوں اَسی فلماں ناصر ادیب نے لکھیاں سن۔ ناصر ادیب دیاں کامیاب فلماں دی تعداد ایتھے بیان نہیں کیتی جا سکدی۔ ناصر ادیب ویکھدیاں ویکھدیاں چار سو توں وَدھ فلماں لکھ چکیا سی۔ اس دی فلم مولا جٹ دے مکالمے تن نسلاں نوں یاد نیں (نواں آیا سونیا )(مولے نوں مولا نہ مارے تے مولا نہیں مردا)۔
بقول معروف مصنف خلیل الر حمان قمر دے ناصر ادیب دی عوام وچ مقبولیت دا ایہہ عالم سی کہ ہال وچ سکرین تے جس ویلے ناصر ادیب دا ناں آئوندا تے سارا ہال تالیاں نال گونج اُٹھدا سی۔ نا صر ادیب کول کائنات دی ہر چیز آچکی سی۔ گڈیاں کوٹھیاں کاراں ماشا اللہ ملک دی مشہور سیاست دان آمنہ اُلفت ساڈی بھر جائی بن چکی سی۔ اولاد لائق فائق اپنی اپنی جگہ سیٹ مگر ناصر ادیب ایس پلیٹ فارم تے وی ہالی مطمئن نہیں سی۔ دو نسلاں اس دی قلم دِیاں متقدر ہو چکیاں سن پر حالی وی او اپنے آپ نوں ادھورا سمجھدا سی۔
چند سال پہلے بلال لاشاری نے لیجینڈ آف مولا جٹ بنان دا فیصلہ کیتا اس نے ناصر ادیب نوں ایہہ فلم لکھن دا آکھیا ناصر ادیب نے اے فلم پندرہ لکھ وچ سائن کیتی۔ فلم لگی تے اس نے دُھوڑاں پَٹ دِتیاں۔ اس نے پاکستان دی تیسری نسل نوں ویسڑن پیٹرن نال متاثر کیتا او ایس ویلے دو سو کڑوڑ توں ودھ دا بزنس کر چکی اے ۔بقول فلم دے ہدایتکاربلال لا شاری دے ناصر ادیب نے اپنے آپ نوں پنجابی فلم دا شیکسپئیر ثابت کیتا اے کیونکہ جیڑے او مکالمے لکھدا ایں او عوام دے روز مرہ دی زبان دے جملے بن جاندے نیں۔ سوال ایہہ وے کہ کیا ناصر ادیب نے اپنی زندگی دے مقصد نوں پا لیا اے جس دا جواب نفی وچ ملدا اے کیونکہ فلم لیجینڈ آف مولا جٹ توں اک ہفتہ پہلے اس نے مینوں پاکستان فلم رایٹر ایسوی ایشن دا سیکر ٹری جنرل نامزد کیتا ہویا اے جس دا او خود چیئرمین اے۔ اوس دن توں لے کے اج تک اس دی تے میری بہت ساریاں ملاقاتاں ہو چکیاں نیں۔ میں اس نوں حالی وی خلا وچ گھور دا ویکھیا، میرے خیال دے مطابق اوس دے اندر حالی ہور بڑا کچھ پک ریا اے۔ ایتھے اک سوال ہور اُبھر کے سامنے آجاندا اے کہ کجھ لوگ آکھدے نیں کہ ناصر ادیب نے قوم نوں کیہ دتا اے ،ایس سوال دا جواب میرے کول وی بہت اعلی تے عرفا اے جیڑا میں دوسری قسط وچ دیاں گا کیونکہ نا صر ادیب دی ماں نے جیہڑے ناصر ادیب نوں فلماں دے کم لئی اجازت دین لگیا ںجملہ آکھیا سی کہ پتر میں اے تے نہیں جاندی کہ توں کیڑا کم کرن لگا ایں مگر اے تینوں دَس دیاں کہ توں جس میدان وچ جاویں گا لوگ آکھن گے کہ ایہو جے پتر ماواں روز روز نہیں جمَدیاں۔