گلاں عرفان قادر دیاں

طلعت عباس خان

کجھ دیہاڑیاں توں ہر کوئی اکو سوال کردا وکھائی دیندا سی کہ کون بنے گا۔ 23نومبر نوں صورتحال بڑی حد تک واضح ہو گئی اے کہ نویں سپہ سالار جنرل سید عاصم منیر ہون گے۔ اوسے دن سانوں وی وزیراعظم ہائوس توں چائے دی نشست دا حصہ بنن لئی فون آیا۔ اسیں بار روم وچ وکیل ساتھیاں نوں ایس خصوصی چائے دعوت بارے دسیا۔ پی ایم ہائوس جان لئی ساڈے نال مسلم لیگ (ن) لائرز فورم دے مرکزی نایب صدر ایڈووکیٹ عابد عزیز راجوری وی سن۔ اسیں دوویں مقررہ وقت صبح 11وجے پی ایم ہائوس اپڑے۔ اوتھے ساڈے میزبان سابق جج لہور ہائیکورٹ تے سابق اٹارنی جنرل وزیراعظم دے معاون خصوصی عرفان قادر سن۔ اوہناں دا شمار کجھ سینئر تے نامور قانون داناں وچ کیتاجاندا اے۔ سمارٹ خوبصورت شخصیت دے مالک نیں۔ ایہناں دے بارے مشہور اے جس عدالت کھڑے ہوندے نیں اوہناں دی موجودگی دا ساریاں نوں پتہ چل جاندا اے۔
کئی واری حکومتاں بدلن تے پیغام ملیا کہ پلیز ایہناں نوں اٹارنی جنرل نہ لایا جاوے۔ ایس لئی کہ عدالت وچ سوالات کرن وچ مشکل پیش آندی اے۔ جس دور وچ جدوں اوہ اٹارنی جنرل سن چیف جسٹس آف پاکستان افتخار چوہدری نے کوئٹہ دے حالات دی وجہ نال سپیشل بنچ تشکیل دے رکھیا سی۔ بنچ دے بنن توں اک دن پہلاں میڈیا تے بریکنگ نیوز چلی کہ بلوچستان سڑ رہیا اے تے حکومت نوں ایہدی فکر نہیں۔ وزیر داخلہ نے اٹارنی جنرل نوں سکیورٹی خطریاں پاروں بلوچستان جان توں منع کر رکھیا سی پر جدوں ایہ نیوز چلی تے اوہناں نے جان دی پروا کیتے بناں وزیر داخلہ نوں کہیا میں کل ایس بنچ وچ پیش ہون جا رہیا واں۔ دلیر اٹارنی جنرل نے جان دی پرواہ کیتے بناں دوجے دن بنچ دے سامنے پیش ہون گے۔ ججاں نے حیران ہو کے کہیا اسیں تے تہانوں پیش ہون دا نوٹس نہیں دتا۔ کہیا کل تہاڈی ای نیوز سن کے پیش ہون دا فیصلہ کیتا سی کہ ویکھ سکاں کہ بلوچستان کتھے سڑ رہیا اے؟ میں ایتھے اگ بجھان آیا واں۔
ایہ ٹھیک اے کہ کجھ حضرات اوہناں دی موجودگی توں پریشان ہو جاندے نیں۔ جی ہاں ایہ ساڈے سب دے ہردلعزیز وزیراعظم دے معاون خصوصی عرفان قادر نیں۔ ایہناں توں سارے واقف نیں۔ نویں چیف آف آرمی سٹاف جنرل سید عاصم منیر دی سمری جدوں وزیراعظم ہائوس اپڑی تے اوسے دن اتفاق نال اسیں وی عرفان قادر دے دفتر وچ چائے پی رہے سی۔ گرم گرم چائے دے نال گرم گرم موضوع تے عرفان صاحب نال موجودہ حالات تے گلاں تے تبصرے سامنے بہہ کے سنن نوں ملے۔ اوہناں نے دس دتا کہ اج سمری وزیراعظم دفتر پہنچ چکی اے۔ کل تک چیف آف آرمی سٹاف دی سمری تے صدر پاکستان دستخط کر دین گے۔ ایہ دسدے ہوئے اوہناں دا چہرہ پرسکون تے ہلکی جہی مسکراہٹ سی۔ کہیا ایس لئی کہ صدر دا کم دستخط کرنا اے مشورہ دینا نہیں۔ ایہ گلاں سن کے خوشی خوشی واپس بار روم وچ آئے جد کہ بار میڈیا تے ہیجان نمایاں سی۔ عمران خان کہہ چکے سن کہ اسیں آئین تے قنون دے مطابق صدر دے نال رَل کے کھیڈاں گے۔ نویں صورتحال پیدا کراں گے پر آئین ایہ وی دسدا اے صدر بنن دے بعد صدر کسے اک جماعت دے صدر نہیں رہندے پر ایہدے باوجود سمری ملدے ای صدر عارف علوی لہور عمران خان نال مشورہ کرن چلے گئے جد کہ اوہناں نوں انج نہیں سی کرنا چاہیدا۔
ایس کشمکش وچ 24نومبر شام چار وجے دے بعد اک چینل نے عرفان صادر صاحب نال سمری دے حوالے نال سوالات کیتے۔ عرفان قادر نے بطور قنون دان دسیا کہ صدر صاحب دا کم مشورہ کرنا نہیں دستخط کرنا اے۔ انشاء اللہ صدر صاحب دستخط کر کے اپنا فرض نبھان گے۔ لگدا اے اوہناں دا ایہ تبصرہ صاحبان اختیار نے سنیا تے پسند کیتا۔ ایہدے کجھ ای دیر بعد بریکنگ نیوز سنن نوں ملی کہ صدر پاکستان نے دستخط کر دتے نیں۔ عرفان قادر صاحب جوڈیشری تے وکیلاں وچ ای ہردلعزیز نہیں اپنے موکلاں دے وی ہیرو نیں۔ اوہناں دے اک موکل نے جس طرح بلائنڈ چیک دے کے عزت نال نوازیا اجہی عزت کسے نوں بڑی گھٹ ملدی اے۔ ایہ خط وکلاء کمیونٹی لئی وی قابل فخر اے۔ ایس لئی ایس خط نوں اج کالم دا حصہ بنا رہیا واں۔
السلام علیکم! اپنے مقدمے دے سلسلے وچ تہاڈے نال ملاقات ہوئی تہاڈی شخصیت توں میں بڑا متاثر ہویا۔ تہاڈے ورگے لوک دنیا وچ گھٹ نیں۔ تہاڈا گزارا کیویں ہووے گا ایس دنیا وچ۔ مینوں تے تسیں ایس ماحول دے بندے ای نہیں لگدے یاں تے تسیں جسٹس بن جائو تے اختیارات مکمل طور تے تہاڈے ہتھ وچ ہون تے تسیں انسانیت دی خدمت کر سکو نہیں تے اینی لیاقت تے محنت دے باوجود جدوں نالائق لوکاں نال واہ پیندا اے تے بڑی ڈپریشن ہوندی اے۔ انسان بڑا کڑھدا اے بھاویں اللہ دے ہر کم وچ حکمت ہوندی اے تے کوئی وی اللہ دا فیصلہ ساڈے لئی بہتر ہوندا اے پر سانوں نظر نہیں آندا کہ ایہدے وچ کیہ بہتری اے۔ اللہ تہاڈے علم زور بیان تے عزت وچ ہور وادھا کرے میریاں دعاواں تہاڈے نال نیں۔ تہاڈی شخصیت توں ہر بندہ متاثر اے۔ اللہ تہانوں بڑی عزت دیوے گا۔ میں ایس خط دے نال جڑیا سادہ چیک وی گھل رہیا واں۔ جو رقم لکھو گے میری خوشی ہووے گی۔ تسیں میرے کیس وچ جو محنت کیتی تے جنی چنگی پرفارمنس دتی میں اوہدے توں بڑا خوش آں۔ میں تہاڈی محنت تے ایس مقدمے وچ تہاڈی کوشش توں بڑا مطمئن آں۔ اللہ تہانوں خوش رکھے’ تسیں مینوں ہمیشہ یاد ہوو گے۔ دعا گو الطاف محمود یکم جولائی 2002ئ۔ایہ خط ساڈے سب دے جذبات دا عکاس اے مینوں تے تہاڈی کال بیک کرن تے میسج دا جواب دین تے کھلان پلان دی خوبی بڑی چنگی لگدی اے دعا اللہ تہانوں چشم بد توں بچائے’ صحت تے لمی عمر دیوے۔ (آمین) ٭