متوازن خاندان ،خوشحال خاندان

بہت ساریاں تقریباں وچ رلت دا موقع ملدا رہندا اے۔ جتھے جا کے بہت کجھ نواں تے چنگے توں چنگا سکھن دا موقع ملدا اے لیکن کدی کدی قسمت ایسی محفلاں وچ وی لے جاندی اے جتھے اول بوریت تے اخیر تشنگی رہ جاندی اے۔ ایسی ای اک تقریب وچ کجھ دن پہلاں گوجرانوالہ چیمبر دے خوبصورت ہال وچ رلت دا موقع ملیا۔ ساڈے میزبان نے ساڈے کسے مہربان کولوں ساڈا نمبر لیا تے فون کیتا کہ تسیں ایس تقریب وچ ضرور رلت کرنی ہووے گی۔ تقریب دا عنوان سی” متوازن خاندان’ خوشحال خاندان”۔ ایہہ عنوان مینوں بہت پسند اے تے ایہدے اتے میں نوائے وقت وچ تے کجھ دُوجے اخباراں وچ تسلسل نال اپنے تجزیے لکھن دی کوشش وی کردا رہنا واں۔ میرا خیال اے کہ پاکستان دے بہت سارے مسئلیاں پاروں ملکی آبادی وچ بے تحاشا وادھا اے۔ اک پاسے ملکی آبادی وچ وادھا ہو رہیا اے تے نال ای سرمایہ دار تے کاروباری لوک ملک دی سونا اُگلدی زمیناں نوں ہائوسنگ سوسائٹیاں دے نام اتے ہڑپ کررہے نیں۔ ایہہ المیہ اے کہ جہڑا ملک زرعی ملک دی شناخت رکھدا اے اوس ملک وچ پچھلے کئی ورھیاں توں گندم’ چینی’ دالاں تے دُوجیاں کئی ضروریات زندگی دوجے ملکاں توں منگوائی جا رہیاں نیں۔خیر ایس عنوان تے میرے سنے بہت سارے لکھاری لکھ رہے نیں۔ ہن ایہہ پڑھن والیاں تے پالیسیاں بنان والیاں اتے اے کہ اوہ کدوں نیند غفلت توں جاگدے نیں تے کدوں ملک وچ چھوٹے خاندان دے نال چھوٹے گھر نوں عملی شکل دین لئی کوئی قابل عمل منصوبہ شروع کردے نیں۔ڈسٹرکٹ پاپولیشن ویلفیئر آفیسر عدنان اشرف بٹ ولوں جدوں دعوت نامہ ملیا تے اوہدے اتے 12:30 ہال وچ بیٹھے لوکاں دی حاضری یا رجسٹریشن 12.50 اتے تلاوت 12.55 اتے نعت ‘ 1وجے ودھدی آبادی دے معاشی تے معاشرتی اثرات اتے عدنان اشرف ڈسٹرکٹ پاپولیشن افسر ولوں سوال تے جواب فیر 1.25 صدر چیمبر دا اظہار خیال تے اختتامی کلمات شبیر بٹ ایڈیشنل ڈپٹی کمشنر جنرل نے ادا کرنے سن۔ اخیر وچ دو وجے لنچ دا پربندھ کیتا جانا سی۔
اسیں اپنی عادت ہتھوں مجبور کئی کم چھڈ کے مقررہ وقت اتے ساہ پھلے جدوں ہال پہنچے تے ویکھیا اوتھے صرف شہباز جٹ صاحب بیٹھے ہوئے سن یا دو میزبان۔ چہرہ شناسی مگروں مینوں بیٹھن نوں کہیا گیا تے فیر باقی صحافیاں دا انتظار شروع ہویا۔ اسیں پچھیا سنن والے ہور کہڑے لوک آ رہے نیں تے عدنان بٹ صاحب نے فرمایا الیکٹرانک میڈیا دے لوک تے کجھ کالم نگار۔ خیر ٹھیک اک گھنٹہ مگروں حاضرین دے بار بار اصرار اتے تقریب شروع ہوئی تے قاری شاکر صاحب نے خوبصورت لب و لہجے وچ تلاوت کر کے دِلاں نوں خوب راحت پہنچائی۔ حیران کن طور تے تلاوت مگروں نعت پڑھن لئی کسے نوں نہیں کہیا گیا۔ فیر ڈسٹرکٹ پاپولیشن ویلفیئر افسر ولوں اعدادوشمار لئی ٹی وی سکرین اتے بریفنگ شروع ہوئی جہڑی بڑی بور رہی۔ بہت سارے لوک ایس دوران باقاعدہ اُونگدے نظر آئے۔ میرے خیال وچ صحافیاں تے لکھاریاں نوں ملکی یا غیر ملکی اعدادوشمار دا اینی تفصیل نال دسنا ویلے دا ضیاع اے۔ جے کوئی واقعی صحافی یا لکھاری ا ے تے اوہنوں ریاستی مسائل تے دنیا توں تقابلی جائزیاں توں بخوبی آگاہی ہونی چاہیدی اے۔بریفنگ دے نام تے ساڈے میزبان نے بوہتا ویلا ایہو دسن دی کوشش وچ لگے رہے کہ بنگلہ دیش وچ کیہ اے لیکن ایس آبادی کنٹرول وچ اوتھوں دی حکومتاں’ انتظامیہ’علما’ استاد تے فیر این جی اوز دا بہت وڈا ہتھ وی شامل اے جہڑا گھر گھر جا کے لوکاں نوں آبادی وچ کمی لیان دے طریقے سمجھاندے رہے۔ خیر ایہہ سلسلہ اختتام ہویا تے امید سی کہ ہن سوال تے جواب دا دور چلے گا لیکن میزبان نے ڈاکٹر جاوید اکرم نوں گل بات لئی کہیا’ ڈاکٹر جاوید اکرم واقعی اک سچے پنجابی نیں۔ اوہناں نے آبادی کنٹرول کرن دے حوالے نال وی پنجابی کلام پڑھنا مناسب سمجھیا تے کلام ایس انداز نال پڑھیا کہ سارا ہال جاگ گیا تے ہر پاسوں آواز آن لگی۔ اسیں آبادی کنٹرول کرن لئی اپنا ہر ممکن کردار ادا کراں گے۔ ڈاکٹر جاوید اکرم نے کہیا پنجاب وچ اک ای ایسا بہادر دلیر تے دانا بندا پیدا ہوندا اے جہنے دلی توں لے کے افغانستان تک حکومت کیتی سی اوہدا نام مہاراجہ رنجیت سنگھ سی۔ ایس توں پہلاں ہمیشہ حملہ آور افغانستان ولوں آیا کردے سن۔ کہن دا مطلب کہ بچہ اک وی لائق ہووے تے کیہ کہنے۔ فیر اک مولانا صاحب نوں گل بات دا موقع دے دتا گیا۔ اوہناں نے بڑے سوہنے انداز وچ آبادی کنٹرول وچ رکھن دے حوالے نال بیان کیتا۔ اختتامی کلمات لئی شبیر بٹ صاحب بڑے دبنگ انداز نال سرکاری موقف تے کامیاب زندگی لئی مناسب خاندان دی اہمیت بارے بہترین گل بات کردے رہے۔ قرآن وچ اے کہ ماواں اپنے شیر خوار بالاں نوں ڈھائی سال ددھ پلائو۔ ایہہ اللہ دی حکمت اے کہ جے ماواں بچے دی پیدائش مگروں ڈھائی سال تک بچے نوں اپنا ددھ پلاون گئیاں تے اوہنوں نہ صرف ماں بچے دی صحت بلکہ نویں آن والے ننھے پروہنے نوں خاندان ولوں بہت سارا پیار تے توجہ وی مل سکدی اے۔ فیر اوہدے اگلے سال کسے دوجے بچے لئی والدین جے کوشش کرن تے بالاں دی پیدائش وچ وقفہ چار سال دے کول ہو جاوے گا۔ ماواں دی صحت تے بچے دی مناسب دیکھ بھال لئی ایہہ اک بہترین ترتیب رکھی گئی اے۔ ہن ضرورت اے کہ انتظامیہ’ میڈیا’ استاد تے مولوی صاحبان آسان لفظاں وچ پنڈ پنڈ’ گھر گھر ایہہ پیغام پہنچان کہ آبادی کنٹرول کرنا کیوں ضروری اے تے کیویں ممکن اے کہ میاں بیوی آپس دے تعلق نوں وی جاری و ساری رکھن تے بالاں دی پیدائش وچ وقفہ وی بنیا رہے۔ ایس سلسلے وچ جتھے سکول تے کالج وچ نویں زندگی شروع کرن والے بالاں نال گل کرنی چاہیدی اے اوتھے ای اوہناں بڈھی دادیاں’ پھپھیاں تے چاچیاں تائیاں نال وی گل کرن دی لوڑ اے جہڑیاں نویں ووہٹی توں پہلے مہینے ای کسے خوشخبری دی امید لا لیندیاں نیں تے فیر دادیاں پوتیاں دی جوڑیاں بنان دے چکر وچ بہو نوں چھیتی تے ہور اولاد پیدا کرن لئی اُکساندیاں نیں۔ ایہہ سلسلہ مسلسل چلنا چاہیدی اے تے علما کرام نوں امت ودھان والی حدیث دے نال بالاں دی تربیت دے حوالے نال بیان کیتی گئی حدیثاں تے قرآنی احکامات بارے وی دسیا جانا چاہیدا اے۔ پاپولیشن افسر عدنان بٹ ولوں ایہہ وی دسیا گیا کہ ایس ویلے اک سو توں ودھ علما کرام آبادی روکن یا آبادی مناسب رکھن لئی انتظامیہ دے پے رول اُتے نیں۔ ایس مسئلے اتے بہت کجھ لکھیا جا سکدا اے لیکن سب توں اہم گل ایہہ اے کہ پاپولشن افسر لکھاریاں ‘صحافیاں تے دانشوراں دے نال مستقل رابطہ رکھن تاں جے متعلقہ لوکاں تک پیغام بہتر طریقے نال پہنچان دا لائحہ عمل اختیار کیتا جاوے۔ اخیر وچ چیمبر صدر نے لکھی ہوئی تقریر پڑھنی شروع کیتی تے تلفظ دی غلطیاں نال ہال نوں جگان وچ بھرپور کامیاب رہے۔ ایہہ بڑی بدقسمتی اے کہ اینے وڈے عہدے دار نوں ایسے اہم موضع اتے دو منٹ وی گل نہیں کرنی آندی۔ کیہ ای چنگا ہوندا کہ جناب صدر چیمبر تھوڑی تیاری نال مناسب لفظاں دا چنائو کر کے نہ صرف آبادی کنٹرول کرن دے حوالے نال گل بات کردے بلکہ فیکٹریاں’ کارخانیاں’ دکاناں تے دُوجے کاروبار نال جڑے لوکاں وچ ایس پیغام نوں پہنچان دا ذمہ وی لیندے۔ گروپ فوٹو ہویا تے فیر کجھ خاص تے نامور لوکاں نوں وی آئی پی کمرے وچ تے اسیں جیویں کجھ نامعلوم لکھاریاں نوں اوتھے ہال وچ کھان دے بند ڈبے پھڑا دِتے گئے۔ مینوں وزیراعلیٰ ہائوس’ گورنر ہائوس تے ایسی دوجیاں تقریباں وچ رلت دا موقع ملدا رہندا اے ایہہ کدھرے نہیں ہوندا کہ میزبان تقریب مگروں کجھ لوکاں نوں وی آئی پی کمرے وچ لے جاوے تے کجھ نوں اوتھے بھل جائو۔عثمان بزدار ہووے’ شہباز شریف یا چودھری پرویزالٰہی’ ایہہ سارے کالم نگاراں نوں جدوں بلاندے نیں تے اوہناں نال انج پیش آندے نیں جیویں کدی اک ای سکول وچ پڑھیا کردے سن۔ دانشور نوں چاہ’ کھان یا لفافے دی لوڑ نہیں ہوندی ہاں مگر! عزت دی بہت لوڑ ہوندی اے۔