تنویر ظہور (صحافی ، ادیب)
ایم آر شاہد
اردو تے پنجابی دے معروف ادیب’ صحافی تنویرظہور 19اگست 1946ء بمطابق 11رمضان المبارک بروز جمعتہ المبارک بازار حکیماں اندرون بھاٹی گیٹ لہور وچ پیدا ہوئے۔ ایہناں دے والد دا ناں ظہورالدین بھٹی سی۔ ایہناں دے والد بزنس مین سن تنویر ظہور دی والدہ زہرہ بیگم 13 جنوری 1959ء نوں وفات پا گئیاں۔ اوہ اپنی ویاہ دے بعد 13 ورھے زندہ رہیاں۔ اوس ویلے اوہناں دی عمر 32 ورھے سی۔ تنویر ظہور اس ویلے چھیویں جماعت دے طالب علم سن ایہ جدی پشتی لہور دے رہن والے سن۔ ایہناں دے والد دا ویاہ یکم جولائی 1945ء وچ ہویا۔ ظہورالدین بھٹی دی عمر 20 ورھے تے اوہناں دی شریک حیات دی عمر 18 ورھے سی پہلے ایہ درزیاں دا کم کردے سن فیر راشن ڈپو ہولڈر بن گئے۔
تنویر ظہور دے دو بھائی تے تن بھیناں نیں۔ ایہ بھائیاں وچوں سب توں وڈے سن۔ حضرت داتا گنج بخش دی درگاہ دے پچھے ہجویری محلہ وچ ایہناں دا آبائی گھر اے۔ اوہناں دسیا سی کہ پیدائش توں لے کے 1979ء تک یعنی 33 ورھے اوہ اپنے آبائی گھر ہجویری محلہ وچ رہے۔ ایہدے بعد 33 ورھے ناصر پارک بلال گنج وچ گزارے۔ اپریل 2014ء وچ نیلم بلاک علامہ اقبال ٹائون شفٹ ہو گئے۔ چوہدری پرویزالٰہی نے اپنے پہلے دور حکومت وچ دس مرلے دا پلاٹ صحافی کالونی (ہربنس پورہ) وچ دتا سی۔
تنویر ظہور نے ابتدائی تعلیم ایم سی پرائمری سکول توں حاصل کیتی۔ ایہ سکول داتا صاحب دے مزار دے نیڑے ذیلدار روڈ تے سی۔ مسلم ماڈل ہائی سکول لہور وچ چھیویں جماعت وچ داخل ہو گئے۔ ایس سکول توں مڈل دا امتحان پاس کیتا ایہ 1962ء دا زمانہ سی۔ مسلم ماڈل ہائی سکول وچ ”نشان منزل” دے ناں توں اک رسالہ چھپدا سی اوہدے وچ ایہناں دیاں لکھتاں چھپدیاں سن۔ ایس طرح اوہناں نوں لکھن دا شوق مسلم ماڈل ہائی سکول توں شروع ہویا۔
تنویر ظہور کریسنٹ میگزین وچ وی لکھدے رہے۔ ایہناں دے تن بیٹے تے چار دھیاں نیں۔ وڈا بیٹا ایم کام کرکے اک بینک وچ ملازم اے۔ دوجا بیٹا ایم بی اے کر کے اک ملٹی نیشنل کمپنی وچ اکائونٹس افسر اے تے تریجا بیٹا انجینئر اے۔ تنویر ظہور دے وڈے بیٹے دا ناں فیض تنویر اے اوہ فیض احمد فیض دی سالگرہ والے دن پیدا ہویا سی۔ تنویر ظہور نے ایہدا ناں فیض تنویر رکھیا۔ ایہ خبر اخبارات وچ وی چھپی۔ اوہناں دی اک دھی کرن تنویر تے دوجی دا ناں افشاں تنویر اے۔ ساریاں دھیاں اعلیٰ تعلیم یافتہ تے اپنے اپنے گھراں وچ خوشحال زندگی گزار رہیاں نیں۔
تنویر ظہور دی اردو تصانیف:
(1) حسن اور خوشبو (شاعری) (2) دلچسپ ملاقاتیں (اردو ادیبوں کے انٹرویو) (3) وہ ہوئے ہم کلام (اردو ادیبوں کے انٹرویوز) (4) فیض اور پنجابی (فیض احمد فیض کے پنجابی پیار کے بارے میں) (5) روح کی معرج (سفرنامہ عمرہ) (6) یادیں (جسٹس (ر) ڈاکٹر جاوید اقبال کی یادداشتیں) (7) معراج خالد (شخصیت اور یادیں) (8) عزیز احمد مغل کی جیون یادیں (سماجی شخصیت) (9) ڈاکٹر محمد انور چوہدری (طب اور عوامی خدمت کا روشن مینار) (10) قائداعظم سے بینظیر بھٹو تک (جسٹس (ر) ڈاکٹر جاویداقبال کی یادوں کے آئینے میں) (11) عہدساز مصنف (جسٹس (ر) ڈاکٹر نسیم حسن شاہ کی یادداشتیں) (12) وقت سے مکالمہ (اردو ادیبوں کے انٹرویو) (13) جرأت کا پیکر (جسٹس ڈاکٹر نسیم حسن شاہ کی یادیں) (14) جسے چاہا در پہ بلا لیا (سفرنامہ عمرہ) (15) نوزشریف (شخصیت اور کارنامے) (16) میرا بچپن (مشہور زمانہ لوگوں کا بچپن) (17) سچ کیا ہے؟ (جسٹس سید سجادعلی شاہ کی یادداشتیں) (18) یہ لندن ہے پیارے (سفرنامہ برطانیہ) (19) میاں محمد اظہر’ کونسلر سے گورنر تک) (20) منیرنیازی کی باتیں (یادیں) (21) میرا عہد جو میں نے لمحہ لمحہ جیا (خودنوشت) (22) یادیں (کالموں کا مجموعہ)
تنویر ظہور دیاں پنجابی کتاباں:
-1 جیون پل صراط (پنجابی شعری مجموعہ) -2 جیون لنگھیا پباں بھار (شعری مجموعہ) -3 چونویاں پنجابی غزلاں (پنجابی غزلاں دی چون) -4 ویلے نال گلاں (پنجابی شاعراں تے ادیباں دے انٹرویوز) -5 استاد دامن (حیاتی شاعری تے وچار) -6 وڈے لوگ وڈیاں گلاں (پنجابی مضموناں دا مجموعہ) -7 علامہ اقبال تے پنجابیت۔ ایہناں ادبی خدمات دے اعتراف وچ بہت ساریاں سرکاری تے غیرسرکاری تنظیماں توں ایوارڈز ملے۔ اوہ وکھووکھ علمی’ ادبی’ ثقافتی تنظیماں دے ممبر تے عہدیدار رہے۔
تنویر ظہور دا انتقال 2نومبر 2022ء نوں لہور وچ ہویا۔ ایہناں دی آخری آرام گاہ کریم بلاک علامہ اقبال ٹائون دے قبرستان وچ اے۔ سرہانے کتبہ لگا اے۔٭
