افضال احمد دی موت تے ساڈا سماجی رویہ

ایہدے وچ کوئی شک نہیں کہ زندگی تے موت سب توں وڈی متضاد کیفیت دا ناں اے۔ ایہدے توں انحراف تے روگردانی خالق کائنات نال ضد دا ناں اے۔ جدوں اوہنے کہہ دتا کہ ”ہر ذی روح نے موت دا ذائقہ چکھنا اے” تے فیر ایس سب توں وڈی حقیقت نوں جھٹلانا صاحب قرآن لئی تے کسے طرح وی ممکن نہیں۔ اک ریاست دے بادشاہ نے ایہ اعلان کروا دتا کہ کل سویرے جدوں میرے محل دا مرکزی بوہا کھولیا جاوے گا اودوں جس بندے نے وی محل وچ جس چیز نوں ہتھ لا دتا اوہ اوہدی ہو جاوے گی۔ ایس اعلان نوں سن کے سارے لوک آپس وچ گل بات کرن لگے کہ میں تے سب توں قیمتی چیز نوں ہتھ لاواں گا۔ کجھ لوک کہن لگے میں تے سونے نوں ہتھ لاواں گا’ کجھ لوک چاندی نوں تے کجھ لوک قیمتی زیورات نوں’ کجھ لوک گھوڑیاں نوں تے کجھ لو ک ہاتھی’ کجھ لوک ددھ دین والی گاں نوں ہتھ لان دی گل کر رہے سن۔
جدوں سویرے محل دا مرکزی بوہا کھلیا تے سارے لوک اپنی اپنی من پسند چیزاں لئی نسے۔ ساریاں نوں ایس گل دی جلدی سی کہ پہلے میں اپنی من پسند چیزاں نوں ہتھ لا دیواں تا ں جے اوہ چیز ہمیشہ لئی میری ہو جاوے۔ بادشاہ اپنی تھاں تے بیٹھا ساریاں نوں ویکھ رہیا سی تے اپنے آل دوالے ہو رہی بھج نس نوں ویکھ کے مسکرا رہیا سی۔ اوسے ویلے اوس بھیڑ وچوں اک بندہ بادشاہ ول ودھن لگا تے ہولی ہولی چلدا ہویا بادشاہ دے کول اپڑ کے اوہنے بادشاہ نوں چھو لیا۔ بادشاہ نوں ہتھ لاندے ای بادشاہ اوہدا ہو گیا تے بادشاہ دی ہر چیز وی اوہدی ہو گئی۔ جس طرح بادشاہ نے اوہناں لوکاں نوں موقع دتا تے اوہناں لوکاں نے غلطیاں کیتیاں۔ ٹھیک اوسے طرح ساری دنیا دا مالک وی سانوں ساریاں نوں روز موقع دیندا اے پر افسوس اسیں لوک وی ہر روز غلطیاں کرنے آں۔ اسیں اللہ رب العزت نوں حاصل کرن دی تھاں اللہ رب العزت دی بنائی ہوئی دنیا دیاں چیزاں دی خواہش کرنے آں پر کدی وی اسیں لوک ایس گل تے غور نہیں کردے کہ کیوں نہ دنیا دے بنان والے مالک نوں پا لیا جاوے جے مالک ساڈا ہو گیا تے اوہدی بنائی ہوئی ہر چیز وی ساڈی ہو جاوے گی۔
فلم انڈسٹری دے مایہ ناز اداکار سید افضال احمد عرف افضال چٹا انتقال کر گئے تے ساڈے سوشل میڈیا نوں اوہناں دی عبرتناک تے بے کسی دی موت تے ڈھنڈورا پٹن دا موقع مل گیا تے خوب مل گیا جد کہ حالات ایس گل توں کجھ وکھرے سن۔ افضال احمد جہڑے تماثیل تھیٹر دے بانی تے بڑے امیر تے کھاندے پیندے بندے سن پچھلے 21 ورھے توں فالج دے مرض وچ مبتلا رہے تے مرتے دم تک اوہ شاہانہ زندگی ای گزاردے رہے۔ فالج دے باوجود اوہناں نوں سانبھن والے اوہناں دی تگ و دو کرن تے اوہناں نوں دوائیاں دین لئی اوہناں دے اپنے تے گھریلو ملازمین موجود سن۔ اوہناں دے ملازم اوہناں نوں صاف ستھرا کرکے وہیل چیئر تے باقاعدہ روزانہ ٹہلاندے تے سیر کرواندے سن۔ گھر وچ اوہناں دی بھین باقاعدگی نال اوہناں دی دیکھ بھال کردی سی۔ مین رائے ونڈ روڈ دے بالکل عقب سوسائٹی دے سامنے دس باراں کنال دا اوہناں دا فارم ہائوس اے جو ایس ویلے ارباں روپیے دی جائیداد اے۔ بالکل اوہدے برابر وچ تن چار کنال زمین اوہناں نے اک نرسری والے نوں کرائے تے دے رکھی اے جہدا ماہانہ کرایہ لکھاں وچ اے۔ ایس توں علاوہ تماثیل تھیٹر اجے تک اوہناں دی ملکیت اے تے اوہدی دیکھ بھال تے حساب کتاب دا گوشوارہ اوہناں دے منیجر کول اے۔ ایہ ساری انکم افضال احمد دی اپنی ذاتی جیب وچ جاندی سی۔
اوہناں نوں تن دیہاڑ پہلاں برین ہیمرج ہویا یعنی دماغ نوں فالج ہویا۔ ایس ویلے برین ہیمرج لئی سب توں بہترین تے جدید علاج جنرل ہسپتال لہور ای اے۔ اوہناں نوں فوراً اوتھے لے جایا گیا تاں جے ویلے سر طبی امداد دتی جا سکے۔ ایس ہسپتال وچ سب توں زیادہ رش ہوندا اے لواحقین تے اک پاسے مریض نوں وی ڈھیر ہجوم دی وجہ نال دو دو نوں اک ای بیڈ تے لٹانا پیندا اے بس اجہی کوئی رات سی جہڑی کسے نے اوہناں دی کسمپرسی دی حالت والی اوہ فوٹو اپنے موبائل توں لاہ لئی تے سوشل میڈیا تے ترس کھان تے عبرت دوان لئی پا دتی جہنوں ساڈے نام نہاد دانشوراں نے بناں تحقیق پھیلا دتا تے اسیں لوک اوہناں تے ترس کھان لگے لوکاں نے اوہناں دے گناہگار ہون تے عبرتناک و بھیانک انجام ہون تے کیسیاں کیسیاں مہراں لائیاں۔ ایہ لائن پڑھ کے عقل دنگ رہ گئی کیوں جے اوہ اک اداکار سن ایس لئی لازمی اے کہ اوہ گناہگار وی نیں پر اسیں ناظرین جو ایہ اداکاریاں ویکھدے تے صداکاریاں سن دے آں سانوں کوئی گناہ نہیں ہوندا۔ اسیں سارے اوہناں دے فن ویکھ کے وی جنتی ای رہنے آں۔ ایہ وی سچ اے جھوٹ دے پیر نہیں ہوندے۔ ایہ ساریاں تفصیلاں سانوں رات گئے اوہناں دی گوانڈھن نے دتیاں جو ایس ساری صورتحال توں بڑیاں دکھی سن کہ خدارا جو حقیقت اے اوہنوں لکھ کے لوکاں نوں دسو۔
فالج دی وجہ نال افضال احمد اپنے اعضاء نوں حرکت دین توں قاصر سن پر اوہناں دا دماغ مکمل حواس وچ سی ساڈی دوست دی فیملی نال اکثر گپ شپ لاندے سن اشاریاں نال اپنی گل سمجھا لیندے سن خوش وی ہوندے سن ہسدے وی سن۔ فالج دے نال پوری سوسائٹی وچ گھمدے پھردے سن تے چنگے جی رہے سن ایہ دوویں فوٹواں ساڈی دوست دے لان دیاں نیں جو اوہناں نے چائے پیندے ہوئے اپنے موبائل توں بنائیاں نیں فالج دے باوجود ویکھ لوو کنے صاف ستھرے نظر آ رہے نیں سگوں آثار دس رہے نیں کہ وال وی ڈائی کیتے جاندے نیں۔ ساڈی دوست نے اک واری تجسس وچ اوہناں دے نوکر نال گل بات دوران کافی جانکاری حاصل کیتی کہ اوہناں دے گھر والے روٹین وچ وزٹ کردے نیں اوہناں دیاں تن دھیاں نیں جو بیرون ملک وچ نیں باقاعدہ اوہناں نوں فون کردیاں نیں۔ملازماں نوں ہدایتاں دیندیاں نیں اوہناں دی بھین نیں جو اپنے بھرا دا بہت زیادہ خیال رکھدیاں نیں شریک حیات دے بارے کوئی اطلاع نہیں کہ داغ مفارقت دے گئی اے یاں داغ جدائی بہرحال ہن اوہناں دی زندگی وچ نہیں سن ۔ دنیا وی عجیب تھاں اے تے سوشل میڈیا عجیب تر۔ ایس لئی ضروری اے کہ زندگی وچ مثبت کردار نوں فروغ دینا چاہیدا اے تے دنیا بنان والے مالک نوں اپنا مالک بنا لیا جاوے۔ انج کرن نال زندگی دا سارا بھیانک پن’ ساریاں ہولناکیاں’ سفاکیاں تے چالاکیاں جنم نہ لے سکن۔٭