ادھا سچ تے بے فیض نوحا!

نہ کوئی گولی چلی نہ بمب’ نہ کوئی لاش گری تے نہ کوئی ٹینکاں دے تھلے لیٹیا تے انقلاب آ گیا تسیں سنیا؟ جی ہاں آزادی سیاست دا سورج طلوع ہو چکیا اے جمہوری انقلاب آ چکیا اے’ پاکستان دی تریخ دا اوہ مبارک چن چڑھ چکیا اے جہدا مطالبہ میاں نوازشریف نے کر رکھیا سی۔ ایہ میاں نوازشریف ای سن جہناں نے آواز اٹھائی کہ سیاست وچ فوج دی مداخلت دا سلسلہ بند کیتا جاوے۔ الحمدللہ پاک فوج نے سیاست وچ مداخلت نوں اعلانیہ تن طلاقاں دے دتیاں نیں پر اک اناپرست حلالے دے چکر وچ اے۔ سلیمانی ٹوپی لاہ دتی گئی اے تے مملکت خدادا د نوں جمہوریت دی را ہ تے پا دتا گیا اے۔ پاکستان وچ خون خرابہ برپا کروان دے خواہش مند اندرونی تے بیرونی دشمن منہ وچ انگلیاں دتی بیٹھے نیں کہ ایہ کیہ ہو گیا؟ کیویں اک طاقتور ترین بندے نے اعتراضات دی روشنی وچ وڈا حوصلہ کیتا تے کھلے عام اوہ اعترافات وی کر دتے جہدی مثال نہیں ملدی۔
میاں نوازشریف نوں قصہ پارینہ قرار دین والیاں نوں جھنجھوڑ جھنجھوڑ کے دس دتا جاوے کہ اج ووٹ نوں عزت دیو دا بیانیہ سر چڑھ کے بول رہیا اے۔ اک اک کر کے نواز شریف دے عوامی مطالبے پورے ہو رہے نیں۔ اسیں ایس ملک دے وسنیک آں جتھے ریٹائرمنٹ دے بعد تسبیح پھڑ کے پہلی صف وچ سجدے کرکے اللہ تعالیٰ معافی منگن دا رواج اے جد کہ جہناں نوں تکلیف’ دکھ تے نقصان اپڑیا ہوندا اے اوہناں توں معافی نہیں منگی جاندی۔ اوہناں دے نقصان دا ازالہ نہیں کیتا جاندا۔ فرمان اے کہ حقوق العباد اوس ویلے تک معاف نہیں ہون گے جدوں تک کہ آپ متاثرہ بندہ معاف نہ کر دیوے۔ موجودہ صورتحال وچ طاقتور ترین لوکاں ولوں غلطیاں دا اعتراف معمولی گل بالکل وی نہیں۔ اوہناں دا کہنا اے کہ اوہ غلطی تے سن پر گناہ کبیرہ تے غداری نہیں کیتی۔ اوہناںنے گناہ کبیرہ کیتا اے یاں نہیں ایہدا فیصلہ اللہ تعالیٰ کرے گا۔ ہن طاقتور ترین ادارے دے سابق سربراہ نے آئین دی پاسداری دا وعدہ کیتا اے اللہ کرے ایہ سراب نہ ہووے۔ سابق سربراہ دا اعتراف عام گل نہیں سگوں بڑا ای خاص عمل اے جہدے لئی بہادر ہونا بڑا ضروری اے ایس جری عمل نے دوجے فریقین نوں وی سوچن دی نویں راہ سجھا دتی اے کہ اوہ وی اپنی غلطیاں دا اعتراف کرکے نہ صرف ایہ کہ سدھر جان سگوں ملک دی ترقی تے عوامی فلاح وچ وی اپنا حصہ پان۔ لوکاں دا تے ایہ وی مطالبہ اے کہ ہن اوہناں قیدیاں نوں وی چھڈ دتا جاوے جو کسے دی خفگی دا نشانہ بنے۔
لوک ایہ وی مطالبہ کر رہے نیں کہ جہڑے سرکاری اداریاں وچ حاضر سروس یاں ریٹائرڈ فوجی افسراں دے بناں گزارا ہو سکدا اے اوتھوں وی اوہناں نوں ہٹایا جاوے۔ سارے عہدیاں تے ریٹائرڈ فوجی تے غیرفوجی افسراں دی تعیناتی تے پابندی لا دتی جاوے۔ فوج مکمل طور تے بیرکاں وچ چلی جاوے۔ کاروبار تے امور سیاست لوکاں تے چھڈ دتے جان ایہو اوہ واحد طریقہ اے جہدے نال گھٹو گھٹ طعنے دین والے بنگلہ دیشیاں دا وی منہ ہمیشہ لئی بند ہو جاوے گا۔ ایس سارے عمل وچ شکریہ کہدا ادا کرنا اے تے شاباش کنہوں دینی اے ایہدا فیصلہ وی تریخ کر دیوے گی۔ شکر اے کہ ادھا ای سہی’ سچ بولیا تے گیا۔ اگلی واری اوہدی اے کہ اوہ وی منے کہ ہاں میں ساڑھے تن سال وچ وفاق تے نو ورھیاں وچ کے پی وچ وڈیاں غلطیاں کیتیاں’ ملکی معیشت تباہ کیتی’ رواداری نوں کمیاب کر دتا۔ اخلاقیات نوں تباہ و برباد کیتا۔ اختلافات نوں نفرت وچ بدلیا تے نفرت نوں دشمنی بنا دتا۔ اک پاسے فیل سیاسی پراجیکٹ تے آلودہ سائٹ دی پیشہ ورانہ صفائی دا عمل زورو شور نال جاری اے تے دوجے پاسے رونا دھونا’ پٹ سیاپا’ نوحے’ ماتم تے مرثیے نیں۔ قدرت دا انتقام ویکھو کہ ہور کوئی چوائس ای نہیں دا دعویٰ کرن والا اجیہا بے فیض ہویا کہ اوہدے پیروکار پہلے رینگ مارچ وچ خوار ہوندے رہے تے فیر فیض آباد دی مٹی پھکدے رہے جد کہ طاقتور بالا ایس پپٹ توں اپنا کم کڈھوا کے نکل گئے۔ رانا ثناء اللہ خان دے وعدے دے مطابق انتشار پسند اسلام آباد وچ داخل نہ ہو سکے تے اپنی سیاسی قبر تے آپ ای نوحا خوانی کرکے تتر بتر ہو گئے۔٭