شگفتہ گِمی لودھی دی کتاب پنجاب اور پنجابی دا مکھ وکھالی اکٹھ

لندن وچ مقیم شگفتہ گمی لودھی اردو’ پنجابی تے انگریزی دی محققہ’ مترجم’ شاعرہ تے سوشل میڈیا ایکٹیوسٹ نیں۔ حال ای وچ اوہناں دی کتاب ”کینسر تے اوہدیاں قسماں” شائع ہو کے قارئین کولوں خراج تحسین حاصل کر چکی اے۔ چیتا رہوے کہ ایہناں والد سلیم خان گمی وی پنجابی’ اردو دے منے پرمنے ناول نگار’ افسانہ نگار’ مترجم تے ریڈیو براڈ کاسٹر سن۔
شگفتہ گمی دا پنجابی میڈیا گروپ نال خصوصی تے دلی لگائو اے۔ اوہ پاکستان وچ ہون تے ایہہ ممکن ای نہیں کہ پنجابی میڈیا گروپ یا پنجابی زبان و ادب دے فروغ لئی ہر ویلے سرگرم مدثر اقبال بٹ اوہناں دی آمد توں بے خبر ہون۔ بیرون ملک ہون تے اوہدوں وی پنجابی میڈیا ہائوس وچ ایہناں دی سرگرمیاں نوں خاص طور تے نمایاں تھاں دتی جاندی ا ے جہدی وجہ ایہہ وی اے کہ اوہ وی ایسے کاز لئی سرگرم نیں جہدے لئی پنجابی میڈیا ہائوس دا ہر رکن اپنی کوشش کر رہیا اے۔
گمی ٹی وی یوکے وی شگفتہ گمی دے ذہن دی اختراع ای اے جہدے پربندھ ہیٹھ کجھ عرصہ پہلاں ای منے پرمنے براڈ کاسٹر’ پنجابی شاعر تے ادیب سلیم خان گمی دی دو کتاباں چن عربوں چڑھیا تے تین مشن (بچوں کا ادب) دی تقریب رونمائی دا پربندھ کیتا گیا سی۔ شگفتہ گمی لودھی نے کینیڈا وچ مقیم اپنے بھرا توصیف سلیم خان دی لہور آمد تے ایس تقریب دا خاص طور تے پربندھ کیتا سی۔ توصیف سلیم خان پیشے دے اعتبار نال مکینیکل انجینئر نیں۔ اوہ لہور دی یونیورسٹی آف انجینئرنگ اینڈ ٹیکنالوجی توں فارغ التحصیل نیں تے پچھلی تن دہائیاں توں ٹورنٹو وچ رہ رہے نیں۔ توصیف صاحب دی شریک حیات تے سلیم خان گمی صاحب دی چھوٹی بہو فاطمہ توصیف نے وی تقریب وچ رلت کیتی سی۔ پچھلے پرنسپل گورنمنٹ سائنس کالج تے نفسیات دان سلیم خان گمی دے وڈے پتر تے شگفتہ گمی لودھی دے بھرا پروفیسر توقیر سلیم خان نے وی ایس تقریب وچ رلت کیتی۔ اوہ اجکل لہور دی مختلف جامعات وچ بطور پروفیسر علم دی خشبو کھلار رہے نیں۔ اوہناں دی شریک حیات نازیہ توقیر (پچھلی پرنسپل گورنمنٹ گرلز کالج ٹھوکر نیاز بیگ) اردو دی پروفیسر دے طور تے فرائض سرانجام دے رہیاں نیں۔
سلیم خان گمی دے وَڈے پتر پروفیسر توقیر خان گمی نے اپنے والد دی یاداں نوں تازہ کردیاں ہوئیاں کہیا: ساڈے والد صاحب دی زندگی دا اک ای مشن سی جیویں کہ اوہ پنجابی ثقافت’ روایتاں تے زبان دا فروغ چاہندے سن۔ اوہناں نے پنجابی ادب دی مختلف اصناف اتے کم کیتا جہناں وچ نمایاں ترین سیرت اتے اوہناں دی کتاب چن عربوں چڑھیا اے۔
اوہناں دا ہور کہنا سی کہ جدوں اسیں پروفیشنل لائف وچ آئے تے والد صاحب دے دِتے گئے سبق ہمیشہ یاد رہے۔ اوہناں دا کہنا سی کہ میرے لئی ایس توں ودھ کے خوش قسمتی ہور کوئی نہیں کہ مینوں آخری ویلے تک اپنے والد صاحب دی خدمت کرن دا موقع ملیا۔سلیم خان گمی دے چھوٹے پتر توصیف سلیم خان نے کہیا: اباجی دے نال لنگھیا اک اک لمحہ ساڈے لئی بڑا قیمتی اے۔ شگفتہ گمی سارے بھین بھراواں اتے بازی لے گئیاں نیں تے اباجی دے ادبی اثاثے نوں اکٹھا کر کے دوبارہ پرنٹ وی کروا رہیاں نیں تے خود وی اوہناں دے نقش قدم اتے چلدے ہوئے پنجابی زبان و ادب دے فروغ لئی کم کر رہیاں نیں۔
شگفتہ گمی دی پنجابی زبان وادب لئی خدمات کسے کولوں لکیاں نہیں۔ اوہ لندن وچ رہندے ہوئے وی پنجابی زبان و ادب دے فروغ لئی نہ صرف متحرک نیں بلکہ اوہناں نے ایس باب وچ مربوط کوششاں کر کے ایہہ ثابت کیتا اے کہ پنجابی زبان نال اوہناں دا لگائو کسے کولوں لکیا نہیں جہدی اک مثال اوہناں دی حال وچ شائع ہون والی پنجاب تے پنجابی اے جہڑی سردار جی ایس سدھو دی کتاب دا اردو ترجمہ اے جہدی تقریب رونمائی اگلے دن لندن دے اک مقامی ہال وچ منعقد ہوئی جہدے وچ پنجابیاں دی وڈی گنتی نے رلت کیتی۔ ایس تقریب دی انفرادیت ایہہ سی کہ ایہدے وچ سلیم خان گمی دی تیجی نسل توں حمزہ شہزاد لودھی نے کلونت ڈھلوں دے نال سارے پروہنیاں نوں جی آیاں نوں کہیا۔ حمزہ شہزاد لودھی شگفتہ لودھی دے صاحبزادے نیں تے پنجابی زبان نال اوہناں دا لگائو فطری اے۔ تقریب دے اچیچے پروہنے رکن پارلیمان وریندر شرما سن جد کہ صدارتی پینل وچ ڈاکٹر نور ظہیر’ مہندر کور مدھو (میئر) شگفتہ گمی لودھی تے رنجیت دھیر شامل سن جد کہ مہندر پال سنگھ دھیلوال’ ڈاکٹر امر جیوتی’ درشن ڈھلوں’ آرزو آصف’ یش سٹھی’ کامریڈ عامر’ کلونت ڈھلوں’ شہزادہ لودھی’ روپ داوندرکور’ حمزہ لودھی’ امرپال سنگھ سدھو’شیودیپ کور’ نوازکھرل تے دوجی شخصیات شامل سن جد کہ اُچیچے پروہنیاں وچ پرم جیت سنگھ داوالیہ’ گرمل کور سنگھا’ بھنڈر جلال آبادی’ مندیپ کور سدھو، سروان ظفر، بھجن کور دھالیوال شامل سن جد کہ تقریب دی میزبانی دے فرائض عظیم شیکھر نے ادا کیتے تے پروہنیاں دی آمد تے زبردست لفظاں وچ شکریہ ادا کیتا۔ امید اے کہ شگفتہ گمی لودھی آن والے دناں وچ وی ایسے طرحاں لندن وچ پنجاب تے پنجابیاں دی سفیر دا کردار ادا کردی رہن گئیاں جہڑا یقینا اوہناں دا ایس دھرتی اتے اک وڈا احسان اے۔