گم گشتہ پچھان

Amar jaleel

امر جلیل

تسیں’ میں’ اسیں سارے اک مسلسل کہانی دا حصہ آں۔ ایس کہانی وچ اسیں برصغیر’ افریقہ’ امریکہ’ یورپ’ آسٹریلیا’ کینیڈا دے لوک اپنی اپنی تہذیب’ تمدن’ ثقافت’ زباناں’ بولیاں تے روایتاں دے نال شامل آں۔ ایس مسلسل کہانی وچ ہر اوہ بندہ شامل اے جنہے کرہ ارض تے قدم رکھیا۔ چرند’ پرند’ پہاڑ’ ریگستان’ سمندر’ دریا’ ندی نالے’ نباتات’ حیوانات ایس مسلسل کہانی دا حصہ نیں۔ زمین تے اجہی کوئی چیز نہیں’ جو ایس مسلسل کہانی وچ شامل نہ ہووے۔ ایہ مسلسل کہانی ازل توں چل رہی اے تے ابد تک چلدی رہوے گی۔ ایس کہانی دے لکھن والے دے بارے صدیاں توں قیاس ارائیاں ہوندیاں رہیاں نیں پر کوئی نہیں جان دا کہ مسلسل کہانی لکھن والا کون اے۔ ایہ جاننا انسان دے وَس دی گل نہیں۔ کہانی وچ اپنا کردار پورا کرن دے بعد اسیں سمجھنے آں کہ ازل توں مسلسل کہانی وچ ساڈا رول ختم ہویا تے اسیں اپنے حتمی اختتام نوں اپڑے پر انج نہیں مسلسل کہانی وچ کجھ وی ختم نہیں ہوندا۔ صرف کہانی دے عناصر دی ہیئت بدلدی رہندی اے۔
تہاڈے وانگوں تے میرے وانگوں یوسف وی مسلسل کہانی دا حصہ اے۔ اوہ تہاڈے وانگوں تے میرے وانگوں ہر اوہ کم کردا اے جو کم تسیں تے میں کرنے آں۔ انتخابات دوران اوہ بیلٹ بکس وچ ووٹ پان جاندا اے کدی سر تے ڈنڈے کھا کے پرتدا اے تے کدی دھکم پیل وچ زخمی ہو جاندا اے۔ دفتر جاندا اے’ تنخواہ لیندا اے’ بساط توں باہر چیزاں خرید کے جدوں گھر پرتدا اے اودوں اوہدی جیب خالی ہوندی اے۔ اوہ کسے اگے شکوے شکایتاںنہیں کردا۔ اضافی آمدنی لئی رات گئے کوئی نہ کوئی کم کردا اے۔ اوہ تہاڈے وانگوں تے میرے وانگوں عام بندہ اے۔ فلاحی ادارے کوڑے کرکٹ توں ملن والے بچیاں نوں پالدے نیں’ پوسدے نیں۔ اوہناں نوں پڑھاندے لکھاندے نیں۔ تعلیم دے زیور نال آراستہ کردے نیں تے فیر اوہ تہاڈے وانگوں تے میرے وانگوں عالیشان معاشرے دا حصہ بن جاندے نیں تے ڈر ڈر کے زندگی گزاردے نیں۔ بیلٹ بکساں وچ ووٹ پاندے نیں۔ اودوں فلاحی ادارے خوش ہوندے نیں کہ اک لاوارث بچے نوں اوہناں نے کامیابی نال معاشرے دا کارآمد فرد بنا دتا اودوں اوہ جائز طور تے سوچدے نیں کہ اوہناں نے اپنا کم خیروخوبی نال پایہ تکمیل تک پہنچایا۔ ادارے دا تے یوسف ورگے بچیاں دا مسلسل کہانی وچ کردار اختتام پذیر ہویا پر انج نہیں ہوندا۔ ازل توں لکھی جان والی کہانی وچ کجھ اختتام پذیر نہیں ہوندا۔
ازل توں لکھی جان والی مسلسل کہانی وچ یوسف دا کردار اوس ویلے اختتام نوں نہیں اپڑیا جدوں فلاحی ادارے نے یوسف نوں پال پوس کے وڈا کیتا۔ اعلیٰ تعلیم دوائی’ مقابلے دے امتحاناں وچ اگے نکل جان دے بعد یوسف نوں اک اعلیٰ عہدے تے تعینات کیتا گیا۔ مسلسل کہانی وچ کرداراں دا عمل ختم نہیں ہوندا۔ کردار دی کارکردگی دی ہیئت بدل جاندی اے۔ یوسف اوس گھڑی مکمل طور تے بدل گیا جدوں اوہنوں احساس ہویا کہ فلاحی ادارے نے اوہنوں فرضی باپ جعفر دا ناں دے دتا سی۔ یوسف دے کردار وچ ہور ابھر کے سامنے آن والی ہیئت دا پتہ اودوں لگا جدوں اوہنے اک دن فلاحی ادارے دے کرتا دھرتا توں اپنی والدہ دا ناں پچھیا۔ فلاحی ادارے دے ارکان نے چپ وٹ لئی۔ اودوں یوسف نے کہیا سی میں جاننا واں’ تسیں مینوں کچرے دے ڈھیر توں چک کے لیائے سی۔ تسیں مینوں فرضی باپ دا ناں دتا۔ تسیں مینوں فرضی ماں دا ناں کیوں نہیں دتا؟۔
کسے کول ایس سوال دا جواب نہیں سی۔ ازل توں لکھی جان والی مسلسل کہانی وچ یوسف نے نواں جنم لے لیا۔ اپنی گم گشتہ پچھان دی تلاش نے یوسف نوں سوچ دی نویں دھارا وچ سٹ دتا۔ اعلیٰ تعلیم’ اثرورسوخ’ تعلقات’ کجھ وی اوہدے کم نہیں آیا اوہ صرف ایناں جان سکیا کہ فلاحی ادارے دے کارکناں نے اوہنوں برنس روڈ توں گزرن والے گندے نالے دے نیڑے پئے ہوئے کچرے دے ڈھیر توں چکیا سی۔ اودوں اوہ مشکل نال اک دن دا سی۔ یوسف نے اگربتیاں دا اک پیکٹ خریدیا اگربتیاں لا کے اوہنے کچرے دے ڈھیر تے لا دتیاں تے فیر بہت دیر تک اوہ کچرے دے ڈھیر دے نیڑے کھڑا رہیا تے رات تک گاہے گاہے اگربتیاں لا کے کچرے دے ڈھیر کول کئی گھنٹے کھڑا رہندا اے۔ نویں یوسف دے وجود وچ تلاطم سی اوہدی سوچ ایس توں اگے نکل گئی۔ اپنی ماں تے اپنے باپ دے بارے اوہنے سوچنا چھڈ دتا۔ اوہنے سوچیا میں جے واسوانی آشرم والیاں نوں کچرے دے ڈھیر تے پیا ہویا ملدا تے اج میں ہندو ہوندا۔ میں جے کرائسٹ آرفینج والیاں نوں کچرے دے ڈھیر تے پیا ہویا ملدا تے اج عیسائی ہوندا۔ بے ضبط تے بے قابو سوچ اوہنوں سمندراں تک بہا کے لے گئی۔
اک دن یوسف نادرا دے دفتر اپڑیا اپنا شناختی کارڈ افسر نوں وکھاندے ہوئے یوسف نوں کہیا شناختی کارڈ وچ اک اندراج غلط اے۔ افسر نے چونک کے تعجب نال یوسف ول ویکھیا۔ یوسف نے کیہا میں کسے جعفر دا بیٹا نہیں افسر ہکابکا رہ گیا۔ یوسف نے کہیا فلاحی ادارے نوں میں کچرے دے ڈھیر تے پیا ہویا ملیا سی کوئی نہیں جان دا کہ میری ماں کون سی’ کوئی نہیں جان دا کہ میرا باپ کون سی۔ کجھ کہن دی تھاں افسر تعجب نال یوسف ول ویکھدا رہیا۔ یوسف نے کیہا میرے شناختی کارڈ وچ تسیں ترمیم کرو۔ فرضی باپ جعفر دی تھاں تسیں مینوں لکھ کے دیو والد’ نامعلوم۔ مسلسل کہانی وچ یوسف دا کردار اختتام پذیر نہیں ہوندا سگوں مسلسل کہانی وچ کسے کردار دا انت نہیں ہوندا۔٭

اپنا تبصرہ گھلو