ہن عوامی خواہشات دی واری

مطلوب وڑائچ

آرمی چیف دا تقرر اک معمول دی کاروائی ہوندی اے پر ساڈے ملک وچ ایس تعیناتی نوں غیرمعمولی بنا دتا گیا اے۔ ایہدی وجہ ایہو سمجھ وچ آندی اے کہ پاکستان وچ آرمی چیف دی حیثیت اک طاقتور سٹیک ہولڈر دے طور تے منی جاندی اے۔ جنرل (ر) باجوہ نے یوم شہداء دی تقریب نا ل خطاب کردے ہوئے آکھیا سی کہ پاک فوج ہن سیاست توں وکھ ہو گئی اے تے ایہ جمہوریت نوں مضبوط کرنا چاہندی اے۔ جدوں وی فوج دی گل ہوندی اے تے اوہدی اعلیٰ قیادت دیاں نظراں اٹھدیاں نیں ایہنے وڈے وڈے فیصلے کرنے ہوندے نیں۔ پاکستان دیاں فوجاں نوں دنیا دی بہترین پیشہ ور فوجاں وچ شمار کیتا جاندا اے۔ ایہدی قیادت کرنا کسے وی جنرل لئی اعزاز اے۔ پاک افواج نظم و ضبط وچ اپنی مثال آپ نیں۔ پاک فوج دے وڈے وڈے بہت وڈے فیصلے کردے نیں۔ آرمی چیف نوں طاقت دا سرچشمہ سمجھیا جاندا اے ایہدے اک اشارے تے ہر جوان کٹ مرن تے ہر ویلے تیار ہوندا اے۔ سپہ سالار جدھر ویکھدا اے پوری فوج ای نہیں قوم وی اودھر ویکھدی اے پر آرمی چیف دی تقرری وچ آئین تے قنون دے مطابق طاقتور آرمی چیف دا وی کوئی رول نہیں ہوندا۔ ایہ فیصلہ حکومت نے کرنا ہوندا اے۔ ساڈے ایتھے جدوں وی اجیہا موقع آندا اے اک ہیجانی کیفیت ہوندی اے۔ ایس واری تے کجھ زیادہ ای سی۔ ایہدے وچ اسیں انج الجھے کہ سارے معاملات پس پشت چلے گئے۔
جنرل (ر) باجوہ نے اپنے خطاب وچ آکھیا سی کہ مشرقی پاکستان دے المیہ دی ذمہ دار پاک فوج نہیں ایہ سیاسی شکست سی۔ ایہ اک تریخی حقیقت اے کہ انڈین انٹیلی جنس ایجنسی ”را” تے اوہدی پروردہ تنظیم ”مکتی باہنی” نے مشرقی پاکستان وچ سرعام مداخلت کیتی۔ پاکستان توڑن دی سازش وچ مصروف ہو گئے تے کیہ اوس ویلے محب وطن پاکستانی تے ملک دی سلامتی دی ذمہ دار پاک فوج کیہ ہتھ تے ہتھ رکھ کے بہہ جاندی۔ اک پاسے ملک دی سلامتی نو خطرے ای نہیں سگوں جان لیوا بیماری لگ چکی سی تے دوجے پاسے عالمی سامراج دنیا دے سب توں وڈے اسلامی ملک پاکستان نوںاللہ نہ کرے ٹوٹے ٹوٹے ویکھنا چاہندا سی۔ ایہو وجہ اے کہ مشرقی پاکستان دی علیحدگی دوران ان گنت فکشن تے ناول گھڑے گئے جہناں دے زہرآلود پراپیگنڈا نے مشرقی پاکستانیاں نوں مغربی پاکستان توں متنفر کر دتا گیا۔ میں زندگی دا لماں عرصہ مغربی ملکاں وچ گزاریا اے جتھے وی فوجی سربراہواں دی تقرری ہوندی اے پر کسے نوں کنوں کن خبر نہیں ہوندی۔ ساڈے ایتھے اک تماشا لگا ہوندا اے۔ اک نان ایشو نوں ایشو تے سیاسی مسئلہ بنا دتا جاندا اے۔ آرمی چیف تے جوائی چننا ساڈے ملک وچ بڑا اوکھا کم اے۔ ساڈے ملک دی حکومت نے جی ایچ کیو توں سمری آن دے بعد میرٹ تے سنیارٹی دی بنیاد تے فیصلہ کیتا۔ جنرل ساحر شمشاد مرزا نوں جوائنٹ سروسز دا جد کہ جنرل عاصم منیر نوں آرمی چیف مقرر کیتا گیا۔ کجھ لوکاں نوں توقع سی کہ صدر عارف علوی ایس تقرری وچ رکاوٹ پا سکدے نیں پر اوہناں ولوں سابق وزیراعظم عمران خان نال مشاورت دے بعد منظوری دے دتی گئی۔ دو جرنیلاں دی شہرت بہترین پیشہ ورانہ افسراں دی اے۔ اوہ ملک نوں لے کے اگے ودھن گے۔ ایہناں دی رہنمائی وچ پاک فوج اپنا کردار ادا کردے ہوئے پاکستان دے اندر دہشت گردی دے خاتمے تے سرحداں دے باہروں آن والے خطریاں دے خلاف اپنا بہترین کردار ادا کرے گی۔ رہنمائی توں میرے سامنے اک اقتباس آ گیا۔ زندگی دیاں اچیاں نیویاں ڈھلواناں تے پرخطر راہواں توں ایہ سبق ملیا اے کہ جے رہنما ایہناں راہواں تے ایہناں دے نشیب و فراز توں چنگی طرح واقف ہووے تے تاریک توں تاریک رات وچ وی خطرناک راہ بڑے اطمینان نال طے ہو جاندا اے بس شرط ایہہ وے کہ انسان اجہے راہواں نوں پار کردے ہوئے اپنی عقل لڑان دی تھاں اپنے آپ نوں رہنما دے حوالے کر دیوے۔ گل تے بڑی سادہ’ سدھی تے صاف اے پر جے ایہو گل مشائخ طریقت کہہ دیوے تے اج کل اوہناں تے انھی تقلید تے شخصیت پرستی دے طعنیاں دی بوچھاڑ کر دتی جاندی اے۔
فوج دے سربراہواں دی تعیناتی خوش اسلوبی نال طے ہون تے پوری قوم مطمئن اے اسیں جنرل ساحر شمشاد مرزا تے جنرل عاصم منیر شاہ نوں مبارکبا دپیش کرنے آں۔ دوستو! الحمدللہ اہم تعیناتیاں ہو چکیاں نیں تے ہن موجودہ حکومت نوں عوامی مزاج دا پتہ ہونا چاہیدا اے۔ ہن اسیں لوکاں نوں ہور بے وقوف نہیں بنا سکدے تے نہ ای ایہ اوہ زمانہ اے کہ جہدے وچ گل دب جاندی سی۔ ایس ویلے ایہ روز روشن وانگوں عیاں اے کہ لوک ہن اک بدلیا ہویا پاکستان تے فوری الیکشن چاہندے نیں ایس لئی عوامی امنگاں دے مطابق عوامی خواہشات دا احترام کیتا جاوے۔٭