شاعرظفر اقبال دے غزل پراگے نقطے وچ جہان دا مکھ وکھالی اکٹھ
پرنسپل پروفیسر محمد خالد بابر دی اُچیچی کاوش نال بزمِ فکر و ادب گورنمنٹ گریجویٹ کالج چونیاں دی چھترچھاویں چونیاں شہر دے خوبصورت پنجابی شاعر ظفر اقبال ہوراں دی پنجابی غزلاں دی دوجی کتاب ”نقطے وچ جہان ”دا بھرواں مکھ وکھالی اکٹھ کالج دی لائیبریری وچ ہویا۔ اس مکھ وکھالی اکٹھ دی نقابت پروفیسر علی بابر صدر شعبہ پنجابی تے پردھانگی پرنسپل پروفیسر محمد خالد بابر ہوراں کیتی۔ تلاوت تے نعت دی سعادت فدا حسین تے محمد ریحان دے حصے آئی۔ پروفیسر عبدالقیوم شاد، پروفیسر افتخار حسین، پروفیسر ارشد فاروق، پروفیسر علی بابر، پروفیسر عبد المتین، پروفیسر محمد خالد بابر تے سینئر پنجابی شاعر یعقوب پرواز نے اپنے اپنے مقالے پڑھے تے ظفر اقبال دی کتاب نوں پنجابی ادب وچ اک خوبصورت اضافہ قرار دتا تے کتاب دی کامیابی واسطے نِگھے جذبیاں دا اظہار کیتا۔
ظفر اقبال، پروفیسر علی بابر تے یعقوب پرواز نے اپنا پنجابی کلام پیش کردے ہوئیاں خوب داد سمیٹی۔ ایس شاندار اکٹھ وچ پڑھنہاراں تے معزز صحافیاں نے وڈی گنتری وچ رلت کیتی۔ آخر وچ پرنسپل پروفیسر محمد خالد بابر نے آون والے سارے پروہنیاں تے طالب علماں دا دلوں بجانو شکریہ ادا کیتا جنہاں نے ایس مکھ وکھالی اکٹھ وچ رلت کرکے ایس نوں کامیاب بنایا۔
