غلطیاں ای غلطیاں

ایہہ حقیقت اے کہ ا نسان غلطی دا پتلا اے مگر اوہدے نال ایہہ وی کہیا جاندا اے کہ غلطی صرف اک واری ہوندی ا ے بار بار نہیں تے عقلمند انسان اپنی غلطیاں توں سکھدا اے۔ نقصان چکن دے باوجود بار بار غلطی کرنا تے فیر جان بوجھ کے انج کرنا تے اک جرم اے جہدی سزا بہرحال ملنی چاہیدی اے۔ اج کل ساڈے ملک وچ غلطیاں دا بڑا چرچا اے تے ایہہ کوئی ہور نہیں پاکستان دے پچھلے وزیراعظم تے تحریک انصاف دے چیئرمین عمران خان کر رہے نیں۔ اپنے چار سالہ دور اقتدار دی ناکامیاں نوں ہن اوہ غلطیاں نال تشبیہہ دے رہے نیں تاں جے اوہناں توں پہلوتہی دا کوئی جواز تلاش کیتا جا سکے۔ پچھلے اٹھ مہینیاں توں اقتدار توں وکھ ہون مگروں اوہ ایس صدمے نوں بھلا نہیں پا رہے تے آئے دن اک نویں بیانیے دی تلاش وچ ہوندے نیں تاں جے عوام دی توجہ اپنی نکامیاں تے کوتاہیاں توں ہٹائی جا سکے۔ اوہناں نوں ہر دن بہت ساری گلاں اتے پس قدمی وی اختیار کرنا پیندی اے جہنوں حرف عام وچ یوٹرن وی کہیا جا سکدا اے مگر اوہنوں وی اوہ اپنی کامیابی گرداندے نیں۔ جدوں تک انسان اپنی غلطیاں دا احساس کردیاں ہوئیاںاصلاح نہ کرے اوہدوں تک بہتری دی کوئی گنجائش نہیں ہوندی۔ اک لیڈر دا کردار تے ویسے وی عوام دے سامنے روزروشن وانگوں واضح ہونا چاہیدا اے تاں جے لوک اوہدی پیروی کردے ہوئیاں کوئی شرمندگی محسوس نہ کرن۔ آئے دن بیان بدلن تے نکامیاں دا جواز تلاش کرن دی کوشش وچ رہن توں کجھ حاصل نہیں ہوندا بلکہ انسان دی شخصیت داغدار ہو جاندی اے۔ اپنے دور اقتدار وچ کجھ اہم تے وڈے فیصلیاں نوں ہن عمران خان اپنی غلطیاں قرار دے رہے نیں مگر انج کرن نال اوہناں دی جان بخشی نہیں ہو سکدی کیوں جے ملک دے اعلیٰ ترین انتظامی عہدے اتے فائز رہن مگروں ہن اوہناں نوں اپنے ہر کیتے دی ذمہ داری قبول کرنی چاہیدی اے ناکہ دوجیاں نوں مورد الزام ٹھہرا کے جان
چھڈان دی کوشش کیتی جاوے۔ ایہہ حقائق تریخ دا حصہ نیں جہناں نوں کوئی جھٹلا نہیں سکدا۔ عمران خان اج کل ہر دن کہہ رہے نیں کہ پچھلے آرمی چیف جنرل باجوہ نوں ایکسٹیشن دینا اوہناں دی اک وڈی غلطی سی جد کہ سارے جاندے نیں کہ ایہہ اچانک نہیں ہویا۔ جنرل باجوہ نوں ایکسٹینشن اوہناں دی مدت ملازمت ختم ہون توں تن مہینے پہلاں اگست 2019وچ دے دتی گئی سی تے فیر اوہدے لئی مگروں باقاعدہ قنون سازی وی کیتی گئی۔ ایہدے مگروں اپریل وچ تحریک عدم اعتماد دے موقعے تے عمران خان نے جنرل باجوہ نوں تاحیات ایکسٹینشن دی وی پیشکش کیتی جد کہ ایس سال اکتوبر وچ اک واری فیر کہیا کہ عام انتخابات تک اوہناں نوں ایکسٹینشن دے دئیے تے نویں حکومت آ کے نواں چیف لاوے۔ ہن اوہنوں فیر وی اک غلطی کہنا حیران کن گل اے تے صرف آرمی چیف دی شخصیت نوں ٹارگٹ کرنا اے۔ ایسے طرحاں موصوف فرماندے نیں کہ جسٹس قاضی فائز عیسیٰ دے خلاف ریفرنس وی اک غلطی سی۔ سارے لوک جاندے نیں
کہ ایس ریفرنس وچ کیویں ودھ چڑھ کے توجیہات پیش کیتیاں گئیاں تے سپریم جوڈیشل کونسل دے روبرو کیویں جسٹس عیسیٰ دی کردار کشی اتے مبنی مواد پیش کیتا گیا جہڑا جھوٹ اتے مبنی سی۔ اک معزز تے انتہائی معتبر جج تے اوہناں دی فیملی نوں جیویں ٹارگٹ کیتا گیا تے اوہناں نوں داغدار کرن دی کوشش کیتی گئی اوہنوں ہن اک غلطی کہنا انتہائی مضحکہ خیز گل اے۔
ایسے طرحاں عمران خان کہندے نیںکہ ایم کیو ایم دا وزیر قنون مقرر کرنا وی غلطی سی کیوں جے اوہ اوہناں دے زیراثر نہیں سی تے کسے دے کہن تے قنونی فیصلے کردا سی۔ ایہہ حقیقت ساریاں نوں پتہ اے کہ جناب فروغ نسیم عمران خان دے انتہائی قریبی وزیراں وچوں سن تے اوہناں نوں عمران خان نے اپنا ذاتی وکیل وی مقرر کیتا سی جہدے لئی اوہناں نوں اک واری وزارت توں استعفیٰ وی دوایا گیا تاں جے اوہ عدالت وچ کیس دی پیروی کر سکن تے مگروں اوہناں نوں اک و اری فیر وزارت دا حلف دوایا گیا۔ ایہہ سب صرف غلطی دی بنا اتے نہیں ہو سکدا’ موصوف تے ہن ریحام خان نال اپنے ویاہ نوں وی غلطی لکھ رہے نیں جد کہ انج کردے ویلے اوہ اپنے آپ نوں خوش قسمت ترین انسان گرداندے سن۔ ایسے طرحاں ہن کہندے نیں کہ یوکرائن اتے روسی حملے ویلے روس دا دورہ کرنا وی اک غلطی سی۔ ہر کسے نوں ایس گل دا چنگی طرحاں پتہ اے کہ عمران خان اج تک اپنے اوس دورے دا نہ صرف دفاع کردے رہے نیں بلکہ اوہنوں اپنی آزادانہ خارجہ پالیسی دا ثبوت قرار دیندے رہے نیں تے ہمیشہ توں خود نوں کریڈٹ دین لئی استعمال کردے رہے نیں تے اچانک اوہنوں وی غلطی قرار دینا یقینا اک حیران کن گل اے جہدے توں خود اوہناں بارے ہور سوالیہ نشان اٹھدے نیں۔ پچھلے وزیراعظم تے اتحادی حکومت بنان نوں وی اپنی غلطی قرار دے رہے نیں۔
جناب عمران خان دے یوٹرنز تے غلطیاں دے اعتراف دی فہرست بڑی لمی اے تے ہر دن ایہدے وچ وادھاہو رہیا اے۔ بہترایہہ اے کہ اوہ اپنی سیاست نوں انتخابات تے عوامی مسئلیاں تک فوکس رکھن اپنی نکامیاں دا کھلم کھلا اعتراف کرن تے آئندہ لئی اک ایسا لائحہ عمل اختیار کرن کہ لوک اوہناں اتے یقین کر سکن۔