قوم دا بلڈپریشر ہن نارمل ہو جانا چاہیدااے

جنرل عاصم منیر دے آرمی چیف بنن نال بھاویں کئی سیاسی لیڈراں دِیاں توقعات نوں دھچکا لگیا اے پر کیتے گئے کارے نوں Undo نہیں کیتا جا سکدا۔ ویلے دا تیر ہمیشا اگے نوں سفر کردا اے تے زندگی دا اک پل وی واپس نہیں آوندا ہوندا۔ ایس تعیناتی توں پہلاں جنی ککڑ کھیہ اڈائی گئی ایدوں پہلاں کسے وی اجہی تعیناتی سمے نہیں سی اڈی۔ کارن ایہ کہ عمران خان ہوراں لوکائی دے جذبات تلوار دی دھار اتے لیاندے ہوئے سن۔ ایہنوں زندگی موت دا مسئلا بنا دتا گیا سی جس پاروں اوہناں دے حمایتی ای نہیں مخالف وی ایس تعیناتی دے حوالے نال بہت اتسکتا دا شکار ہو گئے سن۔
بظاہر تعیناتی دے بعد ساریاں دِھراں نے ایہنوں قبول کر لیا اے ہور کوئی چارا وی نہیں سی۔ صدر عارف علوی ہوراں وی گل نوں لمکان دی بجائے ایہدی سمری اتے دستخط کرن وچ کالھ کیتی کیوں جے اوہناں نوں احساس ہو گیا سی کہ ویلا اوہناں دے ہتھوں نکل چکیا اے تے دیر کرن نالوں دیر نہ کرنا ای بہتر اے جو اوہناں دی عزت وچ وی وادھا کرے گا۔البتا اوہناں نے لاہور آ کے عمران خان نال ملاقات کر کے اوہناں نوں فیس سیونگ دی سہولت ضرورت دے دِتی۔
ایس سچے تے حقیقی ڈرامے دا صرف اک ایکٹ البتا کھیڈن والا رہ گیااے۔ اوہ اے عمران خان ہوراں دا آزادی اکٹھ۔ عمران خان لانگ مارچ توں شروع ہوئے سن زخمی ہون دے باوجود اوہناں نے لانگ مارچ جاری رکھیا پر اوہناں دی پارٹی دے دوجے درجے دے آگوواں وچ اوہ ساہ ست نہیں کہ اوہ تحریک نوں اونے زورنال جاری رکھ سکن جویں عمران خان ہوراں چلائی ہوئی سی۔ایسے پاروں ایہنوں بعد وچ روک کے راولپنڈی اکٹھ تے آزادی مارچ دا ہوکا دتا گیا جہڑا اج ہفتے والے دیہاڑ ہون جا رہیا اے۔
اکٹھ وچ عمران خان ہوری کیہ بولدے نیں تے تھیلے وچوں کیہ بلی کڈھدے نیں ایہدے بارے ایس ویلے کجھ کہناویلیوں پہلاں اے۔ اوہ ساڈھے تن سال تیکر قوم نوں جہڑی آزادی دواندے رہے اوہدے بعد آزادی مارچ دی گل کرنا انجے ای اے جویں ایہ آکھنا کہ اوہناں دے دور وچ آٹا چینی تے دوائی مافیا نے لوکاں نوں بہت سہولتاں دِتیاں۔ویلیوں پہلاں الیکشن دی گل وی دن بدن بے معنی ہوندی جا رہی اے۔ حکومت دی معیاد اگست2023ء تک اے۔ صرف نوں مہینے وچوں اوہ کنا کو پہلاں الیکشن کروانا چاہندے نیں تے اوہدا فایدا کیہ ہووے گا۔ شاید اوہناں نوں پتا لگ گیا اے کہ اوہ دن بدن اپنی مقبولیت گواندے جا رہے نیں۔٭