پنجاب بھر وچ آرٹ اینڈ کلچر دے ودھا لئی وزیراعلیٰ پنجاب چوہدری پرویز الٰہی متحرک

صوبہ پنجاب اپنے آرٹ تے کلچر دے لحاظ نال اک مالا مال صوبہ ا ے جتھے عشق و محبت دی لازوال کہانیاں تے ثقافت تے کلچر دے ہزاراں افسانے پائے جاندے نیں۔ پاکستان دا آبادی دے لحاظ نال سب توں وڈا صوبہ پنجاب جہنوں ”لہندا” پنجاب وی کہیا جاندا اے۔ جتھے راوی دے کنارے پاکستان دا دل شہر لہور وی آباد اے اوہ شہر جہدی گلیاں وچ اج وی تہانوں پنجابی آرٹ کلچر تے ثقافت دی بھرپور جھلک وکھائی دیندی اے۔ یقینی طور تے پنجاب دی ثقافت نوں دنیا دی پرانی ثقافتاں وچ شمار کیتا جاندا اے۔ثقافت اک معاشرے تے قوم دی خصوصیات’ عادتاں’ اطوار’ طرز فکر’ دینی نظریہ’ اہداف تے مقاصد دی بنیاد ہوندیاں نیں۔ ایہو اوہ بنیاد اے جہڑی اک قوم نوں شجاع تے غیور تے خودمختار بناندی اے لیکن ساڈا اج دا نوجوان اپنی میراث اپنی تہذیب و ثقافت نوں اپنان وچ شرم محسوس کردا نظر آندا اے جہدا فیدا ساڈے ہمسایہ ملک بھارت نے بھرواں چکیا تے اج ساڈے بچہ توں لے کے بزرگ تک خود دی تہذیب و ثقافت بھل کے دوجے ملکاں دے کلچر توں بوہتا روشناس نظر آندا اے۔ایہدے وچ قصور ماضی وچ پنجاب اتے حکومت کرن والی پارٹیاں دا وی رہیا اے جہناں دا رجحان ثقافت نوں پروان چڑھان دے بجائے اپنے کاروبار نوں پروان چڑھان وچ بوہتا نظر آندا سی جہدے کارن اج ایس صوبے دی عوام اپنی خود دی تریخ تے ثقافت توں دور کھڑی نظر آندی اے۔ صوبہ پنجاب جہدے کول صدیاں پرانی تہذیباں ست رنگی ثقافتاں’ سوہنی بولیاں تے خداداد صلاحیتاں دے حامل فنکار موجود تے نیں لیکن فیر وی اج اوہدی ثقافت تے کلچر اینی زبوں حالی دا شکار کیوں اے۔ ایسے گل دی اہمیت تے ضرورت نوں مدنظر رکھدے ہوئے موجودہ پنجاب حکومت چودھری پرویزالٰہی دی قیادت وچ آرٹ اینڈ کلچر دے فروغ وچ خاصی متحرک وکھائی دے رہی اے جی ہاں ایہہ اوہو عوام دوست وزیراعلیٰ اے جہناں نوں 2004وچ پنجاب وچ پہلی واری پنجابی زبان تے ثقافت نوں زندہ کرن لئی پنجاب سرکار دی سرپرستی وچ پنجاب انسٹیٹیوٹ آف لینگوئج’ آرٹ اینڈ کلچر جئے اداریاں تے پنجابی دے پہلے ایف ایم 95 ریڈیو سٹیشن جئے اداریاں دی بنیاد رکھی۔ اوہناں اداریاں دا مقصد پنجابی زبان و ادب دا فروغ تے پنجابی ثقافت توں عام لوکاں وچ محبت ‘ بھائی چارے تے امن نوں فروغ دینا سی۔ پرویزالٰہی صاحب دی ایس محنت تے عمل نوں اوس ویلے نہ صرف پورے صوبے بلکہ پورے ملک تے دنیا وچ سراہیا جا چکیا اے مگر اوہناں دی حکومت دے جاندے ای اوہناں دے دور وچ لائے گئے ایسے عظیم الشان منصوبے کدھرے انھیریاں وچ گواچ گئے۔ مگر کہندے نیں نہ کہ جہنوں اللہ رکھے اوہنوں کون چکھے۔ اج دوبارہ اوہو عوام دوست شخص وزیراعلیٰ پنجاب منتخب ہو کے اپنے صحیح مقام اتے آ گیا اے تے جتھے ایس انسان نے زبوں حالی دا شکار باقی محکمیاں نوں دوبارہ توں زندہ کرن دا بیڑہ چکیا اے۔ ایہو اوہ حکومت ہن پنجاب دے فنکار تے اوہدے آرٹ نوں فروغ دین وچ پیش پیش نظر آ رہی اے۔ گل کیتی جاوے جے ایس حکومت دے کلچر دے حوالے نال اقدامات دی تے حکومت نے صوبے بھر وچ اک واری فیر توں ثقافتی تقریباں دا پربندھ شروع کر رکھیا اے جہدے تحت شہراں دے مختلف پارکاں وچ اوہو روایتی میلے ضلعی سطح اتے مشاعریاں دی محفلاں پنجاب انسٹی ٹیوٹ آف لینگوئج’ آرٹ اینڈ کلچر دی تنظیم نو عالم لوہار لوک میلہ دا پربندھ پنجابی زبان دے شاعراں تے ادیباں دی بیٹھک لئی پاک ٹی ہائوس دی طرز تے صوبہ دے دُوجے شہراں وچ ہور کیفیز پنجابی ایف ایم سٹوڈیو نوں جدید ٹیکنالوجی نال ہمکنار کرن تے جنوبی پنجاب دی عوام لئی پنجاب دی ثقافت خصوصاً پنجابی دے سرائیکی لہجے دے فروغ لئی خصوصی پروگرام شروع کر رکھے نیں۔ پنجاب حکومت ولوں جنوبی پنجاب وچ ای بہاولپور آرٹس کونسل تے میوزیم دی تزئین تے آرائش ‘ سر صادق محمود خان میموریل گیلری ہال دی تعمیر نوبہاولپور میوزیم دی فرنٹ بلڈنگ دی مرمت بھکر تے بہاولپور آرٹ کونسلاں لئی آڈیٹوریمز دی ڈیزائننگ ملتان تے راولپنڈی وچ پنجاب رنگ ایف ایم ریڈیو سٹیشن قائم کیتے جا رہے نیں تے ایہدے تحت حکومت ولوں ہر سال صوبہ بھر وچ پنجاب کلچر ڈے وی منایا جاوے گا جہدے وچ ثقافتی میلے’ پنجابی مشاعرے’ فوک میوزیکل نائٹ’ دستکاری دے مقابلے لوک رقص تے دوجی تقریباں منعقد ہون گئیاں۔ ایتھے جے میں گل کراں پنجاب دے فنکاراں دی تے اوہناں دی مالی معاونت وچ وی حکومت پیش پیش نظر آ رہی اے۔ ایس حوالے نال حال ای وچ وفات پان والے منے پرمنے کامیڈین طارق ٹیڈی مرحوم دے صاحبزادے نوں وزیراعلیٰ پنجاب چودھری پرویزالٰہی ولوں 30لکھ دا امدادی چیک تے سی ایم ہائوس وچ نوکری وی فراہم کردتی گئی جو کہ یقینی طور تے کسے وی وزیراعلیٰ دا اک قابل ستائش اقدام اے۔ہور ایس حوالے نال پنجاب وچ پہلی واری پنجاب دے فنکاراں دی مالی معاونت تے فلاح و بہبود لئی اک ٹرسٹ قائم کیتا گیا اے جہدے وچ حکومت ولوں اک ارب روپے دے خصوصی فنڈز مہیا کیتے جاوے گے۔ اوہو گل کیتی جاوے جے فنکاراں دے وظیفے نوں ودھان دا دیرینہ مطالبہ کیتا تے اوہدے اتے وزیراعلیٰ پنجاب چودھری پرویزالٰہی نے فوری طور تے اوہناں دی ماہانہ امداد 5ہزار توں 25 ہزار تک کرن دا وی اعلان کردتا اے تے ایس فنڈز دی تقسیم دا طریقہ کار طے کرن لئی اک بورڈ آف ٹرسٹ بنایا گیا اے جہدے سربراہ وزیراعلیٰ پنجاب خود ہون گے۔ ایس ٹرسٹ وچ سینئر فنکار تے آرٹ کلچر نال تعلق رکھن والے حکومتی نمائندگان دی شمولیت وی رکھی گئی اے تاں جے کس وی فنکار نوں پریشانی تے مشکل دی صورت وچ حکومت چھیتی توں چھیتی اوہدی مدد کر سکے۔
ایس بارے وزیراعلیٰ پنجاب چودھری پرویزالٰہی دا کہنا اے کہ فنکاراں دے اہل خانہ دی دیکھ بھال نوں اوہ اپنا فرض سمجھدے آں۔ فنکاراں دے خاندان دی معاونت کسے اتے احسان نہیں اوہناں دی ذمہ داری اے۔ اوہناں دی حکومت پنجاب دی ثقافت نوں دنیا دے سامنے پیش کرے گی تے اپنے نوجواناں نوں اپنی تہذیب اپنی زبان تے اپنی ثقافت توں ہمکنار کرواوے گی۔ دنیا دی بدلدی رُتاں دے نال قدم نال قدم ملا کے چلنا زندہ قوماں دا شیوہ ہوندا اے۔ سانوں امید اے حکومت دے اوہناں پروگراماں دے پیش نظر عوام نوں اپنی اعلیٰ اقدار’ رسم و رواج توں روشناس ہون دے موقعے حاصل ہون گے تے دنیا نوں پنجابی کلچر نال متعارف وی کروایا جا سکیں گے۔ عوام حکومت دے ایسے پروگراماں دی کامیابی لئی دعاگو اے۔ ایس طرحاں دے حکومتی اقدامات کسی وی معاشرے نوں پرامن بنان وچ تے ثقافتی اداریاں دے کم نوں نکھارن وچ اہم کردار ادا کردے نیں۔ سانوں امید اے کہ حکومت ایسے طرحاں اپنے فنکاراں اپنے کلچر اپنی ثقافت نوں پروان چڑھاندی رہے تے چودھری پرویزالٰہی دی ایہو ولولہ انگیز’ کثیر الجہت تے ہر ویلے توانا قیادت ایس صوبہ دی ثقافت نوں اگے وی ہور فروغ دیندی رہویں گے۔